Thursday, November 09, 2017 Last Updated 0 Min 51 Sec ago English Edition
Todays E paper
Ads by Google
Monday 13 Mar 2017 01.35 AM

ബയോഗ്യാസ്‌ പ്ലാന്റുകള്‍ ശരിയായി പ്രവര്‍ത്തിക്കാന്‍

uploads/news/2017/03/89028/kar1.jpg

ജൈവവാതക നിര്‍മാണം പണ്ടു മുതലേ പ്രചാരത്തിലുണ്ടായിരുന്നതാണ്‌. ചാണകവും വിസര്‍ജ്യവുമൊക്കെ വായുസമ്പര്‍ക്കമില്ലാത്ത ടാങ്കുകളില്‍ നിറച്ചാണു വാതകം നിര്‍മിച്ചിരുന്നത്‌. പാചക ഇന്ധനമായും വിളക്കു കത്തിക്കാനും ഈ വാതകം ഉപയോഗിച്ചിരുന്നു. എന്നാല്‍ ഇന്നു മാലിന്യ സംസ്‌കരണത്തിനുള്ള വികേന്ദ്രീകൃത സംവിധാനം എന്ന നിലയില്‍ ബയോഗ്യാസ്‌ പ്ലാന്റുകള്‍ക്കുള്ള പ്രാധാന്യം വര്‍ധിച്ചുവരികയാണ്‌.
ബയോഗ്യാസ്‌ പ്ലാന്റുകള്‍ പലതരമുണ്ട്‌. ഗാര്‍ഹിക മാലിന്യം സംസ്‌കരിക്കാനുപയോഗിക്കുന്ന ചെറിയ പോര്‍ട്ടബിള്‍ പ്ലാന്റുമുതല്‍ ടണ്‍കണക്കിന്‌ വിസര്‍ജ്യവസ്‌തുക്കള്‍ സംസ്‌കരിക്കുന്ന ഫിക്‌സിഡ്‌ ടൈപ്പ്‌ ബയോഗ്യാസ്‌ പ്ലാന്റുവരെ ഇന്നുണ്ട്‌. ഓരോ പ്ലാന്റിലും നിക്ഷേപിക്കുന്ന വസ്‌തുക്കളുടെ അളവും തരവും നിക്ഷേപിക്കാന്‍ പാടില്ലാത്ത വസ്‌തുക്കളും പ്ലാന്റിനുള്ളിലെ മാലിന്യം സംസ്‌കരിക്കാന്‍ സ്വാധീനിക്കുന്ന ഘടകങ്ങളും, ഗ്യാസ്‌ ഉല്‍പാദനത്തെ സ്വാധീനിക്കുന്ന കാലാവസ്‌ഥയും പ്ലാന്റിനു വരാന്‍ സാധ്യതയുള്ള പ്രശ്‌നങ്ങളും പരിഹാരമാര്‍ഗങ്ങളും ഗുണഭോക്‌താക്കള്‍ അറിഞ്ഞിരിക്കേണ്ടതാണ്‌.
ജൈവവസ്‌തുക്കളില്‍ വായുസമ്പര്‍ക്കമില്ലാതെ നടക്കുന്ന ദഹനപ്രവര്‍ത്തനത്തിലൂടെയാണു ബയോഗ്യാസ്‌ ഉല്‍പാദിപ്പിക്കുന്നത്‌. മൂന്നു തരം ബാക്‌ടീരിയകള്‍ നാലുഘട്ടങ്ങളിലായി പ്രവര്‍ത്തിക്കുന്നു. ജൈവവസ്‌തുക്കള്‍ നേരിട്ട്‌ ജലത്തില്‍ ലയിക്കുകയില്ല. കാരണം കാര്‍ബോഹൈഡ്രേറ്റ്‌, ഫാറ്റ്‌, പ്രോട്ടീന്‍ എന്നിവയാണു ജൈവവസ്‌തുക്കളിലുള്ളത്‌. ഇവ വലിയ തന്മാത്രകള്‍ ചേര്‍ന്നതാണ്‌.

