Saturday, September 08, 2018 Last Updated 0 Min 8 Sec ago English Edition
Todays E paper
Ads by Google
Saturday 28 Jul 2018 02.39 AM

കുട്ടനാട്ടില്‍ മനുഷ്യന്‍ വിതച്ച ദുരന്തം

uploads/news/2018/07/236883/bft1.jpg

സഹ്യന്റെ നെറുകയില്‍ ഇടവപ്പാതി ഇരുണ്ടുപെയ്‌തപ്പോഴേക്കും കുട്ടനാട്‌ വെള്ളത്തിലായത്‌ പ്രകൃതിയുടെ ക്രൂരമായ പ്രതികാരമാണെന്ന്‌ പറഞ്ഞാല്‍ തെറ്റില്ല. പണ്ട്‌ ഇടനാട്ടില്‍ വെള്ളമിറങ്ങിയാല്‍ മാത്രമെ കുട്ടനാട്‌ പ്രളയക്കെടുതി അറിഞ്ഞിരുന്നുള്ളൂ. എന്നാല്‍, ഇത്തവണ ഇടനാട്ടില്‍ വെള്ളപ്പൊക്കം ഉണ്ടായില്ലെന്നുള്ളതാണ്‌ ശ്രദ്ധേയം. മനുഷ്യന്‍ പ്രകൃതിയുടെ നീരൊഴുക്കിന്‌ മറുവഴി ഒരുക്കിയത്‌ കുട്ടനാടിന്റെ ഹൃദയത്തിലേക്ക്‌ ദുരന്തം പെയ്‌തിറങ്ങാന്‍ കരണമായി. രൂക്ഷമായ വനശോഷണം, കുന്നുകളുടെ നാശം, നദിയില്‍ തുടര്‍ന്നുവന്ന മണല്‍ഖനനം, നീര്‍തടങ്ങളുടെയും വയലുകളുടെയും തോടുകളുടെയും നശീകരണം, അശാസ്‌ത്രീയമായ റോഡ്‌ നിര്‍മ്മാണം, വേമ്പനാട്ടുകായലിന്റെ ശോഷണം എന്നിവയെല്ലാമാണ്‌ കുട്ടനാടിനെ മരണ വക്‌ത്രത്തിലേക്ക്‌ തള്ളിവിട്ടതെന്ന്‌ വിദഗ്‌ധ പഠനം. എന്നിട്ടും കേരളം പഠിക്കുന്നില്ല. വീണ്ടും തണ്ണീര്‍തടങ്ങളുടെയും വയലുകളുടെയും മലകളുടെയും സര്‍വനാശത്തിന്‌ വഴിയൊരുക്കി നിയമങ്ങളെ മാറ്റിയെഴുതാന്‍ വെമ്പുകയാണ്‌ അധികാരവര്‍ഗം. കുട്ടനാട്‌ നേരിട്ട അതിരൂക്ഷമായ പ്രളയ ദുരന്തത്തിന്റെ കാരണങ്ങള്‍ തേടിയാല്‍ ഞെട്ടിക്കുന്ന പാരിസ്‌ഥിതിക ശോഷണത്തിന്റെ കഥകളാവും കണ്ടറിയുക.

