Tuesday, January 10, 2017 Last Updated 14 Min 16 Sec ago English Edition
Todays E paper
Tuesday 10 Jan 2017 03.33 PM

ലൈഫ് ഓഫ് ജീത്തു

uploads/news/2017/01/69378/jeethujoseph3.jpg

ഊഴം കാത്തിരുന്നാണ് ജീത്തു ജോസഫ് മലയാള സിനിമയില്‍ എത്തിയത്. സിനിമകളിലും ജീവിതത്തിലും വേറിട്ട ശബ്ദമാകുന്ന ജീത്തുവിന്റെയും കുടുംബത്തിന്റെയും വിശേഷങ്ങളിലേക്ക്..

മലയാള സിനിമാ ലോകത്തിനു ദൃശ്യ വിരുന്നൊരുക്കിയ സംവിധായകന്‍, തൃപ്പൂണിത്തറയിലെ വലിയകണ്ടത്തില്‍ വീട്ടില്‍ ജീത്തു ജോസഫ് ക്രിസ്മസ് തിരക്കിനിടയിലും പുതിയ സിനിമയുടെ തിരക്കഥയിലാണ്. ഭാര്യ ലിന്റയും മക്കളായ കാത്തറിനും കറ്റീനക്കുമൊപ്പം ജീത്തു വിജയത്തിന്റെ പടികള്‍ പണിതുയര്‍ത്തുകയാണ്.

ചെന്നൈയില്‍ ബി.കോമിനു പഠിക്കുന്ന മൂത്തമകള്‍ കാത്തറിനും പത്താം ക്ലാസുകാരിയായ ഇളയമകള്‍ കറ്റീനയും ചേര്‍ന്ന് ക്രിസ്മസ് ആഘോഷങ്ങള്‍ക്കായുള്ള തയ്യാറെടുപ്പിലാണ് വലിയകണ്ടത്തില്‍ വീടും വീട്ടുകാരും. ജീത്തുവിന് കുടുംബവും സിനിമയും ഒരുപോലെയാണ്. ജീത്തു ജോസഫ് എന്ന കുടുംബനാഥന്റെയും സിനിമക്കാരന്റെയും വിശേഷങ്ങള്‍..

ചെയ്ത സിനിമകളിലെല്ലാം കുടുംബത്തിനു നല്ലൊരു സ്ഥാനം നല്‍കുന്നുണ്ടല്ലോ?


സിനിമ എന്നാല്‍ സമൂഹത്തിന്റെ കഥയാണ്. സമൂഹത്തില്‍ നടക്കുന്ന കഥ. സമൂഹം എന്നത് ഒരു കൂട്ടം കുടുംബങ്ങളാണ്. സ്വാഭാവികമായും സമൂഹത്തിന്റെ കഥ പറയുമ്പോള്‍ കുടുംബം വരും. കുടുംബം ഇല്ലാതെ എന്ത് സമൂഹം?

നാളെ ഹോസ്റ്റല്‍ പശ്ചാത്തലത്തില്‍ ഒരു സിനിമ ചെയ്യുമ്പോള്‍ ചിലപ്പോള്‍ അതില്‍ ഫാമിലിയുടെ ആവശ്യം ഉണ്ടാകില്ല. ഇപ്പോള്‍ ചെയ്യുന്ന സിനിമയില്‍ കുടുംബമില്ല. പ്രകടമായി കുടുംബത്തെ കാണിക്കുന്നില്ലെന്നു മാത്രം.

അച്ഛന്‍ സജീവ രാഷ്ട്രീയ പ്രവര്‍ത്തകനായിരിന്നിട്ടും ആ വഴി തെരഞ്ഞെടുക്കാതിരുന്നത്?


എനിക്ക് രാഷ്ട്രീയം താല്‍പ്പര്യമില്ലാത്ത വിഷയമാണ്. കാരണം എനിക്കും കുടുംബത്തിനും രാഷ്ട്രീയം തിക്താനുഭവമാണ് നല്‍കിയിട്ടുള്ളത്. അച്ഛന് പ്രധാനം കൃഷി തന്നെയായിരുന്നു. അന്നത്തെ പ്രത്യേക സാഹചര്യത്തില്‍ എല്ലാവരുംകൂടി പഞ്ചായത്ത് തെരഞ്ഞെടുപ്പില്‍ മത്സരിപ്പിച്ചു.

അച്ഛന്റെ അച്ഛന് ഒട്ടും താല്‍പ്പര്യമില്ലായിരുന്നു. എന്നിട്ടും മത്സരിച്ചു, വിജയിച്ചു. അന്ന് ശരിക്കും സത്യസന്ധമായ പൊതുപ്രവര്‍ത്തനം ആയിരുന്നു. അന്നത്തെ സ്പിരിറ്റില്‍ നാട് നന്നാക്കാന്‍ കൈയീന്ന് കാശെടുത്താണ് പലതും ചെയ്തത്. പിന്നീട് എം.എല്‍.എ. ആയി.