ബയോഗ്യാസിന്റെ ശാസ്‌ത്രം

പ്ലാന്റിനുള്ളിലെ ജൈവവസ്‌തുക്കളില്‍ ഒന്നാംഘട്ടം പ്രവര്‍ത്തിക്കുന്ന ഹൈഡ്രോളിക്‌സ്‌ ബാക്‌ടീരിയയുടെ പ്രവര്‍ത്തനത്തിലൂടെ ജൈവവസ്‌തുക്കള്‍ ഷുഗര്‍, ഫാറ്റി ആസിഡ്‌, അമിനോ ആസിഡ്‌ എന്നിവകളായി മാറുന്നു. രണ്ടാംഘട്ട പ്രക്രിയയ്‌ക്കായി അസിഡോ ജെനീസില്‍ ഈ ആസിഡ്‌ ദ്രാവകം കാര്‍ബോണിക്ക്‌ ആസിഡ്‌, ആല്‍ക്കഹോള്‍, ഹൈഡ്രജന്‍, കാര്‍ബണ്‍ ഡയോക്‌സൈഡ്‌, അമോണിയ എന്നിവകളായി വിഘടിക്കുന്നു. ഈ വിഘടന പ്രവര്‍ത്തനങ്ങളില്‍ പ്രവര്‍ത്തിക്കുന്നത്‌ പുളിപ്പിക്കുന്ന ബാക്‌ടീരിയകളാണ്‌.
മൂന്നാംഘട്ട പ്രക്രിയയായ അസിഡോ ജെനീസില്‍ അവ അസെറ്റിക്‌ ആസിഡ്‌, കാര്‍ബണ്‍ ഡയോക്‌സൈഡ്‌, ഹൈഡ്രജന്‍ എന്നിവചേര്‍ന്ന മിശ്രിതമായി മാറുന്നു. നാലാംഘട്ട പ്രക്രിയയായ മെത്തനോജെനീസില്‍ മീഥൈന്‍, കാര്‍ബണ്‍ ഡയോക്‌സൈഡ്‌ എന്നിവ ഉല്‍പാദിപ്പിക്കുന്നു.

പ്ലാന്റില്‍ ചാണകം നിറയ്‌ക്കേണ്ടതിന്റെ ആവശ്യകത

ചെറിയ പോര്‍ട്ടബിള്‍ പ്ലാന്റ്‌മുതല്‍ വലിയ ഫിക്‌സിഡ്‌ ഡൂം ടൈപ്പ്‌ പ്ലാന്റുവരെയുള്ളതില്‍ ജൈവവിഘടന പ്രക്രിയയുടെ വിവിധ ഘട്ടങ്ങളിലെ പ്രവര്‍ത്തനങ്ങള്‍ക്ക്‌ ആവശ്യമായ ബാക്‌ടീരിയകള്‍ പ്ലാന്റിനുള്ളിലെ മലിനവസ്‌തുക്കളിലുണ്ടെങ്കില്‍ മാത്രമേ ബയോഗ്യാസ്‌ പ്ലാന്റ്‌ ശരിയായ രീതിയില്‍ പ്രവര്‍ത്തിക്കുകയുള്ളു.
പ്ലാന്റിനുള്ളില്‍ ബാക്‌ടീരിയകള്‍ പെട്ടെന്നു വളര്‍ന്ന്‌ു വ്യാപിപ്പിക്കാന്‍ ചാണകം നിറയ്‌ക്കുന്നതാണുത്തമം. ചാണകത്തില്‍ ഈ ബാക്‌ടീരിയകളെല്ലാം ധാരാളം അടങ്ങിയിട്ടുണ്ട്‌. കന്നുകാലികള്‍ അയവിറക്കുന്ന സ്വഭാവമുള്ളതിനാല്‍ അവയുടെ ആമാശയത്തില്‍ ഇത്തരം ബാക്‌ടീരിയകള്‍ കൂടുതലായുണ്ട്‌. അതുകൊണ്ടാണു ബയോഗ്യാസ്‌ ഉല്‍പാദനത്തിനാവശ്യമായ ബാക്‌ടീരിയ ലഭ്യമാകുന്നതിന്‌ എല്ലാതരത്തിലുമുള്ള പ്ലാന്റിലും ആദ്യം ചാണകം നിറയ്‌ക്കണമെന്നു നിര്‍ദേശിക്കുന്നത്‌.

