Saturday, August 24, 2019 Last Updated 23 Min 59 Sec ago English Edition
Todays E paper
Ads by Google
Monday 24 Jun 2019 01.18 AM

ജില്ലാ പഞ്ചായത്ത്‌ ഫണ്ട്‌ സര്‍ക്കാര്‍ അടിച്ചുമാറ്റിയെന്ന ആരോപണം അടിസ്‌ഥാനരഹിതം: മന്ത്രി

പത്തനംതിട്ട: ജില്ലാ പഞ്ചായത്തിന്റെ ഫണ്ട്‌ വിഹിതം സര്‍ക്കാര്‍ അടിച്ചുമാറ്റിയെന്ന ആരോപണം രാഷ്‌ട്രീയ ദുഷ്‌ടലാക്ക്‌ വച്ചുള്ള അസംബന്ധ പ്രചാരണമാണെന്ന്‌ മന്ത്രി ഡോ. തോമസ്‌ ഐസക്‌ ഫെയ്‌സ്‌ബുക്ക്‌ പോസ്‌റ്റിലൂടെ വ്യക്‌തമാക്കി. കോന്നി ഉപതെരഞ്ഞെടുപ്പ്‌ മുന്‍നിര്‍ത്തിയുള്ള രാഷ്ര്‌ടീയ പ്രചാരണമാണ്‌ ആരോപണത്തിനു പിന്നില്‍.
രണ്ടാഴ്‌ച മുമ്പ്‌ മംഗളമാണ്‌ ഈ വാര്‍ത്ത പുറത്തു കൊണ്ടുവന്നത്‌. ജില്ലാ പഞ്ചായത്ത്‌ കമ്മറ്റിയില്‍ ഈ വിഷയം ചര്‍ച്ചയാകുകയും ജില്ലാ പഞ്ചായത്ത്‌ പ്രസിഡന്റ്‌, വൈസ്‌ പ്രസിഡന്റ്‌, പ്രതിപക്ഷാംഗങ്ങള്‍, സെക്രട്ടറി എന്നിവര്‍ അടങ്ങുന്ന സംഘം തിരുവനന്തപുരത്ത്‌ പോയി മന്ത്രിയെ കണ്ടെങ്കിലും വെറുംകൈയോടെ മടങ്ങുകയായിരുന്നു. പിന്നീടാണ്‌ ഈ തുക സര്‍ക്കാര്‍ അടിച്ചു മാറ്റിയതാണ്‌ എന്ന തരത്തില്‍ പ്രചാരണം വന്നത്‌. മന്ത്രിയുടെ ഫെയ്‌സ്‌ ബുക്ക്‌ പോസ്‌റ്റ്‌ ഇപ്രകാരമാണ്‌: രണ്ടു പ്രശ്‌നങ്ങളാണ്‌ ഉന്നയിച്ചിട്ടുള്ളത്‌. ഒന്ന്‌, ട്രഷറിയില്‍ ബില്ലു സമര്‍പ്പിച്ചിട്ടും പണം ലഭ്യമായില്ല. രണ്ട്‌, ജില്ലാ പഞ്ചായത്തിന്റെ പദ്ധതി വിഹിതത്തില്‍ നിന്ന്‌ 63 കോടി രൂപ തിരിച്ചെടുത്തു. രണ്ടു പ്രശ്‌നങ്ങളും വിശദമായി പരിശോധിച്ചു.