രാഷ്ട്രീയക്കാരന്‍ എന്നതിലുപരി അച്ഛന്‍ നല്ലൊരു കൃഷിക്കാരനായിരുന്നു. പക്ഷേ കുറച്ച് കഴിഞ്ഞപ്പോള്‍ രാഷ്ട്രീയത്തിന്റെ സ്വഭാവം മാറി. എണ്‍പതുകളില്‍ പൊതുപ്രവര്‍ത്തനം തുടങ്ങിയെങ്കിലും പിന്നീട് കാലുവാരലുമെല്ലാമായി രാഷ്ട്രീയം ബിസിനസ്സായി മാറിയപ്പോഴേക്കും അച്ഛന് പിടിച്ചുനില്‍ക്കാന്‍ പറ്റാതായി.

ഒരാത്മാര്‍ത്ഥതയും ഇല്ലാതെ ഒരാളെ ചിരിച്ചുകാണിക്കുന്നതും ഇന്നത്തെ ഒരു രീതിയാണ്. എനിക്കത് പറ്റില്ല. എനിക്ക് അഭിപ്രായ വ്യത്യാസമുണ്ടെങ്കില്‍ എന്റെ മുഖത്തതറിയാം. കോളജിലൊക്കെ നിര്‍ബന്ധിച്ചിരുന്നു. ഞാന്‍ സമ്മതിച്ചിട്ടില്ല.

പിന്നെയാണ് സിനിമയിലേക്ക് വന്നത്. എന്നാല്‍ രണ്ടും ഒരുപോലെ തന്നെ. അധികാരം ഉണ്ടെങ്കില്‍ രാഷ്ട്രീയത്തില്‍ കൂടെ ആളുണ്ടാകും. സിനിമയില്‍ വിജയമുണ്ടെങ്കില്‍ ആളുണ്ട്.

സിനിമകളിലും രാഷ്ട്രീയ പ്രവര്‍ത്തകരെ കാണാനില്ല ?


പൂര്‍ണമായും രാഷ്ട്രീയം ഉള്‍പ്പെടുത്തി ഒരു സിനിമ ചെയ്യണമെന്നുണ്ടായിരുന്നു. പക്ഷേ അത് കഥയാക്കാന്‍ കഴിഞ്ഞില്ല. നാളെ ചിലപ്പോള്‍ വന്നേക്കാം.

അച്ഛന്റെ കൃഷിയോടും താല്‍പര്യമില്ലേ?


പണ്ടേ കൃഷിയോട് വലിയ താല്‍പ്പര്യമില്ല.റബര്‍വെട്ടിയ കാശ് ഉപയോഗിക്കാന്‍ മാത്രമാണറിയാമായിരുന്നത്. സഹോദരങ്ങള്‍ക്കൊക്കെ കൃഷി ഇഷ്ടമാണ്. ഇപ്പോഴുള്ള വീട്ടിലെ ചെടികളു
മൊക്കെ എനിക്ക് കാണാനും ആസ്വദിക്കാനുമാണ് ഇഷ്ടം. ഐഡിയ എല്ലാം പറയും.

എന്നിട്ടും ഒരിക്കല്‍ കൃഷി ഉണ്ടായിരുന്നു. കല്യാണം കഴിഞ്ഞ സമയത്ത് പ്രത്യേകിച്ച് ഒന്നും ചെയ്യാനില്ല. റബര്‍ ഉണ്ട്, അത് വെട്ടാനും ആള്‍ക്കാരുണ്ട്. സാമ്പത്തികവും ഉണ്ട്. ആയിടയ്ക്കാണ് മുല്ലക്കൃഷിയെപ്പറ്റി കേള്‍ക്കുന്നത്. ജീവിതത്തില്‍ ഒരേയൊരു തവണ മാത്രമാണ് അത് പരീക്ഷിച്ചത്. ഒരേക്കര്‍ സ്ഥലത്തെ തെങ്ങ് മുഴുവന്‍ വെട്ടി മുല്ലക്കൃഷി തുടങ്ങി.

വാശിയോടെ ഇറങ്ങിതിരിച്ചാല്‍ ചെയ്യും. കാര്യമായിട്ടുതന്നെ എല്ലാം ചെയ്തു. എല്ലാത്തിനും ആള്‍ക്കാരെ സംഘടിപ്പിച്ചു. ദിവസം 1000 രൂപയോളം ലാഭം കിട്ടിത്തുടങ്ങി. ഒരു മാസം കഴിഞ്ഞപ്പോള്‍ പൂപറിക്കാന്‍ ആരും വരുന്നില്ല. കാരണം രാവിലെ എട്ടുമണിക്കുമുന്‍പ് പൂവ് പറിച്ച് കയറ്റിവിടണം.

