Wednesday, November 08, 2017 Last Updated 9 Min 27 Sec ago English Edition
Todays E paper
Ads by Google
Wednesday 04 Jan 2017 02.42 PM

തരംഗമായ് തരംഗിണി

യേശുദാസിന്റെ ജീവിത കഥ - പാട്ടിന്റെ പാലാഴി
uploads/news/2017/01/67303/WeeklyyesudasISSU20b.jpg

1987 ലെ ആ മെയ്മാസത്തില്‍, മദ്രാസ് അഭിരാമപുരത്തെ പുതുക്കിപ്പണിത വസതിയുടെ സിറ്റൗട്ടില്‍, നാട്ടില്‍നിന്നെത്തിയ പത്രപ്രവര്‍ത്തകസുഹൃത്തുമായി യേശുദാസ് സംഭാഷണത്തിലേര്‍പ്പെട്ടിരിക്കെ, അകത്തു ടെലഫോണ്‍ മണിമുഴക്കം.

യേശുദാസ് അകത്തുപോയി കോഡ്‌ലസുമായി മടങ്ങിവന്നു. തമിഴില്‍ ആരുമായോ നീണ്ട സംഭാഷണം. പൊട്ടിച്ചിരി, ഓക്കെ പത്തുമണി എന്നു പറഞ്ഞ് അവസാനിപ്പിച്ച്, ഗായകന്‍ സുഹൃത്തിനോടു പറഞ്ഞു.

കമല്‍ഹാസനാണ്. രണ്ടാഴ്ച മുമ്പ് ഡല്‍ഹിയില്‍ ഇക്കൊല്ലത്തെ ദേശീയ സിനിമാ അവാര്‍ഡുകള്‍ സമ്മാനിച്ചല്ലൊ. നമുക്ക് ഉണ്ണികളേ ഒരു കഥപറയാം സിനിമയിലെ ടൈറ്റില്‍ സോങ്ങിന് ബെസ്റ്റ് സിംഗര്‍ അവാര്‍ഡുണ്ടായിരുന്നു. അമേരിക്കയിലായിരുന്നതുകൊണ്ട് എനിക്ക് അവാര്‍ഡ് ഏറ്റുവാങ്ങാന്‍ കഴിഞ്ഞില്ല. കമല്‍, രാഷ്ട്രപതിയില്‍നിന്ന് എനിക്കുവേണ്ടി സ്വീകരിച്ചു. അവാര്‍ഡു നേരിട്ടുതരാന്‍ ഉലകനായകന്‍ വരുന്നു.

വിജ്ഞാന്‍ഭവനില്‍ ഇക്കുറി അവാര്‍ഡ് സമ്മാനിക്കാനെത്തിയത് രാഷ്ട്രപതി ആര്‍. വെങ്കിട്ടരാമന്‍. തമിഴ്‌നാട് സ്വദേശി.ദാസ് വന്നില്ലല്ലൊ, പ്രസിഡന്റ് വേദിയില്‍ പകരക്കാരനായി വന്ന കമല്‍ഹാസനോടു പറഞ്ഞു.

അതുകൊണ്ട് നീങ്കള്‍ ഈ അവാര്‍ഡ് എനിക്കുവേണ്ടി അദ്ദേഹത്തിനു നേരിട്ടു നല്‍കണം. എന്റെ ആശംസകളും അറിയിക്കുക. നായകന്‍ സിനിമയിലെ ഉജ്ജ്വലപ്രകടനത്തിന് അക്കൊല്ലത്തെ മികച്ച നടനുള്ള അവാര്‍ഡ് സ്വീകരിക്കാനെത്തിയതായിരുന്നു കമല്‍. ദാസ് സുഹൃത്തിനോടു പറഞ്ഞു. പത്തു മണിക്കു കമല്‍ എത്തും.

കൃത്യം 9.55 ന്, ഫയര്‍ എന്‍ജിനില്‍നിന്നെപോലെ സൈറന്‍ മുഴക്കിക്കൊണ്ട് ഒരു കാര്‍ വന്നെത്തി. പിന്നാലെ നാലു സുമോ വാനുകള്‍ നിറയെ ആജാനബാഹുക്കളായ ചെറുപ്പക്കാര്‍. അടുത്തതായി ലേറ്റസ്റ്റ് മോഡല്‍ മെഴ്‌സിഡസ് ബെന്‍സ്. വെള്ളിനിറം. അതിനു പിന്നില്‍, നാലു ടെമ്പോ ട്രാവലറുകള്‍. നിറയെ മുദ്രാവാക്യം മുഴക്കുന്ന യുവസേന. ഉലകനായകന്‍ വാഴ്ക, അഴകിയനായകന്‍ വാഴ്ക...