കഴിഞ്ഞ വര്‍ഷം വിവിധ വകുപ്പുകളുടെ പദ്ധതികളില്‍ 20 ശതമാനം കുറവു വരുത്തി പ്രളയ ച്ചെലവുകള്‍ക്കുവേണ്ടി നീക്കി വയ്‌ക്കേണ്ടി വന്നപ്പോഴും തദ്ദേശ ഭരണ പദ്ധതികളില്‍ ഒരു വെട്ടിക്കുറവും വരുത്തിയിരുന്നില്ല. മാര്‍ച്ച്‌ 31ന്‌ മുമ്പ്‌ തദ്ദേശഭരണ പദ്ധതിയുടെ 85 ശതമാനം പണവും ട്രഷറിയില്‍നിന്നും നല്‍കി. ട്രഷറിയില്‍ ബില്ല്‌ സമര്‍പ്പിച്ചിട്ടും പണം നല്‍കാതെ ക്യൂവില്‍ ഉണ്ടായിരുന്നത്‌ 837 കോടിയാണ്‌. അതില്‍ 808 കോടി രൂപ ട്രഷറിയില്‍ നിന്നും ഈ ധനകാര്യ വര്‍ഷത്തില്‍ മാറി നല്‍കിയിട്ടുണ്ട്‌. ബാക്കിയുള്ള 29 കോടി രൂപ ബില്ലുകള്‍ റീ-വാലിഡേറ്റ്‌ ചെയ്‌ത്‌ സമര്‍പ്പിച്ചാല്‍ ഉടന്‍ നല്‍കുന്നതിന്‌ യാതൊരു തടസവുമില്ല. അപ്പോള്‍ പത്തനംതിട്ട ജില്ലാ പഞ്ചായത്തിനെ തെരഞ്ഞു പിടിച്ച്‌ എന്തോ ചെയ്‌തെന്ന ആരോപണത്തില്‍ എന്തു കഴമ്പുണ്ട്‌? ജില്ലാ പഞ്ചായത്തിന്റെ 19.10 കോടി രൂപയുടെ ബില്ലുകളാണ്‌ മാര്‍ച്ച്‌ അവസാനം ക്യൂവിലേക്കു മാറ്റിയത്‌. അതില്‍ 18.65 കോടി രൂപയും ഇതിനകം മാറിയിട്ടുണ്ട്‌.
വെറും 45 ലക്ഷം രൂപ മാത്രമാണ്‌ ബാക്കിയുള്ളത്‌. നടപടിക്രമം പാലിക്കുന്നതനുസരിച്ച്‌ മാറും. ഇനി ജില്ലാ പഞ്ചായത്തിന്റെ പദ്ധതി വിഹിതത്തില്‍ നിന്ന്‌ 63 കോടി രൂപ തിരിച്ചെടുത്തെന്ന ആരോപണം. അടുത്ത സാമ്പത്തിക വര്‍ഷത്തെ പദ്ധതിയില്‍ ഈ തുക കുറവു വരുമെന്നും അതുമൂലം പുതിയ പദ്ധതികള്‍ ഏറ്റെടുക്കാന്‍ കഴിയില്ലെന്നുമൊക്കെയാണ്‌ ആരോപണം. ഇത്‌ ശുദ്ധ അസംബന്ധമാണ്‌. സ്‌പില്‍ ഓവര്‍ മൂലം ക്യൂവിലേക്ക്‌ മാറിയത്‌ 19.10 കോടി രൂപയാണെന്ന്‌ പറഞ്ഞുവല്ലോ. ഈ സാമ്പത്തിക വര്‍ഷം 20 ശതമാനം സ്‌പില്‍ ഓവര്‍ അനുവദിച്ചിട്ടുണ്ട്‌. ഏതെങ്കിലും പഞ്ചായത്തിന്റെ ക്യൂവിലേക്ക്‌ മാറ്റിയ ബില്ലുകളുടെ ആകെത്തുക അനുവദനീയമായ സ്‌പില്‍ ഓവര്‍ തുകയേക്കാള്‍ കൂടുതലാണെങ്കില്‍, അക്കാര്യം സര്‍ക്കാര്‍ പ്രത്യേകം പരിഗണിക്കുമെന്ന്‌ ഉറപ്പു നല്‍കിയിട്ടുണ്ട്‌.
ജില്ലാ പഞ്ചായത്തിന്റെ സ്‌പില്‍ ഓവര്‍ അര്‍ഹത 17 കോടി രൂപയാണ്‌. ബാക്കി രണ്ടു കോടിയാണ്‌ അവശേഷിക്കുന്നത്‌. ക്യൂവിലുള്ള ബില്ലുകള്‍ ഈ വര്‍ഷത്തെ പദ്ധതി അലോക്കേഷനില്‍ നിന്നാണല്ലോ നല്‍കുന്നത്‌. നിയമപരമായി അങ്ങനെയേ കഴിയൂ. ഈ വര്‍ഷത്തെ പദ്ധതി ഡിസംബര്‍ മാസത്തില്‍ തയാറാക്കി കഴിഞ്ഞതിനാല്‍ പണം തികയാതെ വരുമെന്നാണ്‌ ആശങ്ക. ഇത്‌ അടിസ്‌ഥാന രഹിതമാണ്‌. 20 ശതമാനം അടങ്കല്‍ വര്‍ധിപ്പിച്ചുകൊണ്ട്‌ പദ്ധതി റിവൈസ്‌ ചെയ്യാന്‍ അനുമതി നല്‍കിയിട്ടുണ്ട്‌. ക്യൂവിലുണ്ടായിരുന്ന ബില്ലുകളുടെ തുക ഇവിടെ ഉള്‍പ്പെടുത്തിയാല്‍ മതി.
