Sunday, November 11, 2018 Last Updated 13 Min 14 Sec ago English Edition
Todays E paper
Ads by Google
Friday 24 Aug 2018 03.52 PM

ഗര്‍ഭിണികളിലെ ദന്തസംരക്ഷണം

''ഗര്‍ഭാവസ്ഥയില്‍ മോണരോഗങ്ങള്‍ വര്‍ധിക്കാനുള്ള സാധ്യതയേറെയാണ്. മോണയിലും പല്ലുകളിലും അഴുക്ക്് അടിയുക, വെളുത്തദ്രാവകമായ പ്ലേക്ക് എന്നിവ ഗര്‍ഭാവസ്ഥയില്‍ സാധാരണ ഉണ്ടാകാറുണ്ട്. ''
uploads/news/2018/08/243215/dentalcare240818a.jpg

ഗര്‍ഭകാലത്തെ ആരോഗ്യസംരക്ഷണം പോലെ തന്നെ പ്രാധാന്യമര്‍ഹിക്കുന്നതാണ് ഗര്‍ഭിണികളിലെ ദന്തസംരക്ഷണവും. ഗര്‍ഭാവസ്ഥയിലെ ദന്തസംരക്ഷണത്തിലൂടെ അമ്മയുടെ ആരോഗ്യം മാത്രമല്ല, കുഞ്ഞിന്റെ ആരോഗ്യവും സംരക്ഷിക്കാനാകും.

ദന്തസംരക്ഷണം ഗര്‍ഭിണികളില്‍


ദന്തസംരക്ഷണവും പരിശോധനകളും ഗര്‍ഭിണിയാകുന്നതിനു മുന്‍പ് തന്നെ ആരംഭിക്കേണ്ടതുണ്ട്. മൂന്ന് മാസം കൂടുമ്പോള്‍ ദന്തപരിശോധനകള്‍ നടത്തിയാല്‍ ഗര്‍ഭധാരണത്തിനു മുന്‍പ് തന്നെ ദന്തസുരക്ഷ ഉറപ്പാക്കാനാകും. ഗര്‍ഭാവസ്ഥയില്‍ പല്ലുകള്‍ക്കുള്ള കേടുപാടുകള്‍ പലവിധത്തിലുള്ള ബുദ്ധിമുട്ടുകള്‍ക്ക് കാരണമാകും.

ഗര്‍ഭാവസ്ഥയ്ക്ക് മുന്‍പ് പല്ലിന്റെ കേടുപാടുകള്‍ പരിഹരിക്കാന്‍ കഴിയാത്തവര്‍ ഗര്‍ഭിണിയാകുന്ന സമയം തീര്‍ച്ചയായും ഡെന്റിസ്റ്റിനെ കണ്ട് കൃത്യമായ ചികിത്സകള്‍ ആരംഭിക്കണം. ഗര്‍ഭകാല ചെക്കപ്പുകള്‍ക്കൊപ്പം ദന്തപരിശോധനയും നടത്തുന്നതിലൂടെ ഗര്‍ഭസ്ഥശിശുവിന്റെ വളര്‍ച്ചയെ ബാധിക്കുന്ന പ്രശ്‌നങ്ങള്‍ പരിഹരിക്കാനാകും.

ഗര്‍ഭാവസ്ഥയില്‍ മോണരോഗങ്ങള്‍ വര്‍ധിക്കാനുള്ള സാധ്യതയേറെയാണ്. മോണയിലും പല്ലുകളിലും അഴുക്ക്് അടിയുക, വെളുത്തവസ്തുവായ പ്ലേക്ക് എന്നിവ ഗര്‍ഭാവസ്ഥയില്‍ സാധാരണ ഉണ്ടാകാറുണ്ട്. ഇതു മോണകളില്‍ നീരുണ്ടാകാന്‍ കാരണമാകും. ഈസ്ട്രജന്‍, പ്രൊജസ്‌ട്രോണ്‍ എന്നീ ഹോര്‍മോണുകളുടെ അളവ് ഗര്‍ഭകാലത്ത് കൂടുതലായി ഉണ്ടാകുന്നതാണ്് ഇത്തരത്തിലുള്ള മാറ്റങ്ങള്‍ക്ക് കാരണം.

