എന്റെ ജീവിതത്തില്‍ മാറ്റം വരുത്താന്‍ ഉദ്ദേശിക്കുന്നില്ല- ഐശ്വര്യ ലക്ഷ്മി തുറന്നുപറയുന്നു

എം. ബി. ബി. എസ്. പഠനം കഴിഞ്ഞ് ഹൗസ് സര്‍ജന്‍സിക്കിടെയാണ് ഡോക്ടറെ ആക്ടറാകാന്‍ സിനിമ വിളിച്ചത്. ഞണ്ടുകളുടെ നാട്ടില്‍ ഒരിടവേള എന്ന ചിത്രത്തിലൂടെ സിനിമയിലെത്തിയ ഐശ്വര്യ ലക്ഷ്മി മായാനദിയിലൂടെ മലയാളികളുടെ ഹൃദയം കവര്‍ന്നു.

ഒടുവില്‍ വരത്തന്‍ കൂടി റിലീസായതോടെ മലയാളികളൊന്നടങ്കം ഇപ്പോള്‍ ഈ യുവനടിയുടെ പിന്നാലെയാണ്. മലയാളത്തിലെ മുന്‍നിര നടന്‍മാര്‍ക്കൊപ്പമെല്ലാം പ്രോജക്ടുകള്‍ കമ്മിറ്റ് ചെയ്തു കഴിഞ്ഞ ഐശ്വര്യ തമിഴില്‍ വിശാലിനൊപ്പം അരങ്ങേറ്റം കുറിക്കാനൊരുങ്ങുകയാണ്.

കുറച്ചു കാലത്തിനുള്ളില്‍ തന്നെ മികച്ച സംവിധായകരുടെയും അഭിനേതാക്കളുടെയും ഒപ്പം വര്‍ക്ക് ചെയ്യാന്‍ പറ്റിയത് വലിയ ഭാഗ്യമായി കരുതുന്നു. ഇക്കാലയളവില്‍ ഒരു നടിയെന്ന നിലയില്‍ മെച്ചപ്പെടാന്‍ കഴിഞ്ഞു എന്ന വിശ്വാസമുണ്ട്. വരത്തനെ പ്രേക്ഷകര്‍ ഏറ്റെടുത്തതില്‍ ഒരുപാട് സന്തോഷം.

സിനിമയോട് ഇഷ്ടം

മോഡലിംഗ് ചെയ്തിരുന്നത് കാരണം സിനിമയോട് മുന്‍പേ ഇഷ്ടമായിരുന്നു. നിവിന്‍ പോളി ചിത്രത്തിലേക്ക് നായികയേയും സഹോദരി കഥാപാത്രത്തേയും വേണമെന്ന കാസ്റ്റിംഗ് കാള്‍ കണ്ട് ഒരു ശ്രമം നടത്തിയതാണ്. അങ്ങനെയാണ് ഞണ്ടുകളുടെ നാട്ടില്‍ എത്തിപ്പെട്ടത്.

ആ സിനിമയില്‍ അഭിനയിച്ച് കഴിഞ്ഞ ശേഷമാണ് സത്യത്തില്‍ അഭിനയത്തോട് കൂടുതല്‍ താല്പര്യം തോന്നുന്നതും നല്ല നല്ല കഥാപാത്രങ്ങള്‍ ചെയ്യണമെന്ന ചിന്ത ഉണ്ടാകുന്നതും. അവിടെ നിന്ന് ഇപ്പോള്‍ ഇവിടെ വരെ എത്തി. ഇനി കഴിയുന്ന പോലെ ഇവിടെ തുടരണം.

ആദ്യത്തെ സിനിമയ്ക്ക് ശേഷം മുംബൈയില്‍ ഒരു ആക്ടിംഗ് കോഴ്‌സിന് ചേര്‍ന്നിരുന്നു. ക്യാമറയ്ക്ക് മുന്നില്‍ നില്‍ക്കാനുള്ള കോണ്‍ഫിഡന്‍സ് ലഭിച്ചത് ആ ഒരു മാസ കാലയളവിലാണ്.

ആദ്യമായി ക്യാമറയെ ഫെയിസ് ചെയ്യുമ്പോള്‍ ഭയങ്കര പേടിയായിരുന്നു. അഭിനേതാവെന്ന നിലയില്‍ അവസരം തന്നവര്‍ക്ക് ഒരു ബാധ്യതയാകരുതെന്ന ചിന്തയുണ്ടായിരുന്നു. പള്‍സ് റേറ്റ് കൂടാനുള്ള കാരണം അതായിരിക്കും.

ഞാന്‍ മെത്തേര്‍ഡ് ആക്ടില്ല

ഓരോ കഥാപാത്രം ചെയ്ത് കഴിഞ്ഞും ഒരു ആത്മപരിശോധന നടത്താറുണ്ട്. എല്ലാവരും നല്ല അഭിപ്രായം പറഞ്ഞ മായാനദിയില്‍ പോലും എന്റെ അഭിനയത്തില്‍ കുറവുകളുണ്ടെന്ന് എനിക്ക് തോന്നിയിരുന്നു. ഞണ്ടുകളുടെ നാട്ടില്‍ ഒരിടവേളയുടെ ഡബ്ബിംഗിന് പോയപ്പോഴും എന്റെ അഭിനയത്തില്‍ ഒരുപാട് കുറവുകള്‍ തോന്നി.