എല്ലാവര്‍ക്കും കൃത്യമായി കാശും കൊടുത്തു. കാശ് കിട്ടികഴിഞ്ഞപ്പോള്‍ ആരും പൂ പറിക്കാന്‍ വരാതായി. കൃഷിയുടെ ഏറ്റവും വലിയ പ്രശ്‌നവും ഇതാണ്. എന്തെങ്കിലും കാരണത്താല്‍ കൃഷി നശിക്കും, കാറ്റ്, മഴ, വില കുറവ്, ഇതൊക്കെ വന്നു കഴിയുമ്പോള്‍ മനസ് മടുക്കും.

പിന്നെ എല്ലാവരുടെയും ജീവിതത്തില്‍ ഓരോ സമയമുണ്ടല്ലോ. ഒരാള്‍ ജനിച്ച് മരിക്കുന്നതിനിടയില്‍ ഒരു കാലഘട്ടം ഉണ്ട്. എന്റെ കഷ്ടകാലസമയത്തായിരിക്കും ഇങ്ങനെയുള്ള നഷ്ടങ്ങള്‍ ഉണ്ടായത്. ഞാന്‍ ഇന്നും വിശ്വസിക്കുന്നു, എന്റെ സ്ഥലം ഇതാണ്, സിനിമയാണ്. ദൈവമായിട്ടാണ് എന്നെ ഇതില്‍ എത്തിച്ചത്. സിനിമയില്‍ വരണം എന്നാഗ്രഹിച്ച സമയത്ത് വന്നില്ല.അപ്പോള്‍ എനിക്ക് അതിനുള്ള പക്വത വന്നിട്ടില്ലായിരിക്കാം.

ഈശ്വര വിശ്വാസമുണ്ടോ?


എല്ലാ ഞായറാഴ്ചയും പള്ളിയില്‍ പോകുന്ന ആളല്ല ഞാന്‍. എല്ലാ മതത്തിലും പറയുന്നത് എല്ലാവരെയും സ്‌നേഹിക്കുക, സഹായിക്കുക എന്നാണ്. നമ്മള്‍ ആരെയും ഉപദ്രവിക്കാതിരിക്കുക. എന്നു കരുതി ഞാന്‍ പുണ്യാളന്‍ ഒന്നുമല്ല.

ഒരുപാട് പേരെ സഹായിച്ചിട്ടുണ്ട്. അവരൊന്നുമല്ല എനിക്ക് തിരിച്ച് തന്നത്. ഒരു പരിചയവും ഇല്ലാത്ത സിനിമയില്‍ വന്നപ്പോള്‍ എവിടുന്നൊക്കെയാ സഹായം വന്നതെന്നറിയില്ല. നമ്മള്‍ ഒന്നും പ്രതീക്ഷിക്കാതിരുന്നാല്‍ മതി.

നമുക്ക് കിട്ടാനുള്ളതെല്ലാം കിട്ടും എന്ന് വിശ്വസിക്കുന്നയാളാണ് ഞാന്‍. ഇതൊക്കെ അച്ഛനില്‍നിന്നു കിട്ടിയതാണ്. അച്ഛന്‍ ഉപദേശിക്കുന്ന ആളായിരുന്നില്ല: ജീവിച്ചു കാണിക്കുന്നയാളായിരുന്നു.

കൊച്ചേട്ടന്‍ എന്നായിരുന്നു അച്ഛനെ എല്ലാവരും വിളിച്ചിരുന്നത്. വീടിന് മുന്നില്‍നിന്നും ചീത്ത വിളിച്ചിട്ട് പോയവര്‍ പിറ്റേന്ന് ആവശ്യവുമായി വരുമ്പോള്‍ നടത്തിക്കൊടുക്കുമായിരുന്നു. ചിലപ്പോള്‍, എന്നാലും ഇന്നലെ എന്നെ അങ്ങനെ വിളിച്ചില്ലേ?? എന്നു മാത്രം പറയും. അത്രേയുള്ളൂ.

ക്ഷമിക്കാനുള്ള മനസാണ് ഏറ്റവും വലുത്. നല്ലതുമാത്രം ചെയ്യുന്ന ആളാണ് ഞാന്‍ എന്നൊന്നും പറയാന്‍ പറ്റില്ല. കുറ്റങ്ങളും കുറവുകളുമെല്ലാമുണ്ട്. അസൂയയും കുശുമ്പും എല്ലാവര്‍ക്കുമുണ്ട്. അതിന്റെ അളവ് മാറിയേക്കുമെന്നേയുള്ളൂ.