ഭൂരിപക്ഷം തദ്ദേശഭരണ സ്‌ഥാപനങ്ങള്‍ക്കും 20 ശതമാനം വര്‍ധന ഇതിനു മതിയാകും. കൂടുതല്‍ തുകകള്‍ ക്യൂവില്‍ ഉണ്ടായിരുന്ന ജില്ലാ പഞ്ചായത്ത്‌, കോര്‍പ്പറേഷനുകള്‍കളുടെ ക്യാരിഓവര്‍ തുക 30 ശതമാനമാണ്‌. ഇതുകൊണ്ടും തികയാതെ വന്നാല്‍ ഇത്തരം കേസുകള്‍ പ്രത്യേകമായി പരിഗണിക്കാമെന്നും നിയമസഭയില്‍ ഉറപ്പുനല്‍കിയിരുന്നു.
സ്‌പില്‍ ഓവറടക്കം അടുത്ത വര്‍ഷത്തേയ്‌ക്കുവേണ്ടി അധിക തുക അനുവദിക്കണം എന്നാണല്ലോ ആവശ്യം. യു.ഡി.എഫ്‌. ഭരണസമിതിയാണല്ലോ പത്തനംതിട്ട ജില്ലാ പഞ്ചായത്ത്‌ ഭരിക്കുന്നത്‌. യു.ഡി.എഫിന്റെ ഭരണ കാലത്ത്‌ ഏതെങ്കിലും സ്‌പില്‍ഓവര്‍ പ്രോജക്‌ടുകള്‍ക്ക്‌ അധിക പണം അനുവദിച്ചിട്ടുണ്ടോ? എല്‍.ഡി.എഫ്‌.സര്‍ക്കാര്‍ ജനകീയാസൂത്രണ കാലത്ത്‌ കൊണ്ടുവന്ന ക്യാരിഓവര്‍ സമ്പ്രദായംപോലും അവര്‍ നിര്‍ത്തലാക്കുകയാണ്‌ ചെയ്‌തത്‌. ജനകീയാസൂത്രണം തുടങ്ങിയ കാലത്ത്‌ നടപ്പിലാക്കിയ ധനവിന്യാസ സമ്പ്രദായത്തിന്‌ രണ്ട്‌ പ്രത്യേകതകള്‍ ഉണ്ടായിരുന്നു. ആദ്യത്തേത്‌, തദ്ദേശ ഭരണ സ്‌ഥാപനങ്ങള്‍ക്ക്‌ പദ്ധതി പണം നാല്‌ ഗഡുക്കളായി അഡ്വാന്‍സായി നല്‍കും. അത്‌ അവരുടെ പ്ലാന്‍ പി.ഡി. അക്കൗണ്ടിലിട്ട്‌ ആവശ്യാനുസരണം ചെലവഴിക്കുകയാണ്‌ പതിവ്‌.
രണ്ടാമതായി, 20 ശതമാനം ക്യാരി ഓവറായി അംഗീകരിക്കപ്പെട്ടു. 80 ശതമാനത്തില്‍ താഴെ പണം ചെലവഴിച്ചവര്‍ക്ക്‌ ആ കുറവു വന്ന തുക നഷ്‌ടപ്പെടും. ബാക്കിയുള്ളവ 20 ശതമാനം ക്യാരിഓവറില്‍ ഉള്‍പ്പെടുത്താം. അതായത്‌ 20 ശതമാനം തുകയ്‌ക്കുള്ള സ്‌പില്‍ഓവര്‍ പദ്ധതികള്‍ അടുത്ത വര്‍ഷവും അവര്‍ക്ക്‌ തുടര്‍ന്ന്‌ നടത്താം. 2003ല്‍ യു.ഡി.എഫ്‌. ഈ സമ്പ്രദായം അവസാനിപ്പിച്ചു. തദ്ദേശഭരണ സ്‌ഥാപനങ്ങള്‍ക്ക്‌ പണം അഡ്വാന്‍സായി നല്‍കുന്നതിനു പകരം മറ്റു ഡിപ്പാര്‍ട്ട്‌മെന്റുകള്‍ പോലെ ബില്ലുകള്‍ സമര്‍പ്പിച്ച്‌ കണ്‍സോളിഡേറ്റഡ്‌ ഫണ്ടില്‍നിന്നും പണം പിന്‍വലിക്കുന്ന സമ്പ്രദായം കൊണ്ടുവന്നു. മാര്‍ച്ച്‌ 31ന്‌ ചെലവാകാത്ത പണം പൂര്‍ണമായും ലാപ്‌സാവുകയും ചെയ്യുന്നു.