ചിലപ്പോഴൊക്കെ എനിക്ക് തന്നെ സങ്കടം വരുമായിരുന്നു. ഞാനൊരു മെത്തേര്‍ഡ് ആക്ടറല്ല. അപ്പോഴുള്ള സാഹചര്യം നോക്കി അപ്പോള്‍ തോന്നുന്ന രീതിയില്‍ അഭിനയിക്കുന്ന ആളാണ്. അതിന്റേതായ പ്രശ്‌നങ്ങള്‍ തീര്‍ച്ചയായും ഉണ്ടാകും.

വരത്തനില്‍ കുറച്ചു കൂടി മെച്ചമാക്കാന്‍ പറ്റി. അഭിനയിച്ച കഥാപാത്രങ്ങള്‍ പിന്തുടരുന്ന അവസ്ഥയൊന്നുമില്ല. ഓരോ കഥാപാത്രവും കഴിയുമ്പോള്‍ ഒരാളില്‍ നിന്നെങ്കിലും നല്ല വാക്ക് കേള്‍ക്കുമ്പോള്‍ കൂടുതല്‍ കോണ്‍ഫിഡന്റാകാറാണ് പതിവ്.

ഞാനിപ്പോഴും സ്റ്റുഡന്റാണ്

ജൂനിയര്‍ ഡോക്ടര്‍ എന്ന നിലയില്‍ മാത്രമല്ല, ആക്റ്റിംഗിന്റെ കാര്യത്തിലും ഞാനൊരു സ്റ്റുഡന്റാണ്. എത്ര കാലം സിനിമയില്‍ ഉണ്ടാകുമോ അത്രയും കാലം ഓരോന്ന് പഠിക്കുക തന്നെയായിരിക്കും. ഓരോ ദിവസവും ഓരോരോ പുതിയ അനുഭവങ്ങളും പാഠങ്ങളുമാണ് സിനിമ തരുന്നത്. ഒരു സമയം ഒരു കാര്യം കൃത്യമായി ചെയ്യുക എന്നതാണ് എന്റെ രീതി.

ഒരു സ്വതന്ത്ര ഡോക്ടറായി ഇതുവരെ പ്രവര്‍ത്തിച്ചിട്ടില്ല. ആക്ടറായി തുടരുമ്പോള്‍ ഡോക്ടറെന്ന നിലയില്‍ നീതി പുലര്‍ത്താന്‍ കഴിയില്ലന്ന് എനിക്ക് തന്നെ ബോധ്യമുണ്ട്. അഭിനയത്തിന് ഒരു ബ്രേക്ക് വരുമ്പോള്‍ എം.ഡി എടുക്കണമെന്ന ആഗ്രഹവുമുണ്ട്.

അമ്പരപ്പിച്ച ഫഹദിന്റെ അഭിനയം

ഫഹദിക്കയുടെ കൂടെ പെര്‍ഫോം ചെയ്യുമ്പോള്‍ അഭിനയം ഞാന്‍ നോക്കി നില്‍ക്കുമായിരുന്നു. ഏറെ ആരാധിച്ചിരുന്ന ആളായതുകൊണ്ട് ആദ്യമൊക്കെ സംസാരിക്കാന്‍ ഒരു മടിയായിരുന്നു. നസ്രിയയുമായി മുന്‍പേ സൗഹൃദമുണ്ടായിരുന്നത് കാരണം ഞങ്ങള്‍ തമ്മിലായിരുന്നു സംസാരം. നിവിനേയും ടോവിനോയേയും നേരത്തേ അറിയാമായിരുന്നു.

നല്ല സിനിമയുടെയും സഹപ്രവര്‍ത്തകരുടെയും കൂടെ വര്‍ക്ക് ചെയ്യാന്‍ കഴിഞ്ഞത് കൊണ്ടാണ് എനിക്കീ അറ്റന്‍ഷന്‍ കിട്ടിയത്. ആദ്യ സിനിമയില്‍ നിവിന്‍, രണ്ടാമത്തേതില്‍ ടോവിനോ പിന്നെ ഫഹദ്, ഷറഫിക്ക എന്നിവരുടെ ഒക്കെ കൂടെയാണ് അഭിനയിച്ചത്. കണ്ടും കേട്ടും പഠിക്കാന്‍ ഒരുപാടുള്ള അഭിനേതാക്കളാണ് അവരെല്ലാം. വലിയ ബഹുമാനമാണ് അവരോടെല്ലാം. അതേ സമയം വളരെ ഈസിയായി അവര്‍ക്കൊപ്പം അഭിനയിക്കാനും കഴിയും.