uploads/news/2018/08/243215/dentalcare240818b.jpg

മോണരോഗ ലക്ഷണങ്ങള്‍


1. മോണയില്‍ നിന്നും തുടര്‍ച്ചയായുള്ള രക്തസ്രാവം
2. മോണയുടെ നിറം ചുവപ്പ് അല്ലെങ്കില്‍ നീല നിറമാകുക.
3. മോണയില്‍ ബ്രഷ് കൊള്ളുമ്പോള്‍ അസ്വസ്ഥതയും വേദനയും ഉണ്ടാകുക.
4. ദീര്‍ഘനാളായി അനുഭവപ്പെടുന്ന അസ്വസ്ഥതകള്‍ ഗര്‍ഭാവസ്ഥയില്‍ പ്രെഗ്നന്‍സി ട്യൂമര്‍ എന്ന വളര്‍ച്ചയ്ക്ക് ഇടയാക്കുക.

പ്രതിരോധമാര്‍ഗങ്ങള്‍


പല്ലുകള്‍ക്കുണ്ടാകുന്ന പ്രശ്‌നങ്ങള്‍ കൃത്യമായി പരിഹരിക്കുകയെന്നതാണ് പ്രധാനം. ഗര്‍ഭാവസ്ഥയ്ക്ക് മുന്‍പ് തന്നെ ദന്തപരിശോധന ആരംഭിക്കേണ്ടതുള്ളതിനാല്‍ പ്രതിരോധ മാര്‍ഗങ്ങളാണ് മുഖ്യമായി അവലംബിക്കേണ്ടത്. പല്ലുകളുടെയും വായയുടെയും സംരക്ഷണവും വൃത്തിയും പാലിക്കേണ്ടത് വളരെ പ്രധാനമാണ്. കൂടാതെ കൃത്യമായി ചെയ്യേണ്ട ദന്തസംരക്ഷണ രീതികളുണ്ട്.

മൂന്ന് മാസം അല്ലെങ്കില്‍ ആറുമാസത്തിനുള്ളില്‍ പല്ലുകള്‍ വൃത്തിയാക്കുന്നത് എല്ലാവിഭാഗം ആളുകള്‍ക്കും ഗുണം ചെയ്യും. എന്നാല്‍ സാധാരണയായി ഓറല്‍ ഹൈജിന്‍ അത്ര കൃത്യമായി പാലിക്കപ്പെടാറില്ല. പല്ലുകള്‍ക്ക് കേടുപാടുകളും വേദനയും അനുഭവപ്പെടുമ്പോള്‍ മാത്രമാണ് ചികിത്സ തേടാറുള്ളത്.

സ്ത്രീകളെ സംബന്ധിച്ച് ഗര്‍ഭധാരണത്തിനു മുന്‍പ് ഡെന്റിസ്റ്റിനെ കണ്ട് പല്ലുകള്‍ വൃത്തിയാക്കുന്നതാണ് നല്ലത്. ഓരോ ഗര്‍ഭധാരണ സമയത്തും ദന്തസംരക്ഷണത്തിനു നല്‍കേണ്ട പ്രാധാന്യം തീര്‍ച്ചയായും നല്‍കണം. ദന്തസംരക്ഷണത്തെക്കുറിച്ചു മനസിലാക്കി ഡോക്ടറുടെ നിര്‍ദേശങ്ങള്‍ക്കനുസരിച്ച് അവ ചെയ്യണം.

ഭക്ഷണത്തിനു ശേഷം കൃത്യമായി പല്ലുകള്‍ വൃത്തിയാക്കുക, പല്ലുകളില്‍ അടിഞ്ഞിരിക്കുന്ന അഴുക്കുകള്‍ എടുത്തു കളഞ്ഞു വൃത്തിയാക്കുക, ചെറുചൂടുവെള്ളം വായില്‍ കവിള്‍കൊള്ളുക, ഇത്തരത്തിലുള്ള ഓറല്‍ ഹൈജിന്‍ പാലിക്കുന്നത് ഗര്‍ഭകാലത്തെ പല്ലുകളുടെ സംരക്ഷണത്തിനു വളരെയധികം സഹായിക്കും.