സഹ്യമലകളിലെ സസ്യശോഷണം

പമ്പ, മണിമല, അച്ചന്‍കോവില്‍, മീനച്ചിലാര്‍ എന്നീ നദികളിലൂടെ ഒഴുകിയെത്തുന്ന ജലമാണ്‌ കുട്ടനാടിന്റെ ആത്മാവ്‌. 2235 ചതുരശ്ര കി.മീറ്റര്‍ വരുന്ന പമ്പാനദിയുടെ വൃഷ്‌ടിപ്രദേശമാണ്‌ കുട്ടനാടിന്റെ ജീവനാഡിയെ ഉത്തേജിപ്പിക്കുന്നത്‌.1500 ച. കി.മീറ്റര്‍ വരുന്ന അച്ചന്‍കോവിലാറിന്റെയും 850 ച.കി.മീറ്റര്‍ വരുന്ന മണിമലയാറിന്റെയും 1250 ച.കി.മീറ്റര്‍ വരുന്ന മീനച്ചിലാറിന്റെയും വൃഷ്‌ടിപ്രദേശങ്ങളാണ്‌ കുട്ടനാടിനെ പരിപോഷിപ്പിക്കുന്ന മറ്റ്‌ ജലസ്രോതസുകള്‍. എന്നാല്‍, സഹ്യമലകളില്‍ പെയ്യുന്ന മഴ അവിടെ തങ്ങിനില്‍ക്കാതെ പെരുവള്ളപ്പാച്ചിലായി കുട്ടനാട്ടില്‍ എത്തുന്നതാണ്‌ ഇപ്പോഴത്തെ പ്രശ്‌നത്തിന്‌ പ്രധാന കാരണമെന്ന്‌ പമ്പാ പരിരക്ഷണ സമിതി നടത്തിയ പഠനങ്ങളില്‍ വ്യക്‌തമാകുന്നു.
ഉദ്ദേശ്യം 30 വര്‍ഷം മുമ്പ്‌ ഉണ്ടായ ശക്‌തമായ വനശോഷണത്തിന്റെ അനന്തര ഫലം അനുഭവിക്കുന്നത്‌ ഇപ്പോഴാണെന്നാണ്‌ പഠനം തെളിയിക്കുന്നത്‌. പണ്ട്‌ മലമുകളില്‍ പെയ്യുന്ന മഴവെള്ളത്തിന്റെ 40 ശതമാനവും അടിക്കാടുകളും മണ്ണും സംഭരിച്ചുനിര്‍ത്തുമായിരുന്നു. പിന്നീട്‌ ഈ വെള്ളം അല്‍പാല്‍പമായി ചെറുതോടുകളിലൂടെ ഒഴുകി നദികളില്‍ പതിക്കുന്നതായിരുന്നു പ്രകൃതിദത്തമായ രീതി. എന്നാല്‍ അടിക്കാടുകളുടെ ശോഷണവും ശക്‌തമായ മണ്ണൊലിപ്പും മൂലം മഴവെള്ളം ആഗിരണം ചെയ്യുന്ന പ്രകൃതിദത്ത രീതി ഇല്ലാതായി. പെയ്യുന്ന മഴ പൂര്‍ണമായി ഒലിച്ച്‌ നദികളില്‍ എത്തുന്നതോടെ വന്‍പ്രളയത്തിന്‌ അത്‌ വഴിയൊരുക്കുന്നു എന്ന്‌ പരിസ്‌ഥിതി പ്രവര്‍ത്തകനായ എന്‍.കെ. സുകുമാരന്‍ നായര്‍ പറയുന്നു.

