Thursday, May 25, 2017 Last Updated 17 Min 3 Sec ago English Edition
Todays E paper
Sunday 02 Apr 2017 02.03 AM

ചിരിയുടെ പൂരക്കാഴ്‌ചയൊരുക്കാന്‍ ഫഹദ്‌ ഫാസിലുമായി മാര്‍ത്താണ്ഡന്‍

uploads/news/2017/04/95775/sun4.jpg

പാവാട എന്ന ഹിറ്റ്‌ സിനിമയ്‌ക്കു ശേഷം ജി.മാര്‍ത്താണ്ഡന്‍ സംവിധാനം ചെയ്യുന്ന ചിത്രത്തില്‍ ഫഹദ്‌ ഫാസില്‍ നായകനാകുന്നു. ബിജു മേനോന്‍ നായകനായ വെള്ളിമൂങ്ങ എന്ന സിനിമയ്‌ക്ക് തിരക്കഥയൊരുക്കിയ ജോജി തോമസാണ്‌ ഈ ചിത്രത്തിനും തിരക്കഥ രചിക്കുന്നത്‌. ചിത്രത്തിന്‌ ഇതുവരെ പേരിട്ടിട്ടില്ല. നായികയേയും മറ്റു കഥാപാത്രങ്ങളേയും തീരുമാനിച്ച്‌ വരുന്നതേയുള്ളൂ. മാര്‍ത്താണ്ഡന്റെ നാലാമത്തെ ചിത്രമാണിത്‌.
മമ്മൂട്ടി ചിത്രം ദൈവത്തിന്റെ സ്വന്തം ക്ലീറ്റസിലൂടെയാണ്‌ മാര്‍ത്താണ്ഡന്‍ സിനിമാ സംവിധായകനായത്‌. പിന്നീട്‌ മമ്മൂട്ടിയെ തന്നെ നായകനാക്കി അച്‌ഛാദിന്‍ എന്ന ചിത്രമൊരുക്കി.പൃഥ്‌വിരാജ്‌ ചിത്രം പാവാടയിലൂടെയാണ്‌ മാര്‍ത്താണ്ഡന്‍ ഹിറ്റ്‌മേക്കര്‍ പദവിയിലേക്ക്‌ എത്തിയത്‌.തൊണ്ണൂറുകള്‍ മുതല്‍ മലയാള സിനിമയില്‍ സജീവമാണ്‌ ഈ ചങ്ങനാശേരിക്കാരന്‍.
19 വര്‍ഷത്തെ കാത്തിരിപ്പിനൊടുവില്‍ സഹസംവിധായകന്‍റെ റോളില്‍ നിന്ന്‌ സ്വതന്ത്ര സംവിധാനത്തിലേക്ക്‌ കടന്നപ്പോഴും മാര്‍ത്താണ്ഡന്‍ വ്യത്യസ്‌തനായി നിന്നു.സംവിധായകന്‍ രാജീവ്‌ നാഥ്‌, മാര്‍ത്താണ്ഡന്‍റെ ബന്ധുവായിരുന്നു. നിരവധി തവണ അദ്ദേഹത്തെ സമീപിച്ചെങ്കിലും ഫലം കണ്ടില്ല. പക്ഷേ നിര്‍ബന്ധം സഹിക്കാനാവാതെ രാജീവ്‌നാഥ്‌ സമ്മതം മൂളി. 1993 ല്‍ സ്വര്‍ണ ചമയം എന്ന ചിത്രത്തിന്‍റെ പണിപ്പുരയിലായിരുന്നു രാജീവ്‌നാഥ്‌. ചിത്രത്തില്‍ രാജീവ്‌ നാഥിന്‍റെ അസോസിയേറ്റായി കൂടി. ശിവാജി ഗണേശനെയും മോഹന്‍ലാലിനെയും മുഖ്യ കഥാപാത്രങ്ങളാക്കിയുള്ള സിനിമയായിരുന്നു. എന്നാല്‍ എന്തു കൊണ്ടോ ആ സിനിമ പൂര്‍ത്തിയായില്ല.പക്ഷേ അങ്ങനെ പരാജയപ്പെട്ടു പിന്‍മാറാന്‍ മാര്‍ത്താണ്ഡന്‍ തയാറായിരുന്നില്ല.