ദന്തസംരക്ഷണം എപ്പോള്‍


ഗര്‍ഭകാലം ആദ്യമൂന്നു മാസം, രണ്ടാമത്തെ മൂന്നു മാസം, അവസാനത്തെ മൂന്നുമാസം എന്നിങ്ങനെ തരംതിരിക്കാറുണ്ട്. ഗര്‍ഭകാലത്ത് ചിലര്‍ക്ക് ഛര്‍ദ്ദി അധികമായിരിക്കും. ഛര്‍ദിയോടൊപ്പം വയറ്റില്‍ നിന്നും ആസിഡ് പോലുള്ള രാസപദാര്‍ഥങ്ങള്‍ വായിലേക്ക് വരും. ഇതു പല്ലുകള്‍ക്ക് ദോഷം ചെയ്യും.

ആദ്യമൂന്നു മാസങ്ങളിലാണ് ഇത്തരത്തിലുള്ള ബുദ്ധിമുട്ടുകള്‍ ഗര്‍ഭിണികളില്‍ ഉണ്ടാകുന്നത്. നാലാം മാസം മുതല്‍ ആറാം മാസം വരെയുള്ള രണ്ടാമത്തെ ട്രൈമസ്റ്ററില്‍ പല്ലിനുള്ള കേടുപാടുകള്‍ പരിഹരിക്കുന്നതില്‍ തെറ്റില്ല. കേടുപാടുള്ള പല്ലുകള്‍ നീക്കം ചെയ്യുക, പല്ലിന്റെ സുഷിരങ്ങള്‍ അടയ്ക്കുക,റൂട്ട് കനാല്‍ എന്നിവയിലൂടെ ഗര്‍ഭാവസ്ഥയുടെ നാലു മുതല്‍ ആറ് മാസം വരെയുള്ള സമയങ്ങളില്‍ വിദഗ്ധ നിര്‍ദേശത്തോടെ പരിഹരിക്കാവുന്നതാണ്.

uploads/news/2018/08/243215/dentalcare240818c.jpg

പല്ലുകള്‍ക്കുണ്ടാകുന്ന കേടുപാടുകള്‍


ഗര്‍ഭാവസ്ഥയില്‍ മരുന്നുകള്‍ ഉപയോഗിക്കാന്‍ പാടില്ല. അതിനാല്‍ പല്ലിന്റെ സംരക്ഷണത്തിനായി മരുന്നുകള്‍ കൂടാതെയുള്ള ചികിത്സകള്‍ ചെയ്യുന്നതാകും ഉത്തമം. ആദ്യ മൂന്നു മാസങ്ങളില്‍ മരുന്നുകള്‍ ഉപയോഗിക്കുന്നത് ഗര്‍ഭസ്ഥശിശുവിന്റെ മസ്തിഷ്‌ക വളര്‍ച്ചയെ ബാധിക്കും. രണ്ടാം ട്രൈമസ്റ്ററില്‍ ദന്തസംരക്ഷണത്തിനായുള്ള ചികിത്സകള്‍ ആരംഭിക്കാം.

മൂന്നാം ട്രൈമസ്റ്ററില്‍ അതായത് ഏഴാം മാസം മുതല്‍ ഗര്‍ഭിണികളില്‍ രക്തസമ്മര്‍ദം കൂടാനുള്ള സാധ്യതയുണ്ട്. ഈ സമയം പല്ലുവേദന അധികരിച്ചേക്കാം. അതിനാല്‍ പല്ലിനുണ്ടാകുന്ന കേടുപാടുകള്‍ രണ്ടാം ട്രൈമസ്റ്ററില്‍ പരിഹരിക്കേണ്ടതുണ്ട്. അഥവാ ഗര്‍ഭാവസ്ഥയുടെ അവസാന മാസങ്ങളില്‍ എന്തെങ്കിലും ചികിത്സ ചെയ്യേണ്ടി വന്നാല്‍ ഗര്‍ഭസ്ഥശിശുവിന്റെ സ്ഥാനമുള്‍പ്പെടെ പരിഗണിച്ചു മാത്രമേ ചികിത്സിക്കാവൂ. അതായത് ഗര്‍ഭിണി ചികിത്സയ്ക്കായി ഇരുത്തുന്നതില്‍ പോലും ശ്രദ്ധിക്കണം.

