Friday, June 21, 2019 Last Updated 4 Min 9 Sec ago English Edition
Todays E paper
Ads by Google
ശില്‍പ്പ പ്രശാന്ത്‌
Friday 08 Mar 2019 08.54 AM

നീനൂ... നിനക്ക് കരുത്തായി ഈ വനിതാ ദിനം

ഇന്ന് അവള്‍ കെവിന്റെ പിതാവ് ജോസഫിന്റെ പൊന്നുമകളായി ജീവിക്കുകയാണ്... കൃപയ്ക്ക് സഹോദരിയായി... കെവിന്റെ അമ്മയ്ക്ക് മകളായി...

uploads/news/2019/03/293017/neenu-main.jpg

മാര്‍ച്ച് എട്ട്...

'സ്ത്രീ....
ബാല്യത്തില്‍ പിതാവിനാലും, യൗവനത്തില്‍ ഭര്‍ത്താവിനാലും വാര്‍ദ്ധക്യത്തില്‍ മകനാലും സംരക്ഷിക്കപ്പെടേണ്ടവള്‍' എന്ന മനുസ്മൃതിയുടെ വേലിക്കെട്ടുകള്‍ ഭേദിച്ച് പലയിടത്തും സ്ത്രീകള്‍ കുതിപ്പ് തുടരുകയാണ്...

ലോകം വനിതാ ദിനം ആഘോഷിക്കുമ്പോള്‍ ഓര്‍ക്കുക, പലതരത്തിലുള്ള അവകാശങ്ങള്‍ നേടിയെടുക്കാനായി വനിതകള്‍ നടത്തിയ പോരാട്ടങ്ങള്‍ ഈ ഒരു ദിവസത്തില്‍ ഒതുങ്ങുന്നതല്ല. ഈ പോരാട്ടത്തില്‍ അവള്‍ക്കുണ്ടാകുന്ന നഷ്ടങ്ങള്‍ പലപ്പോഴും ഭീകരവുമാണ്... ഇത്തരം ഭീകരതകളില്‍ പതറാതെ കരുത്തോടെ മുന്നേറുന്ന സ്ത്രീ രത്‌നങ്ങള്‍ക്കായി ഈ ദിനം സമര്‍പ്പിക്കുന്നു...

2018 മേയ് 27, നീനു എന്ന പെണ്‍കുട്ടിയുടെ ജീവിതത്തില്‍ കരിനിഴല്‍ വീണ ദിവസം... പ്രത്യാശയുടെ മെഴുകുതിരി നാളങ്ങള്‍ അവള്‍ ആഗ്രഹിച്ച ജീവിതത്തിലേയ്ക്ക് നീട്ടിയ വെളിച്ചം ഒരൊറ്റ നിമിഷം കൊണ്ട് അവളുടെ ഉറ്റവര്‍ തന്നെ ഊതിക്കെടുത്തുകയും അവളെ കൂറ്റാകൂരിരുട്ടിലേയ്ക്ക് തള്ളിവിടുകയും ചെയ്ത ദിവസം.

നീനു.... കേരളത്തിലെ ഞെട്ടിക്കുന്ന ദുരഭിമാനക്കൊലയുടെ ഇര...

ഇഷ്ടപ്പെട്ടവനുമായി ജിവിതം പങ്കുവെക്കാന്‍ ഉറ്റവര്‍ ചൂണ്ടിക്കാട്ടിയ ജാതിയുടെ എതിര്‍പ്പുകള്‍ മറികടന്ന് മുന്നോട്ടിറങ്ങിയപ്പോള്‍ അവള്‍ ഒരിക്കലും കരുതിയിരുന്നില്ല അത് തന്റെ പാതിയുടെ പ്രാണനെടുക്കിന്നിടം വരെ എത്തുമെന്ന്... അങ്ങേയറ്റം വന്നാല്‍ ഒരു പോലീസ് കേസ്, അതുമല്ലെങ്കില്‍ ഭീഷണിയും ഉന്തും തള്ളും... അതിനപ്പുറത്തേയ്ക്ക് അവള്‍ പ്രതീക്ഷിരുന്നില്ല...

