ചൈനയിലെ ഏറ്റവും വലിയ പണക്കാരന്‍ വിദ്യാഭ്യാസത്തിന് വേണ്ടി കമ്പനി വിടുന്നു ; ജാക്ക് മായുടെ സ്വന്തം ആലിബാബയുടെ ഇപ്പോഴത്തെ മൂല്യം 420 ബില്യണ്‍ ഡോളര്‍

ഹോങ്കോംഗ് : ലോകപ്രശസ്ത ഇ കൊമേഴ്‌സ് സ്ഥാപനമായ ആലിബാബയുടെ എക്‌സിക്യുട്ടീവ് ചെയര്‍മാനും സഹ സ്ഥാപകനുമായ ജാക്ക് മാ പടിയിറങ്ങുന്നു. ചൈനയിലെ ഏറ്റവും വലിയ പണക്കാരനായ ജാക്ക് മാ 420 ബില്യണ്‍ ഡോളര്‍ സ്വത്ത്മൂല്യമുള്ള ഇന്റര്‍നെറ്റ് കമ്പനി വിടുന്നത് വിദ്യാഭ്യാസരംഗത്തേക്ക് മടങ്ങാന്‍ വേണ്ടിയാണ്. സമയവും സമ്പാദ്യവും വിദ്യാഭ്യാസം ലക്ഷ്യമിട്ട് ഉപയോഗിക്കാനാണ് മായുടെ തീരുമാനം.

മൂന്‍ ഇംഗ്‌ളീഷ് ടീച്ചറായ മാ 1999 ലാണ് ലോകത്തെ ഏറ്റവും പ്രമുഖമായ ഇ കൊമേഴ്‌സ്, ഡിജിറ്റല്‍ പേമെന്റ കമ്പനിയായ ആലിബാബ തുടങ്ങിയത്. സാധനങ്ങള്‍ വാങ്ങാനും പണമിടപാട് നടത്താനുമുള്ള ഈ ഇന്റര്‍നെറ്റ് സ്ഥാപനത്തെ ചൈനാക്കാര്‍ ഏറ്റെടുത്തതോടെ ഇതിന്റെ അറ്റാദായം 40 ബില്യണ്‍ ഡോളറിന് മുകളിലേക്ക് കടക്കുകയും ചൈനയിലെ ഏറ്റവും വലിയ പണക്കാരനായി ജാക്ക് മാ മാറുകയുമായിരുന്നു.

അനേകം ചൈനാക്കാരാണ് ജാക്ക് മായ്ക്ക് ആരാധകരായുള്ളത്. സമ്പത്തിന്റെ ദേവന്‍ എന്ന പരിവേഷം നല്‍കി ചില വീടുകളില്‍ ഛായാചിത്രം വെച്ച് പൂജ വരെ നടത്തുന്നവരുണ്ട്. തന്റെ വിരമിക്കല്‍ ഒരു യുഗത്തിന്റെ അസ്തമനമല്ലെന്നും ഉദയമാണെന്നുമായിരുന്നു വിരമിക്കല്‍ പ്രഖ്യാപനത്തിന് പിന്നാലെയുള്ള ഒരു അഭിമുഖത്തില്‍ മാ പറഞ്ഞത്.

ചൈനയില്‍ അദ്ധ്യാപകദിനമായി വിലയിരുത്തപ്പെടുന്ന തിങ്കളാഴ്ച മായ്ക്ക് 54 വയസ്സ് തികയും. വിരമിക്കുമെങ്കിലും ആലിബാബയുടെ ഡയറക്ടര്‍മാരില്‍ ഒരാളായും മാനേജ്‌മെന്റിന്റെ ഉപദേശകരില്‍ ഒരാള്‍ എന്ന നിലയിലും മായുണ്ടാകും. മറ്റ് എക്‌സിക്യുട്ടീവുകള്‍ക്ക് അധികാര കൈമാറ്റം നടത്തിയാണ് മാ പടിയിറങ്ങുന്നത്. 2013 ല്‍ മാ ആലിബാബയുടെ ചീഫ് എക്‌സിക്യുട്ടീവ് പദവി ഉപേക്ഷിച്ചിരുന്നു. അതേസമയം ആലിബാബായുടെ 6.4 ശതമാനം ഓഹരി മായുടെ പേരിലാണ്. കിഴക്കന്‍ ഷെജിയാംഗ് പ്രവിശ്യയിലെ ഹാങ്ഷൂ അപ്പാര്‍ട്ട്‌മെന്റില്‍ തന്റെ വിദ്യാര്‍ത്ഥികള്‍ ഉള്‍പ്പെടെയുള്ള മറ്റു 17 പേര്‍ക്കൊപ്പമായിരുന്നു മാ ആലിബാബ തുടങ്ങിയത്.

ഇ കൊമേഴ്‌സ്, ഓണ്‍ലൈന്‍ ബാങ്കിംഗ്, ക്‌ളൗഡ് കംപ്യൂട്ടിംഗ്, ഡിജിറ്റല്‍ മീഡിയാ, എന്റര്‍ടെയ്ന്‍മെന്റ്, സ്‌ളാക്ക് പോലെയുള്ള ഒരു കോര്‍പ്പറേറ്റ് മെസേജിംഗ് സര്‍വീസ് എന്നിവയെല്ലാമായി കുതിച്ചുയര്‍ന്നിരിക്കുന്ന കമ്പനി ചൈനയിലെ മാധ്യമ സ്വത്തുക്കളില്‍ സിംഗഹഭാഗവും കയ്യടക്കിയിരിക്കുകയാണ്. ചൈനാക്കാരുടെ സ്വന്തം സാമൂഹ്യ മാധ്യമമായ വെയ്‌ബോ, ഹോങ്കോംഗില്‍ ഏറെ പ്രചാരമുള്ള ഇംഗ്‌ളീഷ് ഭാഷയിലുള്ള പത്രം ദി സൗത്ത് ചൈനാ മോണിംഗ് എല്ലാം ഇതില്‍ പെടുന്നു.