സിനിമ ബുദ്ധിമുട്ടിച്ചിട്ടില്ല

സിനിമയില്‍ ഉണ്ടെന്ന് പറയപ്പെടുന്ന പ്രശ്‌നങ്ങളൊന്നും എനിക്ക് ഇതുവരെ നേരിടേണ്ടി വന്നിട്ടില്ല. എനിക്കൊപ്പം വര്‍ക്ക് ചെയ്തിരുന്നവരെല്ലാം തന്നെ നല്ല രീതിയില്‍ സഹകരിച്ച് മുന്നോട്ട് പോയവരാണ്. പിന്നെ പ്രശ്‌നങ്ങള്‍ എല്ലാ മേഖലയിലും ഉണ്ട്. ആണും പെണ്ണും ഒന്നിച്ച് വര്‍ക്ക് ചെയ്യുന്ന ഏത് മേഖലയിലും ഇതൊക്കെ പറഞ്ഞു കേള്‍ക്കുന്നതാണ്.

സിനിമയിലുള്ളവരെക്കുറിച്ച് ചര്‍ച്ച ചെയ്യാന്‍ ജനങ്ങള്‍ക്ക് കൂടുതല്‍ ഇഷ്ടമാണ് എന്ന് മാത്രം. സിനിമയിലേക്ക് വരുമ്പോള്‍ എനിക്ക് യാതൊരു ബുദ്ധിമുട്ടുകളും ഉണ്ടായിട്ടില്ല. ആദ്യത്തെ സിനിമ നന്നായി ഓടി. നല്ല കഥാപാത്രങ്ങള്‍ കിട്ടി. അത്തരത്തില്‍ ഞാന്‍ ലക്കിയാണ്.

ജീവിതത്തില്‍ മാറ്റം വരുത്തില്ല

സിനിമാ മേഖലയിലുള്ളവര്‍ എപ്പോഴും മറ്റുള്ളവരുടെ നിരീക്ഷണത്തിലായിരിക്കും. ഞാനും ഒരു റഡാറിലാണെന്ന ബോധ്യം എനിക്കുണ്ട്. ഒരിക്കലും വിചാരിക്കാത്ത കാര്യങ്ങളുടെ പേരില്‍ പോലും ജനങ്ങള്‍ നമ്മളെ ജഡ്ജ് ചെയ്യുമെന്ന കാര്യം ഉറപ്പാണ്. എന്നു കരുതി എന്റെ ജീവിതത്തില്‍ മാറ്റം വരുത്താന്‍ ഉദ്ദേശിക്കുന്നില്ല.

ആരെങ്കിലും മോശമായി പറഞ്ഞാല്‍ ഒരുപക്ഷേ എനിക്ക് വിഷമം വരുമായിരിക്കും. പക്ഷേ കരഞ്ഞാല്‍ തീരാവുന്ന പ്രശ്‌നങ്ങളേ എനിക്കുണ്ടായിട്ടുള്ളൂ. അനാവശ്യ പോസ്റ്റ്മാര്‍ട്ടം നടത്തുന്നവരെ പേടിയുണ്ട്. പക്ഷേ ഏത് പ്രതിസന്ധിയില്‍ നിന്നും ഉയര്‍ത്തെഴുന്നേല്‍ക്കാന്‍ കഴിയുമെന്ന ആത്മവിശ്വാസം അതിലേറെയുണ്ട്.

സിനിമയില്‍ തുടരണം

എനിക്ക് ചെയ്യാന്‍ പറ്റുന്നതും കംഫര്‍ട്ടബിളുമായ കഥാപാത്രങ്ങള്‍ കിട്ടുന്നിടത്തോളം ആക്റ്റിംഗില്‍ തുടരണമെന്ന ആഗ്രഹമാണുള്ളത്. അതില്ലാത്ത സാഹചര്യം വന്നാല്‍ തീര്‍ച്ചയായും അഭിനയം ഉപേക്ഷിച്ച് മെഡിക്കല്‍ മേഖലയിലേക്ക് തന്നെപോകും. പിന്നെ സ്വഭാവത്തിന്റെ കാര്യത്തില്‍ തല്ക്കാലം മാറ്റമൊന്നും ഉണ്ടാകില്ല. നമ്മള്‍ എന്താണെന്ന് നമുക്കറിയാല്ലോ. ഉള്ള സമയം ആസ്വദിച്ച് ജീവിക്കാനാണ് ആഗ്രഹിക്കുന്നത്.

ആരോടെങ്കിലും തെറ്റുകള്‍ ചെയ്തിട്ടുണ്ടെങ്കില്‍ അല്‍പം സമയം എടുത്തിട്ടാണെങ്കിലും സോറി പറയാന്‍ ശ്രമിക്കുന്ന ആളാണ് ഞാന്‍. തല്ക്കാലം മാറ്റമൊന്നും കൂടാതെ ഇങ്ങനെയൊക്കെ തന്നെ മുന്നോട്ട് പോകാനാണ് തീരുമാനം.

ദീപു ചന്ദ്രന്‍