ഈ എതിര്‍പ്പുകളൊക്കെ ഒരു കുഞ്ഞുണ്ടാകുമ്പോള്‍ മാറുമെന്നും കാര്യങ്ങളൊക്കെ ശരിയായി വരുമെന്നും അവരും സ്വപ്നം കണ്ടിരുന്നു... മറ്റേത് പെണ്‍കുട്ടിയയേയും പോലെ മനസിന് കരുത്തേകാനുള്ള സ്വപ്നങ്ങള്‍ അവളും കണ്ടു... അങ്ങനെ, മേയ് 24 ന് കുമാരനല്ലൂര്‍ പ്ലാത്തറയില്‍ കെവിനും (26) കൊല്ലം തെന്മല ഷാനു ഭവനില്‍ നീനുവും(20) വിവാഹ ഉടമ്പടില്‍ ഒപ്പുവെച്ചു.

കോട്ടയം അമലഗിരി ബി.കെ കോളജില്‍ ബി.എസ്.സി ജിയോളജി വിദ്യാര്‍ത്ഥിനിയായ നീനു പരീക്ഷാ വിവരം അറിയാനായാണ് 24 ന് കോട്ടയത്ത് എത്തിയത്. അന്ന് വൈകിട്ട് ഏഴരയോടെ താനും കെവിനും വിവാഹിതരായെന്ന വിവരം നീനും തന്റെ വീട്ടുകാരെ വിളിച്ച് അറിയിച്ചു. വീട്ടുകാര്‍ തിരികെ വിളിച്ചുവെങ്കിലും ഫോണ്‍ എടുത്തില്ല.

പിറ്റേന്ന് നീനുവിന്റെ ബന്ധുക്കള്‍ ഗാന്ധിനഗര്‍ പോലീസിനെ വിവരം അറിയിച്ചു. നീനുവിനെയും കെവിനെയും പോലീസ് സ്‌റ്റേഷനിലേയ്ക്ക് വിളിച്ചു വരുത്തി. നിയമപരമായി വിവാഹം ചെയ്തതിന്റെ രേഖകളുമായാണ് ഇരുവരും എത്തിയത്. കെവിനൊപ്പം താമസിക്കാനാണ് താത്പര്യമെന്ന് നീനു അറിയിച്ചിട്ടും വീട്ടുകാര്‍ക്കൊപ്പം തിരികെ പോകാന്‍ പോലീസ് നിര്‍ബന്ധിച്ചു. എന്നാല്‍ വാശിപിടിച്ച് നീനു കെവിനൊപ്പം പോയി.

ഇത്തരത്തിലുള്ള നീക്കങ്ങളും എതിര്‍പ്പുമൊക്കെ നീനുവും കെവിനും മുന്‍കൂട്ടി കണ്ടിരുന്നു. അതുകൊണ്ടു തന്നെ ഇരുവരും പിടിച്ചു നിന്നു. തുടര്‍ന്ന് നീനുവിനെ മെഡിക്കല്‍ കോളജിന് സമീപത്തെ ഹോസ്റ്റലില്‍ എത്തിച്ച ശേഷം കെവിന്‍ ബന്ധുവായ അനീഷിന്റെ വീട്ടിലേയ്ക്ക് പോയി.

അവിടെ എല്ലാം അവസാനിച്ചുവെന്ന് കരുതിയിരുന്ന നീനുവും കെവിനും സ്വപ്നങ്ങള്‍ കണ്ട് ഉറങ്ങാന്‍ കിടന്നു. എന്നാല്‍, തികച്ചും ക്രൂരമായ നീക്കങ്ങളായിരുന്നു പിന്നീട് ഉണ്ടായത്. പിറ്റേന്ന് പുലര്‍ച്ചെ മൂന്നു കാറുകളിലായി എത്തിയവര്‍ അനീഷിന്റെ വീടിന്റെ അടുക്കള വാതില്‍ തകര്‍ത്ത് ഭീകരാന്തരീക്ഷം സൃഷ്ടിച്ച ശേഷം കെവിനെയും അനീഷിനെയും തട്ടിക്കൊണ്ടു പോയി. പാതിവഴിയില്‍ അനീഷിനെ വാഹനത്തില്‍ നിന്നും ഇറക്കിവിട്ടു. തുടര്‍ന്ന് കെവിനുമായി മുന്നോട്ട്... രജിസ്റ്റര്‍ വിവാഹം കഴിഞ്ഞ ആശ്വാസത്തില്‍ രാവിലെ കെവിനെ കാണാമെന്ന സന്തോഷത്തിലിരുന്ന നീനു ഇതൊന്നും അറിയുന്നുണ്ടായിരുന്നില്ല. പിന്നീട് നടന്നതൊക്കെ അതിക്രൂരമായ സംഭവവികാസങ്ങളായിരുന്നു. ഒടുക്കം ഒന്നിച്ച് ജീവിച്ചു തുടങ്ങാന്‍ പോലും കഴിയാതെപോയ തന്റെ പാതിയുടെ ചേതനയറ്റ ശരീരത്തില്‍ പുണര്‍ന്ന് നിലവിളിച്ച അവള്‍ ഇന്ന് പതറാറെ മുന്നേറുകയാണ്... തന്റെ പ്രാണനെ ഇല്ലാതാക്കിയവര്‍ക്ക് അര്‍ഹിക്കുന്ന ശിക്ഷ നേടിക്കൊടുക്കണമെന്ന പകയോടെ... മകനെ തന്നെ ബന്ധുക്കള്‍ ഇല്ലാതാക്കിയതാണെന്ന സത്യം തിരിച്ചറിഞ്ഞിട്ടും തന്നെ നെഞ്ചോടു ചേര്‍ത്ത് കൊണ്ടു നടക്കുന്ന കെവിന്റെ മാതാപിതാക്കള്‍ക്ക് സംരക്ഷകയാകണമെന്ന ദൃഢനിശ്ചയത്തോടെ...