മക്കളോടു ഞാന്‍ പറയാറുണ്ട്. സ്വപ്നം കാണണം. അത് കിട്ടിയില്ലെന്നു കരുതി നിരാശപ്പെടുകയും ചെയ്യരുത്. അതേസമയം എല്ലാം ദൈവം തരും എന്നു കരുതി വെറുതെയിരിക്കാനും പാടില്ല. നമ്മള്‍ അധ്വാനിക്കണം. ദൈവം തരും. അപ്പോഴേക്ക് ജീത്തുവിന്റെ ഭാര്യ ലിന്റ ഇടപെട്ടു.

ഇവിടെ അടുത്ത് പള്ളിയുണ്ട്. ഞാന്‍ മിക്കപ്പോഴും പള്ളിയില്‍ പോകാറുണ്ട്. ജീത്തു എന്നും പള്ളിയില്‍ പോയില്ലങ്കിലും സ്ട്രോംഗ് ബിലീവറാണ്. എന്തു തുടങ്ങുമ്പോഴും പ്രാര്‍ഥിക്കും അത്രമാത്രം.

എന്നും പള്ളിയില്‍ പോകുന്ന എന്നേക്കാളും വിശ്വാസം ജീത്തുവിനാണ്. എനിക്ക് നെഗറ്റീവ് ചിന്ത കുറച്ച് കൂടുതലാണ്. എന്നാല്‍ ജീത്തു അങ്ങനെയല്ല. അത് നടക്കേണ്ടതാണെങ്കില്‍ നടത്തും. ദൈവം നടത്തി തരും എന്നൊരു ചിന്താഗതിയാണ്.

ഭാര്യയും മകളും കഥയെഴുതിട്ടുണ്ടല്ലോ?


മൂത്ത മകള്‍ കാതറിനാണ് കഥ പറഞ്ഞത്. സംഭവം ഒരു ത്രില്ലറാണ്. നല്ല കഥയാണെന്ന് ഞാനും മറുപടി പറഞ്ഞു. പക്ഷേ പഠനമാണ പ്രധാനം. ഇപ്പോള്‍ ഡിഗ്രി രണ്ടാം വര്‍ഷമാണ്.

പഠനം കഴിഞ്ഞ് ഒരുവര്‍ഷമെങ്കിലും ജോലിചെയ്തു കഴിഞ്ഞ് ആലോചിക്കാമെന്നാണ് ഞാന്‍ പറഞ്ഞത്. കാരണം എന്റെ അച്ഛന്‍ എനിക്ക് സ്വാതന്ത്ര്യം തന്നിട്ടുണ്ട്. അപ്പോഴും എന്നോടു പറഞ്ഞു. വിദ്യാഭ്യാസം കഴിഞ്ഞിട്ട് മതി എന്തും.. എന്ന്.

സിനിമ ഒരു ഗ്യാരന്റിയും ഇല്ലാത്ത മേഖലയാണ്. ലക്ഷക്കണക്കിനാള്‍ക്കാര്‍ ആഗ്രഹിക്കുന്നു. അതില്‍ വളരെക്കുറച്ചുപേര്‍ മാത്രമാണ് സിനിമയില്‍ എത്തുന്നത്. അതിലും ഒന്നോ രണ്ടോ പേര്‍ മാത്രമാണ് വിജയിക്കുന്നത്.

ലിന്റ:ഞാന്‍ കഥയെഴുതിയെന്നാരു പറഞ്ഞു? ഒരു ത്രെഡ് കിട്ടി. കുറച്ച് സീക്വന്‍സ് ജീത്തുവിനോട് പറഞ്ഞു. കേട്ടുകഴിഞ്ഞാണ് ബാക്കി റെഡിയാക്കാന്‍ പറഞ്ഞത്. എന്റെ സ്റ്റൈലില്‍ എഴുതി കൊടുത്തു. ഇപ്പോള്‍ അത് വായിക്കാനും തിരുത്താനുമായി ജീത്തുവിന്റെ കൈയിലുണ്ട്.

കാത്തി നല്ലൊരു ക്രിട്ടിക്ക് ആണ്. വായിക്കും. സീരിയസ്സ് റൈറ്ററാണ്. സിനിമയ്ക്കു വേണ്ടി എഴുതാന്‍ പറ്റുമോ എന്നറിയില്ല. ജീത്തുവിന്റെ സിനിമയെയും നന്നായി വിമര്‍ശിക്കും, നേരിട്ട് തന്നെ പറയുകയും ചെയ്യും. പക്ഷേ കറ്റീനയ്ക്ക് ഇതിലൊന്നും ഒരു താല്‍പര്യവുമില്ല. ആരെങ്കിലും ചോദിച്ചാല്‍ പത്താം ക്ലാസ്സ് കഴിഞ്ഞോട്ടെ എന്നാണ് അവളുടെ മറുപടി.

എന്താണ് ജീത്തു ജോസഫിന്റെ വിജയം?


