Monday, May 20, 2019 Last Updated 0 Min 35 Sec ago English Edition
Todays E paper
Ads by Google
Saturday 11 May 2019 01.07 AM

യാത്രയായത്‌ കഥകളുടെ കച്ചവടക്കാരന്‍

uploads/news/2019/05/307305/4.jpg

നാഗര്‍കോവിലിലെ തേങ്ങാപ്പട്ടണത്തുനിന്നും തിരുവനന്തപുരത്തെ ചാല മാര്‍ക്കറ്റില്‍ മുളകു ചാക്കുകളുമായി എത്തുന്ന ഒരു കച്ചവടക്കാരന്‍. അവിടെനിന്നും കഥാലോകത്തേക്കുള്ള തോപ്പില്‍ മുഹമ്മദ്‌ മീരാന്റെ യാത്ര സ്വപ്‌നസമാനമായ കഥയ്‌ക്കു തുല്യമാണ്‌. കടലോരഗ്രാമത്തിലെ സാധാരണക്കാര്‍ക്ക്‌ ചരിത്രകഥകള്‍ പറഞ്ഞു കൊടുത്തായിരുന്നു തുടക്കം. പിന്നീട്‌ രാജ്യമെമ്പാടും ശ്രദ്ധിക്കുന്ന രചനാശൈലിയിലേക്കു വഴിമാറി.
തമിഴ്‌ സാഹിത്യത്തില്‍ ദ്രാവിഡ പാരമ്പര്യത്തില്‍ വേരൂന്നിയ രചനകളായിരുന്നു അണ്ണാദുരൈയുടെയും കലൈജ്‌ഞരുടെയും. തങ്കത്തമിഴില്‍ അവര്‍ മണ്ണിന്റെ മക്കളുടെ കഥ പറഞ്ഞപ്പോള്‍ അതിന്റെ തുടര്‍ച്ചയെന്നോണം കടലോരത്തെ പാവപ്പെട്ട ഇസ്ലാം ജീവിതത്തെ തന്റെ രചനകളിലൂടെ വരച്ചുകാട്ടുകയായിരുന്നു മുഹമ്മദ്‌ മീരാന്‍. അസാധ്യമായ ഭാവനയില്‍ ജനിമൃതികളുടെ അഗാധസമുദ്ര ഗര്‍ത്തങ്ങളില്‍ നിന്നു പിറവികൊണ്ടതൊന്നുമല്ല തന്റെ കഥകളെന്ന്‌ ഒരിക്കല്‍ മീരാന്‍ പറഞ്ഞു. അദ്ദേഹത്തിന്റെ ഭാഷയില്‍ അവയെല്ലാം കടല്‍ത്തീരത്തെ സാധാരണക്കാരുടെ കഥകളായിരുന്നു...
കച്ചവടക്കാരന്റെ ശരീരഭാഷയും ജ്‌ഞാനിയുടെ മനസുമായിരുന്നു മീരാന്‌. കിഴക്കന്‍ കടല്‍ത്തീരത്തെ മഖ്‌ബാരി എന്നു വിളിച്ച പോര്‍ച്ചുഗീസുകാരുടെ ആജന്മ ശത്രുവായിരുന്ന കുഞ്ഞാലിമാരുടെ തായ്‌വേര്‌ തമിഴ്‌നാട്ടിലെ കിഴക്കന്‍ കടലോരമാണന്നു മീരാന്‍ പറഞ്ഞപ്പോള്‍ ചരിത്രാന്വേഷികള്‍ മുഖം തിരിച്ചതാണ്‌. മലബാറിലേക്കു പലായനം ചെയ്‌തതാണു കുഞ്ഞാലിയും കുടുംബവുമെന്നും അതുകൊണ്ടാണു മാപ്പിളപ്പാട്ടുകള്‍ക്കും പടപ്പാട്ടുകള്‍ക്കും തമിഴ്‌ മൊഴികള്‍ ഉണ്ടാകാനുള്ള കാരണമെന്നും അദ്ദേഹം കൂട്ടിച്ചേര്‍ത്തപ്പോള്‍ അവരുടെ മുഖം കുനിഞ്ഞതു മറ്റൊരു ചരിത്രം. ചരിത്രത്തില്‍ അത്രയേറെ അറിവായിരുന്നു തേങ്ങാപ്പട്ടണത്തെ ആ മുളകു കച്ചവടക്കാരന്‌.