നിക്ഷേപിക്കാവുന്ന ചാണകത്തിന്റെ സ്വഭാവം

കഴിവതും പുതിയതും മാര്‍ദവവുമുള്ള ചാണകമായിരിക്കണം. ചാരം, ഡെറ്റോള്‍, കെമിക്കലുകള്‍, അമ്ലസ്വഭാവമുള്ള വസ്‌തുക്കള്‍, കീടനാശിനി, ഫിനോള്‍, മരുന്നുകള്‍, സോപ്പുവെള്ളം എന്നിവ കലര്‍ന്ന ചാണകവും കുളമ്പുരോഗത്തിന്‌ കുത്തിവയ്‌പ്‌ നല്‍കിയശേഷം വിസര്‍ജിക്കപ്പെടുന്ന ചാണകവും പ്ലാന്റില്‍ നിക്ഷേപിക്കാന്‍ പാടില്ല. ഈ വസ്‌തുക്കളെല്ലാം ബാക്‌ടീരിയകളെ നശിപ്പിക്കുന്നവയാണ്‌.
പ്രവര്‍ത്തിച്ചു തുടങ്ങിയ പ്ലാന്റില്‍ പ്ലാസ്‌റ്റിക്‌, പാഴ്‌ക്കടലാസ്‌, വാഴയില, കോഴിത്തൂവല്‍, മുട്ടത്തോട്‌, ഓറഞ്ച്‌, നാരങ്ങ, അച്ചാറുകള്‍ തുടങ്ങിയവയും കലര്‍ന്നാല്‍ പ്ലാന്റ്‌ പ്രവര്‍ത്തിക്കുകയില്ല. പ്രത്യേകിച്ച്‌ ചെറിയ പോര്‍ട്ടബിള്‍ പ്ലാന്റുകള്‍.

ജൈവ വാതകം ഉണ്ടാകുന്നത്‌

ജൈവവിഘടന പ്രക്രിയ - ജൈവവസ്‌തുക്കള്‍ - കാര്‍ബോഹൈഡ്രേറ്റ്‌, ഫാറ്റ്‌, പ്രോട്ടീന്‍
1. ഹൈഡ്രോളിക്‌സ്‌ - ഷുഗര്‍, ഫാറ്റി ആസിഡ്‌, അമിനോ ആസിഡ്‌
2 അസിഡോ ജെനീസിസ്‌ - കാര്‍ബോണിക്‌ ആസിഡ്‌, ആല്‍ക്കഹോള്‍, ഹൈഡ്രജന്‍, കാര്‍ബണ്‍ ഡയോക്‌സൈഡ്‌, അമോണിയ
3. അസിന്റോജെനീസിസ്‌ - അസെറ്റിക്‌ ആസിഡ്‌, വിനാഗിരി, കാര്‍ബണ്‍ ഡയോക്‌സൈഡ്‌, ഹൈഡ്രജന്‍.
4. മെത്തനോ ജനീസിസ്‌ - ബയോഗ്യാസ്‌ (മീഥൈന്‍, കാര്‍ബണ്‍ ഡയോക്‌സൈഡ്‌)

ബയോഗ്യാസിലെ മുഖ്യഘടകങ്ങള്‍

മീഥൈന്‍ - 75 ശതമാനം
കാര്‍ബണ്‍ഡയോക്‌സൈഡ്‌-25-45 %
ജലബാഷ്‌പം - 2.7 %
അമോണിയ - 2-10%
ഹൈഡ്രജന്‍ - 0.90%

ബയോഗ്യാസ്‌ സ്ലറിയിലെ പോഷകങ്ങള്‍

നൈട്രജന്‍ - 1.4- 1.8 %
ഫോസ്‌ഫറസ്‌ - 1.2 %
പൊട്ടാഷ്‌ - 0.8 - 1.2% കൂടാതെ
മറ്റ്‌ സൂക്ഷ്‌മ മൂലകങ്ങളും