എന്റെ വിജയം എന്റെ കുടുംബമാണ്.എന്റെ വിജയത്തിനു പിന്നില്‍ എപ്പോഴും എന്റെ കുടുംബമാണ്. അമ്മച്ചി, ലിന്റ,എന്റെ സഹോദരങ്ങള്‍ എല്ലാവരു എന്നോടപ്പമുണ്ട്. പ്രധാനമായും ലിന്റയും അമ്മച്ചിയുമാണ.് ഒരിക്കല്‍ അമ്മച്ചി പറഞ്ഞു, സ്ഥലം വിറ്റിട്ടായാലും സിനിമ എടുക്കും..

അത്ര പോസ്സിറ്റീവ് ആറ്റിറ്റിയൂഡ് ആണ്. ഇപ്പോള്‍ അമ്മച്ചി എന്റെ തൊട്ടടുത്ത് തന്നെയുണ്ട്. കുറച്ച് സ്വകാര്യത ഇഷ്ടപ്പെടുന്ന ആളാണ് അമ്മ. അതുകൊണ്ട് നാട്ടില്‍ത്തന്നെയായിരുന്നു. പിന്നീട് ഇങ്ങോട്ട് വരാന്‍ വിളിച്ചു, വന്നു.

ലിന്റയും സിനിമയില്‍ സഹകരിക്കുന്നുണ്ടല്ലോ? സെറ്റിലും കുടുംബവാഴ്ചതന്നെ..?


സെറ്റില്‍ ഏറ്റവും കൂടുതല്‍ വഴക്ക് കേള്‍ക്കുന്നത് ലിന്റയാണ്. ഭാര്യയായത് കൊണ്ട് കൂടുതല്‍ തെറിവിളിക്കും. എല്ലാവരുടെയും മുന്നില്‍ വച്ച് തന്നെ വഴക്ക് പറയും.

ചിലപ്പോ വീട്ടില്‍ വന്നിട്ട് പറയും എന്നാലും എല്ലാവരുടെയും മുന്നില്‍ വച്ച് അങ്ങനെ പറഞ്ഞില്ലെ എന്നൊക്കെ??പിന്നെ തമാശയായിട്ട് പറയും കിട്ടിയ അവസരമല്ലേ?? സെറ്റില്‍ ഭാര്യ ഭര്‍ത്താവ് എന്നൊന്നുമില്ല. ഭാര്യ ആയത് കൊണ്ട് ഒരു കണ്‍സിഡറേഷനും കൊടുക്കാറുമില്ല.

ലിന്റ: ഒരാള്‍ സംവിധായകനായും. ഒരാള്‍ കോസ്റ്റിയൂം ഡിസൈനറുമായാണ് സെറ്റില്‍. ഞാന്‍ ഇതിലേക്ക് വരാന്‍ കാരണം ജീത്തുവാണ്. സിനിമയില്‍ ജീത്തു ആക്ടീവായി കഴിഞ്ഞപ്പോള്‍ ഞാന്‍ വീട്ടില്‍ തനിച്ചായിരിക്കും. മക്കള്‍ വളര്‍ന്നു, അവര്‍ സ്‌കൂളിലൊക്കെ പോയി കഴിഞ്ഞാല്‍ ഞാന്‍ വെറുതേയിരിക്കണം.

അപ്പോഴാണ് ഇങ്ങനെയൊന്നു ചിന്തിച്ചത്. ജീത്തു പറഞ്ഞു, വന്നു നോക്ക്. പറ്റുമെങ്കില്‍ ചെയ്യ്.. പിന്നെ കുറച്ച് പഠിച്ചു. മൈ ബോസില്‍ മംമ്തയുടെ മാത്രം കോസ്റ്റിയൂം ചെയ്തു. അപ്പോഴേക്കും മനസ്സിലായി എനിക്ക് ചെയ്യാന്‍ കഴിയുമെന്ന്. പിന്നെ ജീത്തുവിന്റെ എല്ലാ സിനിമയിലും വര്‍ക്ക് ചെയ്തു.

സെറ്റിലെ അനുഭവം അത്ര സുഖകരമല്ല. സെറ്റില്‍ ഭാര്യ എന്നൊരു സാതന്ത്രൃം ഉള്ളത് കൊണ്ട് കൂടുതല്‍ വഴക്ക് കേള്‍ക്കുന്നുണ്ട്. വേറൊറു ടെക്നീഷ്യന്‍ ആണെങ്കില്‍ ചിലപ്പോ ജീത്തു ഇത്രയും പറയില്ല. പിന്നെ എത്ര പറഞ്ഞാലും കളഞ്ഞിട്ട് പോകില്ലല്ലോ? സെറ്റിലെ വഴക്ക് അവിടെ തീരുന്നത് കൊണ്ട് വീട്ടില്‍ വന്ന് അതിന്റെ ബാക്കി രണ്ടു പേരും പറയില്ല.