രൂക്ഷമായ മണല്‍ഖനനം

കഴിഞ്ഞ നാല്‍പ്പത്‌ വര്‍ഷമായി തുടര്‍ന്നുവന്ന രൂക്ഷമായ മണല്‍ഖനനം നദികളുടെ ഗതിയെയും സ്വഭാവത്തേയും രൂപത്തേയും മാറ്റിമറിച്ചു. പമ്പാ നദി ശരാശരി ആറു മുതല്‍ 10 മീറ്റര്‍ വരെ താണതായാണ്‌ കേന്ദ്ര ജല കമ്മീഷന്റെ പഠനം സൂചിപ്പിക്കുന്നത്‌. പമ്പ സ്വാഭാവിക രീതിയില്‍ ഒഴുകിയപ്പോള്‍ ശരാശരി 150 മുതല്‍ 210 മീറ്റര്‍ വരെയായിരുന്നു വീതി. എന്നാല്‍, മണല്‍ഖനനം മൂലം നദിയുടെ അടിത്തട്ട്‌ പത്തുമീറ്റര്‍ വരെ താണപ്പോള്‍ നദിയുടെ വീതി കുറയാന്‍ കാരണമായി. പ്രയാണവീഥി കുറഞ്ഞു എന്നതു മാത്രമല്ല നദിയിലെ സ്വാഭാവിക തടയണകളായ മണല്‍ പൂര്‍ണമായും നീങ്ങിയതോടെ അടിത്തട്ടില്‍ എക്കല്‍ മാത്രം ശേഷിക്കാനും കാരണമായി. കിഴക്ക്‌ പെയ്യുന്ന വെള്ളം അതിവേഗം കുത്തിയൊഴുകി കുട്ടനാട്ടില്‍ എത്താന്‍ ഇതും പ്രധാന കാരണമായി മാറിയെന്ന്‌ പ്രമുഖ പരിസ്‌ഥിതി ശാസ്‌ത്രജ്‌ഞനായ ഡോ.കെ.ജി. പത്മകുമാര്‍. മണിമലയുടെയും അച്ചന്‍കോവിലാറിന്റെയും മീനച്ചിലിന്റെയും പ്രശ്‌നം ഇതുതന്നെയാണ്‌. പണ്ട്‌ വിശാലമായി ഒഴുകിയ നദി ഇന്ന്‌ ആഴമേറിയ തോടായി മാറി എന്നുതന്നെ പറയാം. ഒഴുക്കിന്റെ ശക്‌തിയും വര്‍ദ്ധിച്ചു. കിഴക്ക്‌ പെയ്യുന്ന മഴ കേവലം 7-9 മണിക്കൂറുകള്‍കൊണ്ട്‌ കുട്ടനാട്ടില്‍ എത്തിച്ചേരുന്നതോടെ പ്രളയം അനിയന്ത്രിതമായി മാറുന്നു.

ഭൂവിനിയോഗത്തിലെ മാറ്റം

വേമ്പനാട്ടുകായലിലേക്ക്‌ ഒഴുകിയെത്തുന്ന മൂവാറ്റുപുഴ, മീനച്ചില്‍, പമ്പ, അച്ചന്‍കോവില്‍, മണിമല എന്നീ നദീതടങ്ങളിലെ ഭൂവിനിയോഗത്തില്‍ വന്ന മാറ്റവും കുട്ടനാടിന്റെ ദുരന്തത്തിന്‌ കാരണമായി. ഈ മേഖലയിലെ വനവിസ്‌തൃതി 59%ല്‍ നിന്ന്‌ 30% ആയി കുറഞ്ഞു. തോട്ടം മേഖലയുടെ വിസ്‌തൃതി 27%ല്‍ നിന്ന്‌ 40% ആയും സെറ്റില്‍മെന്റ്‌ പ്രദേശത്തിന്റെ വിസ്‌തൃതി 13%ല്‍ നിന്ന്‌ 34% ആയും വര്‍ദ്ധിക്കുകയും ചെയ്‌തു. അതായത്‌, കായലിനു സംഭവിച്ച ദുര്‍ഗതി കായല്‍പ്രദേശത്ത്‌ മാത്രം നടന്ന ഇടപെടലിന്റെ ഫലമല്ല, മറിച്ച്‌ നീര്‍ത്തടത്തിലാകെ വന്ന ഭൂവിനിയോഗത്തിലെ മാറ്റം കൊണ്ടുണ്ടായതാണെന്ന്‌ ഇത്‌ വ്യക്‌തമാക്കുന്നു.