പ്ലാന്റിനുള്ളിലെ റിട്ടെന്‍ഷന്‍ സമയം

ഗ്യാസ്‌ പൂര്‍ണമായും ഉല്‍പാദിപ്പിക്കുന്നതിനും മാലിന്യം സംസ്‌കരിക്കപ്പെടുന്നതിനും പ്ലാന്റിനുള്ളില്‍ കിടക്കേണ്ട സമയം ജൈവവസ്‌തുക്കളുടെ തരം അനുസരിച്ച്‌ വ്യത്യാസപ്പെട്ടിരിക്കും. ഇതിനെ റിട്ടെന്‍ഷന്‍ സമയം എന്നു പറയും. ചാണകത്തിന്‌ ഏകദേശം 40-44 ദിവസങ്ങളും, അടുക്കള അവശിഷ്‌ടങ്ങള്‍ക്ക്‌ 30 ദിവസവും മനുഷ്യ വിസര്‍ജ്യത്തിന്‌ 55 ദിവസവുമാണ്‌. ചൂടു കൂടുമ്പോള്‍ റിട്ടെഷന്‍ സമയം കുറയുകയും തണുപ്പുകാലത്ത്‌ റിട്ടെന്‍ഷന്‍ സമയം കൂടുകയും ഗ്യാസ്‌ ഉല്‍പാദനം കുറയുകയും ചെയ്യും.
പ്ലാന്റില്‍ നിക്ഷേപിക്കുന്ന വസ്‌തുക്കളില്‍ നാരുകളധികമുള്ള സസ്യഭാഗങ്ങള്‍, വാഴയില തുടങ്ങിയവയില്‍ ജൈവവിഘടന പ്രവര്‍ത്തനം വളരെ സാവധാനമേ നടക്കുകയുള്ളു. പഴകിയ ചാണകം നിറയ്‌ക്കുന്നതും രണ്ടാഴ്‌ചയില്‍ കൂടുതല്‍ ദിവസം പ്ലാന്റില്‍ ജൈവവസ്‌തുക്കള്‍ നിക്ഷേപിക്കാതിരിക്കുന്നതും പ്ലാന്റിന്റെ പ്രവര്‍ത്തനശേഷി കുറയ്‌ക്കും. വാതകം ഉപയോഗിക്കാതെ കെട്ടിനിര്‍ത്തുന്നതും ബാക്‌ടീരിയകളുടെ പ്രവര്‍ത്തനം നിലച്ചുപോകാന്‍ കാരണമാകും.

ബയോഗ്യാസ്‌ ഉല്‍പാദനത്തെ സ്വാധീനിക്കുന്ന ഘടകങ്ങള്‍

ബയോഗ്യാസ്‌ ഉല്‍പാദനത്തെ സ്വാധീനിക്കുന്ന ഘടകങ്ങള്‍ പലതുണ്ട്‌. കാര്‍ബണ്‍ - നൈട്രജന്‍ അനുപാതം, പിഎച്ച്‌ മൂല്യം, താപനില, നിക്ഷേപ അളവ്‌, വലിപ്പം, റിട്ടെന്‍ഷന്‍ സമയം, നിക്ഷേപിക്കുന്ന വസ്‌തുക്കളുടെ ഖരസാന്ദ്രത എന്നിവ അതിലുള്‍പ്പെടുന്നു.
കാര്‍ബണ്‍ - നൈട്രജന്‍ അനുപാതം
പിഎച്ച്‌ മൂല്യം - 6.8-7.2,
താപനില - 35 ഡിഗ്രി സെല്‍ഷ്യസ്‌
നിക്ഷേപ അളവ്‌ - കപ്പാസിറ്റിക്കനുസൃതം
ഖരസാന്ദ്രത - 8 %
വലുപ്പം - 2 സെന്റിമീറ്റര്‍
റിട്ടെന്‍ഷന്‍ ടൈം - 30-50 ദിവസങ്ങള്‍

പ്രശ്‌ന സാധ്യതകള്‍

വാതക സംഭരണിയെയും സ്‌റ്റൗവിനേയും ബന്ധിപ്പിക്കുന്ന ഹോസ്‌ തുടിഞ്ഞുകിടന്നാല്‍ ബയോഗ്യാസിലെ നീരാവി ഘനീഭവിച്ചു വെള്ളത്തുള്ളികളായി കെട്ടികിടക്കും. ഇത്‌ ഗ്യാസിന്റെ ഒഴുക്ക്‌ തടയും. കൂടാതെ പ്ലാന്റില്‍ ഗ്യാസ്‌ നിറഞ്ഞിട്ടും ബര്‍ണര്‍ കത്താത്ത അവസ്‌ഥ വരും. നിശ്‌ചിതമായ അളവിലും കൂടുതല്‍ മാലിന്യം പ്ലാന്റില്‍ നിക്ഷേപിച്ചാലും ഗ്യാസ്‌ കത്താതെ വരും.
കാര്‍ബണ്‍ കൂടുതലുള്ള വസ്‌തുക്കള്‍ തനിയെ പ്ലാന്റില്‍ നിക്ഷേപിക്കാതെ ശ്രദ്ധിക്കണം. പ്ലാന്റിനുള്ളില്‍ രൂപപ്പെടുന്ന പാട ഇടയ്‌ക്കിടെ ഇളക്കിമറിക്കണം. പ്ലാന്റിനുള്ളിലെ ദ്രാവകത്തിന്‌ അമ്ലത കൂടിയാല്‍ അല്‍പം കുമ്മായം ചേര്‍ത്ത്‌ കൊടുക്കാം, പക്ഷേ ഗ്യാസ്‌ ഉല്‍പാദനം കുറച്ചു ദിവസത്തേക്ക്‌ തടസപ്പെടും. കുമ്പളങ്ങ ചെറുതായി വെട്ടിയരിഞ്ഞു നിക്ഷേപിച്ചാല്‍ ഗ്യാസ്‌ ഉല്‍പാദനം തടസപ്പെടാതെ ദ്രാവകത്തിന്റെ അമ്ലത മാറികിട്ടും