ദൃശ്യം പോലെയുള്ള സിനിമകള്‍ പ്രേക്ഷകര്‍ ഇപ്പോഴും പ്രതീക്ഷിക്കുന്നുണ്ട് ?


സ്വാഭാവികം. ഒരു സംവിധായകന്‍ ഒരു ചിത്രം ചെയ്തു. അടുത്ത സിനിമ ആദ്യ സിനിമയെക്കാള്‍ കൂടുതല്‍ നന്നാക്കുമെന്നാണ് എല്ലാവരും വിശ്വസിക്കുന്നത്. എന്നാല്‍ അത് പ്രായോഗികമല്ല.

ദൃശ്യം പോലൊരു സിനിമ ചെയ്യാന്‍ പറ്റുമോ എന്നറിയില്ല. പ്രേക്ഷകരുടെ പ്രതീക്ഷകള്‍ ബ്രേക്ക്‌ചെയ്യണം. ഞാന്‍ ഒരു കാര്യം മാത്രമാണ് ശ്രദ്ധിക്കുന്നത്, ഒരു പരീക്ഷണവും പണംമുടക്കുന്നയാള്‍ക്ക് നഷ്ടം ഉണ്ടാക്കരുത്.

ഊഴത്തില്‍ നല്ലൊരു സസ്‌പെന്‍സ് ഉണ്ടാക്കാമായിരുന്നു. അതും ഞാന്‍ തീരുമാനിച്ചു, വേണ്ട, സിംപിള്‍ മതി. പിന്നെ വേറിട്ടൊരു രീതിയില്‍ കഥ അവതരിപ്പിച്ചു. എന്റെ സിനിമ കാണാന്‍ വന്ന പ്രേക്ഷകരോട് അത് എന്താണെന്ന് പറഞ്ഞാണ് സിനിമ കാണിക്കുന്നത്.

ത്രില്ലര്‍ ആണെങ്കില്‍ അത് തുറന്നുപറയും. ലൈഫ് ഓഫ് ജോസ്‌കുട്ടി കഴിഞ്ഞപ്പോള്‍ ഒരു പയ്യന്‍ എന്നോട് പറഞ്ഞു, ഇത്തരം പടം ഇനി ചെയ്യണ്ട..ഞാന്‍ പറഞ്ഞു. ത്രില്ലര്‍ അല്ലെങ്കില്‍ മോന്‍ ആ സിനിമ കാണണ്ട. വന്നു കണ്ടിട്ട് വിഷമം വരുത്തുന്നത് എന്തിനാ? അത് മാത്രമല്ല കാശും കളയണ്ട.

ക്രിസ്മസ് ഓര്‍മകള്‍..?


ചെറുപ്പത്തിലെ ക്രിസ്മസ് എന്നു പറഞ്ഞാല്‍ പ്രധാന പരിപാടി പള്ളിയിലെ കരോളാണ്. അന്നൊക്കെ പള്ളിയില്‍നിന്നു മാത്രമേ കരോള്‍ ഇറങ്ങൂ. പിന്നെ അന്നും അവിടെ ക്ലബ് ഉണ്ടായിരുന്നു. അങ്ങനെ കാരള്‍ ഇറങ്ങും ചില വീട്ടില്‍ ചെന്നാല്‍ വാതില്‍ തുറക്കില്ല.

കുറേ വിളിച്ചിട്ടും കൊട്ടീട്ടും തുറന്നില്ലെങ്കില്‍ തിരിച്ചുപോരും..അപ്പോഴേ പറഞ്ഞില്ലേ പോകണ്ടാന്ന്..പാട്ടുംപാടിയായിരിക്കും തിരിച്ചുപോരുന്നത്. ഇപ്പോള്‍ 10 പിള്ളേരു കൂടി കാരള്‍ ഇറങ്ങും. പിരിവും. ഇവിടെ ആകെ ഒരു പള്ളിയേയുള്ളൂ. എന്നിട്ടും ഇവിടെ അഞ്ചാറ് കാരള്‍ വന്നു.

ഇത്തവണ ക്രിസ്മസിനും എല്ലാവരും വരും. അമ്മച്ചി ഇവിടെ ആയതുകൊണ്ട് ഇപ്പോ ഇതാണ് തറവാട്. പണ്ട് നാട്ടിലായിരുന്നു. കഴിഞ്ഞ ഓണത്തിന് എല്ലാവരും കൂടിയാണ് സദ്യയുണ്ടാക്കിയത്. 18 കറികള്‍ ഇല്ല.

അഞ്ചെണ്ണമേ ഉണ്ടായിരുന്നൂവെങ്കിലും എല്ലാരും കൂടിയാണുണ്ടാക്കിയത്. കുക്കിംഗില്‍ എനിക്ക് ഒട്ടും താല്‍പ്പര്യമില്ല. എന്നിട്ടും ഞാനും കറികള്‍ക്ക് അരിയാനും എല്ലാം കൂടുകയും ചെയ്തു.