നിലവില്‍ അക്കൗണ്ടിലുണ്ടായിരുന്ന 2000 കോടിയോളം രൂപ തിരിച്ചെടുത്തു. സ്‌പില്‍ഓവര്‍ പ്രോജക്‌ടുകള്‍ക്കുള്ള ക്യാരിഓവര്‍ അവസാനിപ്പിക്കുകയും ചെയ്‌തു. 2006ല്‍ വന്ന എല്‍.ഡി.എഫ്‌. സര്‍ക്കാര്‍ അലോട്ട്‌മെന്റ്‌ സിസ്‌റ്റം തിരികെ കൊണ്ടുവന്നു. പഞ്ചായത്തുകളുടെ പദ്ധതി മുന്‍കാലങ്ങളിലെപോലെ മാര്‍ച്ച്‌ മാസം കഴിഞ്ഞാല്‍ സ്‌പില്‍ ഓവര്‍ തുടരാനുള്ള അനുമതിയും ക്യാരി ഓവര്‍ പണവും അനുവദിച്ചു. തുടര്‍ന്നുവന്ന യു.ഡി.എഫ്‌. സര്‍ക്കാര്‍ ആദ്യ മൂന്നു വര്‍ഷം നിലവിലെ രീതി തുടര്‍ന്നു. 2013-14ല്‍ സാമ്പത്തിക പ്രതിസന്ധി രൂക്ഷമായി. ആദ്യം കോടാലി വീണത്‌ തദ്ദേശഭരണ സ്‌ഥാപനങ്ങളിന്‍ മേലാണ്‌. അലോട്ട്‌മെന്റ്‌ സമ്പ്രദായം അവസാനിപ്പിച്ച്‌ കണ്‍സോളിഡേറ്റഡ്‌ ഫണ്ടില്‍ നിന്നും പണം മാറിയെടുക്കുന്ന സമ്പ്രദായം പുനഃസ്‌ഥാപിച്ചു. ക്യാരിഓവറും അവസാനിപ്പിച്ചു. പക്ഷെ ബില്ലുകള്‍ ക്യൂവില്‍ വയ്‌ക്കേണ്ട ആവശ്യം വന്നില്ല. കാരണം മറ്റൊന്നുമല്ല. പദ്ധതി ചെലവ്‌ 2014-15ല്‍ 68 ശതമാനവും 2015-16ല്‍ 73 ശതമാനവുമായിരുന്നു. നടപ്പാക്കാതെ പോയ സ്‌പില്‍ഓവര്‍ പ്രോജക്‌ടുകള്‍ക്ക്‌ ക്യാരിഓവര്‍ ഇല്ലാത്തതിനാല്‍ അധിക പണവും നല്‍കപ്പെട്ടില്ല. എന്നാല്‍, ഇപ്പോള്‍ പദ്ധതി ചെലവ്‌ 2017-18ല്‍ 84 ശതമാനവും 2018-19ല്‍ 85 ശതമാനവുമാണ്‌. സാമ്പത്തിക ഞെരുക്കത്തിന്റെ പശ്‌ചാത്തലത്തില്‍ 837 കോടി രൂപയുടെ ബില്ലുകള്‍ ക്യൂവില്‍ വയ്‌ക്കേണ്ടിവന്നു. പാസാക്കാനുള്ളതിനേക്കാള്‍ അധികപണം ക്യാരിഓവറിലൂടെ അനുവദിക്കുകയും ചെയ്‌തിട്ടുണ്ട്‌. ഇതാണ്‌ യാഥാര്‍ഥ്യം. പത്തനംതിട്ട ജില്ലയോട്‌ സര്‍ക്കാരിന്‌ ഒരു വിവേചനവുമില്ല. മറ്റെല്ലാ ജില്ലാ പഞ്ചായത്തുകള്‍ക്കുമുള്ള മാനദണ്ഡങ്ങള്‍ അവര്‍ക്കും ബാധകമാണ്‌. അത്തരത്തില്‍ത്തന്നെ കാര്യങ്ങള്‍ കൈകാര്യം ചെയ്യും- ധനമന്ത്രി വ്യക്‌തമാക്കി

Ads by Google
Advertisement
Monday 24 Jun 2019 01.18 AM
YOU MAY BE INTERESTED
Ads by Google
Loading...
LATEST NEWS
Ads by Google
TRENDING NOW