ബയോഗ്യാസിന്റെ സവിശേഷതകള്‍

ഒരു ക്യുബിക്‌ മീറ്റര്‍ ബയോഗ്യാസ്‌ 0.6 ലിറ്റര്‍ ഡീസലിനും 0.5 ലിറ്റര്‍ മണ്ണെണ്ണയ്‌ക്കും 0.37 കിലോ പാചക വാതകത്തിനും തുല്യമാണ്‌. ഒരാള്‍ക്ക്‌ ഒരു ദിവസം ഭക്ഷണം പാകം ചെയ്യുന്നതിന്‌ 0.34 - 0.43 ക്യൂബിക്‌ മീറ്റര്‍ ബയോഗ്യാസ്‌ മതി. വെളിച്ചം തരുന്നതിന്‌ ഒരു 40 സി.പി. ബള്‍ബ്‌ ഒരു മണിക്കൂര്‍ കത്തിക്കുന്നതിന്‌ 0.28 ക്യൂബിക്‌ മീറ്റര്‍ ബയോഗ്യാസ്‌ മതി. പെട്രോള്‍, മണ്ണെണ്ണ, ഡീസല്‍ എന്‍ജിനുകളില്‍ മാറ്റം വരുത്തി ഒരു എച്ച്‌പി മോട്ടോര്‍ ഒരു മണിക്കൂര്‍ പ്രവര്‍ത്തിപ്പിക്കുന്നതിന്‌ 0.45 ക്യൂബിക്‌ മീറ്റര്‍ ബയോഗ്യാസ്‌ മതി.
പ്ലാന്റില്‍നിന്നു പുറത്തുവരുന്ന സ്ലറി വിളകള്‍ക്ക്‌ ഒന്നാന്തരം ജൈവവളമാണ്‌. കരിയിലപ്പൊടി, അറക്കപ്പൊടി, ചകിരിച്ചോറ്‌ വളം എന്നിവ ചേര്‍ത്ത്‌ ഇളക്കി സസ്യങ്ങള്‍ക്ക്‌ കൊടുത്താല്‍ നല്ല വിളവു കിട്ടും. ബയോഗ്യാസ്‌ സ്ലറി പതിവായി ഉപയോഗിക്കുന്ന കൃഷിയിടത്തില്‍ ഫോമിക്‌ ആസിഡ്‌, അസെറ്റിക്ക്‌ ആസിഡ്‌, പ്ര?സയോണിക്‌ ആസിഡ്‌, ഫ്യുമാറിക്‌ ആസിഡ്‌, സക്‌സിനിക്‌ ആസിഡ്‌ മുതലായ ജൈവ അമ്ലങ്ങള്‍ ധാരാളമായി അടങ്ങുന്നു. ഇത്‌ പലവിധ രോഗങ്ങളില്‍നിന്നും ചെടികളെ സംരക്ഷിക്കുന്നു. കൂടാതെ മണ്ണില്‍ ലയിക്കാത്ത അലേയ ഫോസ്‌ഫറസ്‌ രൂപങ്ങളെ ലേയ ഫോസ്‌ഫറസായി മാറ്റുന്നു.
രണ്ട്‌ ക്യൂബിക്‌ മീറ്റര്‍ കപ്പാസിറ്റിയുള്ള ഒരു ബയോഗ്യാസ്‌ പ്ലാന്റില്‍ നിന്ന്‌ ഒരു വര്‍ഷം എട്ടുമുതല്‍ പത്ത്‌ ഗാര്‍ഹിക പാചകവാതക സിലിണ്ടറിനു തുല്യമായ പാചകവാതകവും ഒമ്പത്‌ ടണ്‍ ജൈവവളവും കിട്ടും

മാത്യു തോമസ്‌ തങ്കമണി

ഫോണ്‍: 9446527305, 9605699300.

Ads by Google
Monday 13 Mar 2017 01.35 AM
YOU MAY BE INTERESTED
Ads by Google
TRENDING NOW