സ്വാഭാവിക ജലസംഭരണികളുടെ നാശം

മലനാട്‌, ഇടനാട്‌, തീരപ്രദേശം എന്നിങ്ങനെയായി കേരളത്തെ വിഭജിക്കുമ്പോള്‍ അതില്‍ ഇടനാടാണ്‌ പ്രളയജലത്തെ നൂറ്റാണ്ടുകളായി തടുത്തുനിര്‍ത്തിയിരുന്നതെന്ന്‌ ഭൗമ ശാസ്‌ത്രജ്‌ഞന്മാര്‍ വ്യക്‌തമാക്കുന്നു. നദികളോട്‌ ചേര്‍ന്നുള്ള പ്രകൃതിദത്ത ജലസംഭരണികളായ വയലുകളും നീര്‍തടങ്ങളും പ്രളയജലത്തെ ഏറ്റുവാങ്ങുന്നതോടെയാണ്‌ പടിഞ്ഞാറോട്ടുള്ള ജലപ്രവാഹം കുറയുന്നത്‌. എന്നാല്‍, ഹെക്‌ടര്‍ കണക്കിന്‌ വിസ്‌തൃതിയില്‍ പരന്നുകിടന്നിരുന്ന വയലുകള്‍ നികന്നതോടെ പ്രളയജലത്തെ ഉള്‍ക്കൊള്ളാന്‍ തീരത്ത്‌ സ്‌ഥലമില്ലാതായി മാറി. ശബരിമലയ്‌ക്ക്‌ മുകളില്‍ നിന്നും ഉത്ഭവിക്കുന്ന പമ്പാ നദിയുടെ പ്രയാണ വീഥി ഉദ്ദേശ്യം 70 കി.മീറ്ററോളം കടന്നുപോകുന്നത്‌ മലയിടുക്കുകള്‍ക്ക്‌ ഇടയിലൂടെയാണ്‌. കോഴഞ്ചേരിക്ക്‌ കിഴക്ക്‌ കീക്കൊഴൂര്‍ വരെ മലകളെ വകഞ്ഞുമാറ്റി ഒഴുകി വരുന്ന പമ്പയിലെ പ്രളയജലം സമ്മര്‍ദ്ദങ്ങളെ അതിജീവിച്ച്‌ വിശാലമായ മേഖലയിലേക്ക്‌ പ്രവേശിക്കുന്നത്‌ ആറന്മുളയില്‍ എത്തുമ്പോള്‍ മാത്രമാണ്‌. ആറന്മുളയ്‌ക്ക്‌ താഴെയുള്ള കോഴിത്തോട്ടിലൂടെ ഒഴുകി പമ്പയ്‌ക്ക്‌ സമാന്തരമായി കിടക്കുന്ന 1800 ഏക്കര്‍ വരുന്ന ആറന്മുള പുഞ്ചയിലേക്ക്‌ ജലം കടക്കുമ്പോള്‍ മാത്രമാണ്‌ പടിഞ്ഞാറോട്ടുള്ള കുത്തൊഴുക്കിന്‌ കുറവുണ്ടാകുന്നത്‌. എന്നാല്‍, ആറന്മുള പുഞ്ചയ്‌ക്ക്‌ സമാനമായ ആയിരക്കണക്കിന്‌ ഏക്കര്‍ വയല്‍ മേഖലയാണ്‌ ഇടനാട്ടിലും അപ്പര്‍കുട്ടനാട്ടിലും കുട്ടനാട്ടിലുമായി നശിച്ചത്‌. പ്രളയജലത്തിന്‌ കയറി ഒതുങ്ങാന്‍ ഇടനാട്‌ മേഖലയില്‍ സ്‌ഥലമില്ലാതായതോടെ വെള്ളം കുട്ടനാട്ടിലേക്ക്‌ ആര്‍ത്തിരമ്പി എത്താന്‍ കാരണമായി.
കേരളത്തില്‍ 1970 കാലഘട്ടങ്ങളില്‍ 8.8 ദശലക്ഷം ഹെക്‌ടര്‍ സ്‌ഥലത്ത്‌ നെല്‍കൃഷി ഉണ്ടായിരുന്നുവെന്നാണ്‌ കൃഷി വകുപ്പിന്റെ കണക്ക്‌. എന്നാല്‍, 2017-ലെ കണക്കുപ്രകാശം ശേഷിക്കുന്നത്‌ 1.71 ദശലക്ഷം ഹെക്‌ടര്‍ കൃഷിയിടം മാത്രം. ഇതില്‍ നല്ലൊരു ശതമാനം കൃഷിയിടവും നികന്നുകഴിഞ്ഞു. പമ്പയുടെ തീരത്ത്‌ കുറഞ്ഞത്‌ 15,000 ഏക്കര്‍ നെല്‍പാടമെങ്കിലും നികത്തിയതായാണ്‌ സൂചന. ഇടനാട്ടില്‍ പമ്പയുടെ ജലവാഹക ശേഷി കുറയ്‌ക്കാന്‍ ഇത്‌ കാരണമായി.
തിരുവല്ല താലൂക്കിലെ കോയിപ്രം കടപ്രയില്‍ പമ്പാ നദിക്ക്‌ സമാന്തരമായി ഉദ്ദേശ്യം നാല്‌ കി.മീറ്റര്‍ നീളത്തിലും 200 മീറ്ററോളം വീതിയിലും സ്‌ഥിതിചെയ്യുന്ന വരാച്ചാലിന്റെ ശോഷണം തന്നെ പ്രധാന ഉദാഹരണമാണ്‌. വരാച്ചാലിനെപ്പോലെ ധാരാളം നീര്‍ത്തടങ്ങള്‍ പമ്പയുടെ തീരത്ത്‌ നശിച്ചിട്ടുണ്ട്‌. പ്രളയജലം ഏറ്റുവാങ്ങിയിരുന്ന ഈ നീര്‍ത്തടങ്ങള്‍ നശിച്ചതോടെ ജലത്തെ ഏറ്റുവാങ്ങാന്‍ വേമ്പനാട്‌ കായല്‍ മാത്രമായി അവശേഷിച്ചു.