ലിന്റ: കുട്ടിക്കാലത്തെ ക്രിസ്മസ് ആഘോഷങ്ങളാണ് മനസ്സിലുള്ളത്. രാത്രി പള്ളിയില്‍ പോകുക, പുല്‍കൂട് ഉണ്ടാക്കുക കരോള്‍ ഇതൊക്കെയായിരുന്നു ക്രിസ്മസിന്റെ പരിപാടികള്‍. എല്ലാം ക്രിയേറ്റീവായിട്ടായിരുന്നു ചെയ്തിരുന്നത്.

കുടുംബത്തിലെല്ലാവരും കൂടിയാണ് പുല്‍കൂട് ഉണ്ടാക്കുന്നത്. എന്നാല്‍ ഇന്ന് റെഡിമെയ്ഡ് ആണ്. ക്രിസ്മസ് ആയാല്‍ ഒരു ട്രീ വെച്ചു, സ്റ്റാര്‍ തൂക്കി, ഇത്രമാത്രമാണ് ഇന്നത്തെ ആഘോഷങ്ങള്‍. ഇന്ന് പള്ളിയില്‍ നിന്ന് മാത്രമല്ലല്ലോ കാരള്‍. എല്ലാവരും ഇറങ്ങും.

അങ്ങനെ അതിന്റെ പ്രാധാന്യവും നഷ്ടപ്പെട്ടു. രാത്രി പള്ളിയില്‍ പോകാന്‍ പോലും ഇപ്പോഴത്തെ കുട്ടികള്‍ക്ക് താല്‍പര്യമില്ല. ഇന്ന് ക്രിസ്മസ് ആയതിന്റെ തോന്നല്‍ പോലുമില്ല. പത്രത്തിലും ടിവിയിലും ക്രിസ്മസ് എന്നു കേക്കുമ്പോള്‍ ആണ് ഓര്‍ക്കുന്നത്.

സാമൂഹിക വിഷയങ്ങളിലെ താരങ്ങളുടെ അഭിപ്രായ പ്രകടനങ്ങള്‍ സിനിമയെ ബാധിക്കാനിടയുണ്ടോ ?


അഭിപ്രായം ആരു പറയുന്നുവെന്നതനുസരിച്ചാണത.് എല്ലാവര്‍ക്കും അഭിപ്രായം പറയാനുള്ള അവകാശം ഉണ്ടല്ലോ. ചിലര്‍ തുറന്നു പറയുന്നുവെന്നു മാത്രം. ഒരാളുടെ അഭിപ്രായം ഇത്ര വിഷയം ആക്കേണ്ട ആവശ്യമില്ല. അത് തെറ്റോ ശരിയോ എന്നുപോലും നോക്കേണ്ട ആവശ്യമില്ലല്ലോ. എല്ലാ മാധ്യമങ്ങളും സെന്‍ഷേണലാക്കാനാണു നോക്കുന്നത്.

സാമൂഹിക മാധ്യമങ്ങളുടെ ഇടപെടല്‍ പലപ്പോഴും സിനിമകളെ മോശമായി ബാധിക്കാറില്ലേ ?


100% ശരിയാണ്. പണ്ട് തിയറ്ററില്‍ ഇരുന്ന് കൂവാറുണ്ടായിരുന്നു. ഇന്നത് സോഷ്യല്‍ മീഡിയയിലായെന്നു മാത്രം. തീയില്ലാതെ പുകയുണ്ടാകില്ല എന്ന് പറഞ്ഞപോലെ, 10 പേര്‍ സോഷ്യല്‍ മീഡിയയില്‍ ഒരു സിനിമ കൊള്ളില്ലെന്നു പറഞ്ഞാല്‍ അത് കൊള്ളതായി.

സിനിമ നല്ലതായിരിക്കും. ചില സിനിമ ടി.വിയില്‍ കാണുമ്പോഴാണു നല്ലതായിരുന്നല്ലോ എന്നു തോന്നുന്നത്. ചില അഭിപ്രായങ്ങള്‍ വ്യക്തിഗതമാകാം. വാശിപ്പുറത്തുമാകാം.

ചില സിനിമകളെപ്പറ്റി ഭയങ്കരമായ രീതിയിലാണ് സോഷ്യല്‍ മീഡിയയിലെ ചര്‍ച്ചകള്‍. ചിലപ്പോള്‍ അത് കൊള്ളില്ലായിരിക്കാം. ആ പുകമറയ്ക്കുള്ളിലൂടെ ചിലപ്പോ കടന്നുകൂടും. അങ്ങനെ ചെയ്യുന്ന നിര്‍മാതാവിനെ കുറ്റംപറയാന്‍ പറ്റില്ല. എന്ത് രീതിയിലും സിനിമ ഓടിക്കാന്‍ നിര്‍മാതാവ് നോക്കും.

