Thursday, June 20, 2019 Last Updated 2 Min 8 Sec ago English Edition
Todays E paper
Ads by Google
Thursday 20 Jun 2019 01.08 PM

സാംസ്‌കാരിക നായകനെന്ന അധിക്ഷേപം സഹിക്കാനാകില്ല: ബാലചന്ദ്രന്‍ ചുള്ളിക്കാട്

social activist

തിരുവനന്തപുരം: സാംസ്‌കാരിക നായകന്‍ എന്ന് തന്നെ വിളിക്കരുതെന്ന അപേക്ഷയുമായി കവി ബാലചന്ദ്രന്‍ ചുള്ളിക്കാട്. മലയാളികളുടെ എല്ലാത്തരം അവഹേളനങ്ങളും അസഭ്യ വര്‍ഷങ്ങളും ഇത്രയും കാലം താന്‍ നിശബ്ദം സഹിച്ചിട്ടുണ്ടെന്നും എന്നാല്‍ ഈ വിളി സഹിക്കാനാകില്ലെന്നും സുഹൃത്തുക്കള്‍ക്കയച്ച സന്ദേശത്തില്‍ അദ്ദേഹം പറയുന്നു.

സന്ദേശത്തിന്റെ പൂര്‍ണരൂപം:

'ഈയിടെ ചില മാധ്യമങ്ങള്‍ എന്നെ 'സാംസ്‌കാരിക നായകന്‍' എന്നു വിശേഷിപ്പിച്ചുകണ്ടു. മലയാളികളുടെ എല്ലാത്തരം അവഹേളനങ്ങളും അസഭ്യങ്ങളും ഞാന്‍ നിശബ്ദം സഹിച്ചുപോന്നിട്ടുണ്ട്. പക്ഷേ ഈ വിശേഷണം സഹിക്കാനാവുന്നില്ല. ഞാന്‍ ഒരുതരത്തിലും മലയാളികളുടെ സാംസ്‌കാരിക നായകനല്ല. ജാതിബോധത്തിനും മതവിശ്വാസത്തിനും സമുദായബലത്തിനും സാമ്പത്തികശക്തിക്കും അധികാരത്തിനും പരമപ്രാധാന്യം നല്‍കുന്ന മലയാളികളുടെ സാംസ്‌കാരിക നായകനാവാന്‍ ആവശ്യമായ യാതൊരു യോഗ്യതയും എനിക്കില്ല. എഴുത്തുകാരന്‍ എന്ന നിലയിലാണെങ്കില്‍ യാതൊരുവിധ അവാര്‍ഡുകളോ ബഹുമതികളോ സ്ഥാനമാനങ്ങളോ ഇന്നേവരെ എനിക്കില്ല. ഇനി ഒരിക്കലും ഉണ്ടാവുകയുമില്ല. എന്റെ സമാനഹൃദയരായ ചില വായനക്കാരുടെ കവി എന്നതിനപ്പുറം ഞാന്‍ മലയാളികളുടെ സര്‍വ്വസമ്മതനായ കവിയുമല്ല. ഒരു പ്രസംഗകനോ പ്രഭാഷകനോ ആയി അറിയപ്പെടാന്‍ ഞാന്‍ ഒരുതരത്തിലും ആഗ്രഹിക്കുന്നില്ല. സുഹൃത്തുക്കളുടെ കഠിനമായ നിര്‍ബ്ബന്ധം മൂലം മാത്രമാണ് വല്ലപ്പോഴും പ്രസംഗിക്കേണ്ടിവരുന്നത്. ഞാന്‍ മലയാളികളുടെ പ്രസംഗകനോ പ്രഭാഷകനോ ഒന്നുമല്ല. ഒരിക്കല്‍ക്കൂടി പറയട്ടെ, മലയാളികളെ പ്രതിനിധീകരിക്കാനോ അവരുടെ സംസ്‌കാരത്തെ നയിക്കാനോ ആവശ്യമായ യാതൊരുവിധ യോഗ്യതയും എനിക്കില്ല. അതിനാല്‍ എന്നെ 'സാംസ്‌കാരിക നായകന്‍' എന്നുവിളിക്കരുതേ എന്നു എല്ലാവരോടും താഴ്മയായി അപേക്ഷിക്കുന്നു.'

1970 കളില്‍ ഇളകി മറിഞ്ഞ കേരളത്തിലെ സാംസ്‌കാരിക അന്തരീക്ഷത്തില്‍ ബാലചന്ദ്രന്റെ കവിതകള്‍ സൃഷ്ടിച്ച ഇടിമുഴക്കം ഇന്നും നിലയ്ക്കാതെ തുടരുകയാണ്. കവിയെന്ന നിലയില്‍ വളരെ ചെറുപ്പത്തില്‍ തന്നെ കവികുലപതികളുടെ നിരയ്‌ക്കൊപ്പം ഉയര്‍ന്ന ബാലചന്ദ്രന്‍ ‘അരവിന്ദന്റെ പോക്കുവെയില്‍’ എന്ന പ്രശസ്ത ചലച്ചിത്രത്തില്‍ നായകനായി. വീക്ഷണം പത്രത്തില്‍ മാധ്യമ പ്രവര്‍ത്തകനായിരുന്നു. അവിടെ നിന്നും സര്‍ക്കാര്‍ ഉദ്യോഗസ്ഥനായി വിരമിച്ചു. വീണ്ടും സിനിമ, സീരിയല്‍ മേഖലയില്‍ അഭിനയ രംഗത്തേയ്ക്ക് അദ്ദേഹം കടന്നു. ഇതിനിടയില്‍ ബുദ്ധമതം സ്വീകരിച്ചു.

ഇംഗ്ലീഷ്, ഫ്രഞ്ച്, സ്പാനിഷ്, സ്വീഡിഷ് എന്നീ ഭാഷകള്‍ക്കു പുറമെ, ഹിന്ദി, ബംഗാളി, മറാത്തി, അസാമീസ്, പഞ്ചാബി, കന്നട, തമിഴ് എന്നീ ഇന്ത്യന്‍ ഭാഷകളിലും അദ്ദേഹത്തിന്റെ കവിതകള്‍ വിവര്‍ത്തനം ചെയ്തിട്ടുണ്ട്. ഇന്ത്യന്‍? കവിതയെ പ്രതിനിധീകരിച്ച് 1997ല്‍ സ്വീഡനിലെ ഗോട്ടന്‍ബര്‍ഗ് രാജ്യാന്തര സമ്മേളനത്തില്‍ പങ്കെടുത്തു.

Ads by Google
Thursday 20 Jun 2019 01.08 PM
YOU MAY BE INTERESTED
Ads by Google
Loading...
TRENDING NOW