സംവിധായകന്‍ നിസാറിനൊപ്പമായിരുന്നു പിന്നീട്‌. 20 സിനിമകളില്‍ അദ്ദേഹത്തിന്‍റെ അസോസിയേറ്റായി പ്രവര്‍ത്തിച്ചു. അക്കാലത്തെ വലിയ ഹിറ്റുകളായിരുന്ന ബ്രിട്ടീഷ്‌ മാര്‍ക്കറ്റ്‌, ത്രിമെന്‍ ആര്‍മി തുടങ്ങിയ ചിത്രങ്ങളിലെല്ലാം നിസാറിന്‍റെ അസോസിയേറ്റ്‌ മാര്‍ത്താണ്ഡന്‍ തന്നെ. ഇതോടെ മലയാള സിനിമയിലെ അറിയപ്പെടുന്ന അസോസിയേറ്റ്‌ ഡയറക്‌റ്ററായി മാര്‍ത്താണ്ഡന്‍ മാറി.
വര്‍ഷം നാലും അഞ്ചും സിനിമകള്‍. അതും പ്രമുഖരായ സംവിധായകര്‍ക്കൊപ്പം. ലാല്‍, രഞ്‌ജിത്ത്‌, രഞ്‌ജി പണിക്കര്‍, ഷാജി കൈലാസ്‌, ടി.കെ. രാജീവ്‌ കുമാര്‍ അങ്ങനെ നീണ്ടു പോകും ആ കൂട്ടുകെട്ട്‌. അന്‍വര്‍ റഷീദും മാര്‍ത്താണ്ഡനും അക്കാലത്ത്‌ ഒട്ടേറെ സിനിമകളില്‍ ഒരുമിച്ച്‌ അസോസിയേറ്റായി പ്രവര്‍ത്തിച്ചിട്ടുണ്ട്‌. പിന്നീട്‌ അന്‍വര്‍ റഷീദ്‌ സ്വതന്ത്ര സംവിധായകനായ രാജമാണിക്യത്തിലും മാര്‍ത്താണ്ഡന്‍ തന്നെയായിരുന്നു അസോസിയേറ്റ്‌ ഡയറക്‌റ്റര്‍.ഏതൊരു സഹസംവിധായകനും ഉള്ളതു പോലെ സ്വന്തം സിനിമ മാര്‍ത്താണ്ഡന്റെയും സ്വപ്‌നമായിരുന്നു. ഈ ഇഷ്‌ടം അറിയിച്ചതാവട്ടെ മമ്മൂട്ടിയോടും. മലയാളത്തിന്‌ ഒട്ടേറെ സംവിധാകരെ നല്‍കിയിട്ടുള്ള മമ്മൂക്ക മാര്‍ത്താണ്ഡനും വാക്കു കൊടുത്തു. ബെന്നി പി. നായരമ്പലത്തിന്‍റെ തിരക്കഥയുമായി മമ്മൂട്ടിയെ സമീപിച്ചതോടെ ദൈവത്തിന്‍റെ സ്വന്തം ക്ലീറ്റസ്‌ ഉടലെടുത്തു.
ആദ്യ സിനിമ തന്നെ മെഗാസ്‌റ്റാറിനൊപ്പം. അതൊരു വലിയ വെല്ലുവിളിയായിരുന്നു. മമ്മൂക്കയുടെയും ബെന്നി സാറിന്‍റെയും ആന്‍റോ സാറിന്‍റെയും (ആന്‍റോ ജോസഫ്‌) പങ്കാണ്‌ തന്റെ വളര്‍ച്ചയെന്നാണ്‌ മാര്‍ത്താണ്ഡന്‍ പറയുന്നത്‌.അടുത്ത ചിത്രത്തിനും അവസരമൊരുക്കിയത്‌ മമ്മൂട്ടിതന്നെ.മൂന്നാമത്തെ ചിത്രം പാവാടയാണ്‌ മാര്‍ത്താണ്ഡന്റെ തലവര മാറ്റി എഴുതിയ ചിത്രം.2016ലെ ആദ്യ സൂപ്പര്‍ ഹിറ്റായി പാവാട മാറി.എല്ലാത്തരം പ്രേക്ഷകര്‍ക്കും ആസ്വദിക്കാവുന്ന കോമഡി കുടുംബ ചിത്രമായിരിക്കും ഫഹദ്‌ ഫാസിലിനെ നായകനാക്കി ചിത്രീകരിക്കുന്ന പുതിയ ചിത്രമെന്നും അതിനുള്ള തയ്യാറെടുപ്പിലാണെന്നും മാര്‍ത്താണ്ഡന്‍ പറയുന്നു.

എസ്‌.സൂര്യലാല്‍

Ads by Google
Sunday 02 Apr 2017 02.03 AM
YOU MAY BE INTERESTED
TRENDING NOW