ഗര്‍ഭാവസ്ഥയില്‍ സാധാരണയായി റേഡിയോഗ്രാഫ് അനുവദിക്കുന്നതല്ല. അപൂര്‍വമായി മാത്രം ചില കേസുകളില്‍ റേഡിയോഗ്രാഫ് എക്‌സറേ എടുക്കാറുണ്ട്. എന്നാല്‍ ഗര്‍ഭസ്ഥശിശുവിന്റെ സംരക്ഷണം ഉറപ്പാക്കി മാത്രമേ ഇവ ചെയ്യാവൂ.

ശ്രദ്ധിക്കേണ്ട കാര്യങ്ങള്‍


ആല്‍ക്കഹോള്‍ അടങ്ങിയിട്ടില്ലാത്ത മൗത്ത്‌വാഷ് ഉപയോഗിക്കുക. ദന്തസംരക്ഷണവും വായയുടെ ശുചിത്വവും ഏറ്റവും കൂടുതല്‍ ശ്രദ്ധിക്കേണ്ടത് ഗര്‍ഭാവസ്ഥയിലാണ്. ഹോര്‍മോണുകളുടെ തോത് വര്‍ധിക്കുന്ന സമയമായതിനാല്‍ പെരിഡോന്റല്‍ പ്രശ്‌നങ്ങള്‍ ഉണ്ടാകാനുള്ള സാധ്യത കൂടുതലാണ്. ഭക്ഷണത്തിനു ശേഷം പല്ലുകള്‍ വൃത്തിയാക്കണം. പ്രത്യേകിച്ചും രാവിലെയും വൈകിട്ടും. നേര്‍ത്ത നാരുകളുള്ള ബ്രഷുകള്‍ ഉപയോഗിക്കുക.

ഗര്‍ഭാവസ്ഥയ്ക്ക് മുന്‍പ് തന്നെ വേണ്ട മുന്‍കരുതലുകള്‍ സ്വീകരിക്കുന്നതാണ് ഉചിതം. ഗര്‍ഭിണിയായതിനുശേഷം രണ്ടാം ട്രൈമസ്റ്ററിലെങ്കിലും ദന്തരോഗങ്ങള്‍ പരിഹരിക്കണം. അവസാന മൂന്നു മാസം ഗര്‍ഭിണികളെ സംബന്ധിച്ച് പല ശാരീരിക ബുദ്ധിമുട്ടുകളും അനുഭവപ്പെടുന്ന കാലയളവാണ്.

കാലുകളില്‍ നീര്, നെഞ്ചിടിപ്പ് വര്‍ധിക്കുക, ചികിത്സാ സമയത്ത് ദന്തപരിശോധനകള്‍ ചെയ്യാന്‍ ബുദ്ധിമുട്ട് എന്നിവ ഉണ്ടാകാം. അതിനാല്‍ ദന്തപരിശോധനകള്‍ക്കും സംരക്ഷണത്തിനും ഉചിതമായ സമയത്ത് തന്നെ ആരംഭിക്കുക.

ഡോ. പ്രമീത ജോര്‍ജ് ഇട്ടിച്ചെറിയ
സീനിയര്‍ ലക്ചറര്‍
ഡിപ്പാര്‍ട്ട്‌മെന്റ് ഓഫ് പെരിയോഡോറ്റിക്‌സ്
പുഷ്പഗിരി ഡന്റല്‍ കോളേജ്, തിരുവല്ല

ഡോ. അനു എസ്. മോനി
റസിഡന്റ് ഡെന്റല്‍ സര്‍ജന്‍
ഡോക്ടര്‍ പ്രവീണ്‍സ് ഡെന്റല്‍
കോസ്മറ്റിക് സെന്റര്‍ കലൂര്‍, എറണാകുളം

തയാറാക്കിയത് : നീതു സാറാ ഫിലിപ്പ്

Ads by Google
Ads by Google
Loading...
TRENDING NOW