ജാതിയുടെ വേലിക്കെട്ടുകള്‍ ചാടി പ്രണയിച്ചവനെ ഇടയ്ക്കുവെച്ച് തഴയാതെ അവന് കരുത്തേകാന്‍ ഇറങ്ങിത്തിരിച്ച നിനക്കൊപ്പം എന്നുമുണ്ടാകും ഈ സമൂഹം...

uploads/news/2019/03/293017/neenu.jpg

അതേ... ഇന്ന് അവള്‍ കെവിന്റെ പിതാവ് ജോസഫിന്റെ പൊന്നുമകളായി ജീവിക്കുകയാണ്... കൃപയ്ക്ക് സഹോദരിയായി... കെവിന്റെ അമ്മയ്ക്ക് മകളായി...

കോട്ടയം അമലഗിരി ബി.കെ കോളജില്‍ ബി.എസ്.സി ജിയോളജി മൂന്നാം വര്‍ഷ വിദ്യാര്‍ത്ഥിനിയാണ് നീനു. കൂട്ടുകാരുടെയും അധ്യാപകരുടെയും പിന്തുണകൊണ്ട് കെവിന്‍ മരിച്ച് 17-ാം ദിവസം മുതല്‍ നീനു വീണ്ടും കലാലയ മുറ്റത്തേയ്ക്ക് കാലുവെച്ചു. കൃപ നല്‍കിയ ചുരിദാര്‍ അണിഞ്ഞ് അമ്മ നീട്ടിയ പൊതിച്ചോറുമായി പിതാവ് ജോസഫിനൊപ്പം ബൈക്കിലാണ് നീനു കോളജിലേയ്ക്ക് എത്തിയത്.

പിതാവിന്റെ സ്ഥാനത്തു നിന്ന് ജോസഫ് തന്നെ കോളജ് അധികൃതരുമായി സംസാരിച്ചു. നീനുവിന്റെ വിദ്യാഭ്യാസത്തിനാണ് ഇനി പ്രാധാന്യമെന്ന് ജോസഫും പറയുന്നു. കെവിന്‍ ചേട്ടന്റെ സ്വപ്നം പൂര്‍ത്തിയാക്കാന്‍ നന്നായി പഠിച്ച് ജോലി നേടി കുടുംബത്തെ നോക്കുമെന്ന് നീനുവും..

വീടു നിര്‍മ്മിക്കാന്‍ സര്‍ക്കാര്‍ പണം നല്‍കുമെന്ന് അറിയിച്ചതില്‍ സന്തോഷമുണ്ടെന്ന് ജോസഫ്. 16 വര്‍ഷമായി വാടക വീട്ടിലാണ് താമസം. ആറു ലക്ഷം സ്ഥലം വാങ്ങാനും നാലു ലക്ഷം വീടു വയ്ക്കാനും. നീനുവിന്റെ തുടര്‍ പഠനം സര്‍ക്കാര്‍ ഏറ്റെടുത്തിട്ടുണ്ട്. കെവിന് പകരം നീനുവാണ് ഇനി ജോസഫിന് ആശ്വാസം.

Ads by Google
Ads by Google
Loading...
LATEST NEWS
TRENDING NOW