ഒരു സിനിമ കൊള്ളില്ലന്നു പറയാന്‍ നിങ്ങളാരാ? ആ സിനിമ നിങ്ങള്‍ക്ക് ഇഷ്ടപ്പെട്ടില്ലന്നു പറയു, അത് ഇഷ്ടപ്പെട്ട ഒരുപാട് ആള്‍ക്കാര്‍ വേറെയുണ്ടാകും. സിനിമ ഓരോരുത്തരുടെ കാഴ്ചപാടാണ്.

മമ്മി ആന്റ് മീ യുടെ കഥ വായിച്ചിട്ട് പ്രമുഖനായ ഒരാള്‍ പറഞ്ഞു, ഇതൊന്നും സിനിമയാക്കാന്‍ പറ്റില്ല.. അത് കേട്ട് ഞാന്‍ ചെയ്യാതിരുന്നെങ്കില്‍ എന്റെ ഏറ്റവും വലിയ നഷ്ടമാകുമായിരുന്നു.

ഫെയ്സ്ബുക്ക്, വാട്ട്സ് ആപ്പ് തുടങ്ങിയവ ഉപയോഗിക്കാറുണ്ടോ ?


ഞാന്‍ ഫേയ്‌സ്ബുക്ക് ഉപയോഗിക്കുമായിരുന്നു. ഒരുപാട് നല്ല കാര്യങ്ങള്‍ പഠിക്കാനുള്ള സ്ഥലമായിരുന്നു. എന്നാല്‍ ഇന്ന് അതില്‍ ദുരുപയോഗം മാത്രമാണ്. സംവിധായകന്‍ രഞ്ജിത്തേട്ടന്‍ പറഞ്ഞതിനോട് നൂറു ശതമാനവും യോജിക്കുന്നു, പബ്ലിക് ടോയ്‌ലറ്റിന്റെ ഭിത്തിയില്‍ എഴുതുന്ന വാക്കുകളുടെ നിലവാരം മാത്രമേയുള്ളൂ സോഷ്യല്‍ മീഡിയയിലെ വാക്കുകള്‍ക്കെന്ന്.

കഴിഞ്ഞദിവസം ഒരാള്‍ എന്നോട് പറഞ്ഞു ജിത്തു ഫെയ്‌സ്ബുക്കില്‍ ആക്ടീവ് ആകണം, ഒരാളോട് ഭയങ്കര അസൂയയോ കുശുമ്പോ ഉണ്ടെങ്കില്‍ അത് ഫെയ്‌സ്ബുക്കില്‍ കയറി എഴുതി അങ്ങു തീര്‍ത്താല്‍ മതി.

മനസിന് നല്ല സന്തോഷം കിട്ടും എന്ന്. എനിക്കറിയില്ല, ഇപ്പോ ഫെയ്‌സ്ബുക്ക് ഉപയോഗിക്കാറില്ല. വാട്‌സ്ആപ്പ് ഉണ്ട്. സുഹൃത്തുക്കളുമായുള്ള ചര്‍ച്ചകളൊക്കെ നടത്താറുമുണ്ട്.

സത്യം പറഞ്ഞാല്‍ സോഷ്യല്‍ മീഡിയയില്‍ എഴുതാന്‍ എനിക്ക് പേടിയാണ്. കാരണം, നമ്മള്‍ എഴുതുന്നതിനെ വളച്ചൊടിച്ച് എങ്ങനെ വേണമെങ്കിലും ആക്കും. ഒരിക്കല്‍ കട്ടപ്പനയിലെ ഒരു വിഭാഗത്തെപ്പറ്റി സിനിമയില്‍ പറഞ്ഞതിന് വളരെ മോശമായി പലരും എന്നോട് ഫേയ്‌സ്ബുക്കിലൂടെ പ്രതികരിച്ചു.

ഞാന്‍ ഒരു മറുപടിയും കൊടുത്തില്ല. വിമര്‍ശനം നല്ലതാണ്. ഞാന്‍ മറുപടിയും കൊടുക്കാറുണ്ട്. ദൃശ്യത്തിലെ ഒരു സീനിലെ കാര്യം ഒരു പയ്യന്‍ എന്നോട് പറഞ്ഞു. എന്റെ അശ്രദ്ധകൊണ്ടാണ് ആ പിഴവ്. അത്തരം വിമര്‍ശനങ്ങളെ ഞാന്‍ സ്വീകരിക്കും.

കെ. ആര്‍ ഹരിശങ്കര്‍

Ads by Google
Tuesday 10 Jan 2017 03.33 PM
YOU MAY BE INTERESTED
TRENDING NOW