മെര്‍ക്കില്‍നിന്ന്, മുന്‍സീറ്റിലിരുന്ന ഗണ്‍മാന്‍ ഇറങ്ങി പിന്‍വാതില്‍ തുറന്നുപിടിച്ചു. പുരുഷസൗന്ദര്യത്തിന്റെ പ്രതീകമായ കമല്‍ഹാസന്‍, ഹൃദ്യമായ പുഞ്ചിരിയോടെ ഇറങ്ങി. തൊഴുകൈകള്‍. അനന്തരം ഒരു കയ്യുയര്‍ത്തി മുദ്രാവാക്യക്കാരെ നിശ്ശബ്ദരാക്കി. വീണ്ടും വണക്കം പറഞ്ഞു കൈകൂപ്പി, സിറ്റൗട്ടില്‍ ശുഭ്രവസ്ത്രാങ്കിതനായി നില്‍ക്കുന്ന മഹാഗായകനു മുന്നില്‍ തലകുനിച്ച്, കാല്‍ തൊട്ടുവന്ദിച്ച്, സൗക്യമാ എന്നു തിരക്കി.

അഭിരാമപുരത്തെ യേശുദാസ് വസതിയുടെ സ്വീകരണമുറി, രാഷ്ട്രപതിഭവനിലെ അശോകാഹാളായി മാറി. നമ്രശിരസ്‌കനായി നില്‍ക്കുന്ന അവാര്‍ഡ് ജേതാവിന്റെ കഴുത്തില്‍ ഒപ്പം അവാര്‍ഡു നേടിയ നടന്‍ സ്വര്‍ണ്ണപ്പതക്കം കോര്‍ത്ത മാല ചാര്‍ത്തി. പ്രശംസാപത്രത്തിന്റെ ചുരുളും അവാര്‍ഡുതുകയുടെ ചെക്കടങ്ങിയ കവറും സമ്മാനിച്ചു.സംഭവബഹുലമായ വര്‍ഷങ്ങള്‍ ഒന്നൊന്നായി കടന്നുപോയി.

കൊച്ചിന്‍ കലാഭവനുമായുള്ള ബന്ധം അവസാനിപ്പിച്ച യേശുദാസ്, ഗായകരുടെ ഒരു പുത്തന്‍ തലമുറയെ ശാസ്ത്രീയസംഗീതാധിഷ്ഠിതമായി രൂപപ്പെടുത്താനുറച്ച്, തിരുവനന്തപുരം കേന്ദ്രീകരിച്ച് തരംഗനിസരി സ്‌കൂള്‍ ഓഫ് മ്യൂസിക് സ്ഥാപിച്ചു.

കര്‍ണാടക, ഹിന്ദുസ്ഥാനി, പാശ്ചാത്യശാസ്ത്രീയസംഗീതത്തില്‍ ഒട്ടേറെ കുട്ടികള്‍ തരംഗനിസരി വഴി ജന്മസാഫല്യം കണ്ടെത്തി. 1980 ല്‍, തിരുവനന്തപുരത്ത്, വഴുതയ്ക്കാട്ട്, യേശുദാസ് തന്റെ തരംഗിണി സ്റ്റുഡിയോയ്ക്കു രൂപം നല്‍കി.

എല്ലാവിധ ആധുനികശബ്ദാലേഖനസംവിധാനങ്ങളും സജ്ജമാക്കിയ തരംഗിണി, അതിവേഗംതന്നെ മികച്ച മലയാള ലളിത, ചലച്ചിത്ര ഗാനങ്ങളുടെ ഈറ്റില്ലമായി മാറി. നിരവധി സിനിമാഗാനങ്ങള്‍, തരംഗിണിയുടെ തനതുലളിതഗാനകാസറ്റുകള്‍, സി.ഡി.കള്‍ അങ്ങനെ തരംഗിണി കേരളത്തിന്റെ സിനിമാചരിത്രത്തിലെ നാഴികക്കല്ലായി മാറി.

Ads by Google
TRENDING NOW