മീരാന്റെ "ഒരു കടലോരഗ്രാമത്തിന്‍ കഥൈ" എന്ന നോവല്‍ ആദ്യമായി പ്രസിദ്ധീകരിച്ചത്‌ "മുസ്ലിം മുരശ്‌" എന്ന ഇസ്ലാമിക പ്രസിദ്ധീകരണത്തിലാണ്‌. യാഥാസ്‌ഥികതയെ ചോദ്യംചെയ്യുന്ന നോവല്‍ എങ്ങനെ അത്തരമൊരു പ്രസിദ്ധീകരണത്തില്‍ സ്വീകരിക്കപ്പെട്ടെന്ന്‌ പിന്നീടൊരിക്കല്‍ ചോദ്യമുയര്‍ന്നപ്പോള്‍ "അവര്‍ കഥ ചോദിച്ചു, ഞാന്‍ കൊടുത്തു. അത്ര തന്നെ..."- അതായിരുന്നു അദ്ദേഹത്തിന്റെ മറുപടി. ഒരേസമയം കാരശ്ശേരി മാഷിനോടും, കാന്തപുരം മുസലിയാരോടും സൗഹൃദമുണ്ടായിരുന്നു മീരാന്‌. നാനാത്വത്തില്‍ ഏകത്വം..- അതാണ്‌ ഈ സൗഹൃദങ്ങളെന്ന്‌ അദ്ദേഹം വിളിച്ചുപറഞ്ഞിരുന്നു.
മികച്ച വായനക്കാരന്‍ മികച്ച എഴുത്തുകാരനായതിന്റെ പരിണാമകഥയാണ്‌ മീരാന്റേത്‌. വൈക്കം മുഹമ്മദ്‌ ബഷീര്‍, കേശവദേവ്‌ തകഴി എന്നിവരുടെ സ്വാധീനത്താലാണ്‌ മീരാന്‍ എഴുത്തിലേക്കു കടക്കുന്നത്‌. മലയാളത്തിലെഴുതിയത്‌ തമിഴില്‍ പരിഭാഷപ്പെടുത്തുന്നതായിരുന്നു രചനാരീതി. മുസ്ലീം സമുദായത്തിന്‌ ആധുനിക ജീവിതത്തിലേക്കു വരാനുള്ള തടസങ്ങളും അതു മറികടക്കുന്നതിനുള്ള മാര്‍ഗങ്ങളുമായിരുന്നു അദ്ദേഹത്തിന്റെ കൃതികളില്‍ മുഖ്യ പ്രതിപാദ്യം. മുസ്ലീം സ്‌ത്രീകഥാപാത്രങ്ങളും ശ്രദ്ധേയമായി.
"തുറൈമുഖം" എന്ന നോവലില്‍ സിലോണിലേക്കു ചമ്പ (ഒരുതരം ഉണക്ക മത്സ്യം) കയറ്റുമതി ചെയ്യുന്ന മനുഷ്യരുടെ ജീവിതം അദ്ദേഹം ചിത്രീകരിക്കുന്നുണ്ട്‌. ഇടനിലക്കാരുടെ വഞ്ചന കാരണം ദാരിദ്ര്യത്തിലേക്കു കൂപ്പുകുത്തിയ അത്തരമൊരു കുടുംബമായിരുന്നു മീരാന്റേതും. വാപ്പ അബ്‌ദുല്‍ ഖാദറിന്റെ ജീവിതത്തിന്റെ പുനരാവിഷ്‌കാരമായിരുന്നു ആ നോവലിന്റെയും ഇതിവൃത്തം.
ജീവിതവുമായി അത്രമേല്‍ ഇഴചേര്‍ന്നായിരുന്നു മീരാന്റെ ഓരോ രചനകളും. അതുകൊണ്ടുതന്നൊണ്‌ ആ കൃതികളും മീരാനും ഇത്രയേറെ ഓര്‍ക്കപ്പെടുന്നതും.

സി.എസ്‌. സിദ്ധാര്‍ത്ഥന്‍

Ads by Google
Saturday 11 May 2019 01.07 AM
YOU MAY BE INTERESTED
Ads by Google
Loading...
TRENDING NOW