കുന്നുകളുടെയും പാറക്കെട്ടുകളുടെയും നാശം

സഹ്യമലകളുടെ ഉപശാഖകളായ കുന്നുകളുടെയും നദികളോട്‌ ചേര്‍ന്ന്‌ സ്‌ഥിതിചെയ്‌തിരുന്ന മലകളുടെയും നാശം വെള്ളപ്പൊക്കത്തിന്‌ മറ്റൊരു കാരണമായി. നദിയോട്‌ ചേര്‍ന്നുളള കുന്നുകളുടെ സവിശേഷതയാണ്‌ ഇതില്‍ പ്രധാനം. വന്‍ പാറകെട്ടുകള്‍ക്ക്‌ മുകളില്‍ പ്രകൃതി മണ്ണുകൊണ്ട്‌ പടുത്തുയര്‍ത്തിയതാണ്‌ കുന്നുകള്‍. പണ്ട്‌ ഈ കുന്നുകള്‍ക്ക്‌ മുകളില്‍ പെയ്യുന്ന മഴയെ ഏറ്റെടുക്കാനും സംഭരിക്കാനും മണ്ണും സസ്യലതാതികളും തയ്യാറായെങ്കില്‍ ഇന്ന്‌ മേല്‍മണ്ണ്‌ നഷ്‌ടപ്പെട്ട പാറക്കെട്ടുകളാണ്‌ ആ സ്‌ഥാനത്തുള്ളത്‌. പെയ്യുന്ന മഴ തുള്ളിപോലും മിച്ചം വയ്‌ക്കാതെ നദിക്ക്‌ ദാനം ചെയ്യാന്‍ ഈ പാറക്കെട്ടുകള്‍ തയ്യാറാകുന്നു എന്നതാണ്‌ ശ്രദ്ധേയം. പല പാറക്കെട്ടുകളും ഇന്ന്‌ ഖനനലോബി പൊട്ടിച്ച്‌ കടത്തിക്കഴിഞ്ഞു. ഇത്തരത്തില്‍ അഞ്ഞൂറിലധികം കുന്നുകളാണ്‌ പമ്പ, അച്ചന്‍കോവില്‍, മണിമല നദീതടങ്ങളില്‍ രൂപാന്തരം പ്രാപിച്ച്‌ പാറക്കെട്ടുകളായി മാറിയത്‌.

തോടുകളുടെ ശോഷണം

പ്രളയ ജലത്തെ പണ്ട്‌ ഏറ്റുവാങ്ങിയിരുന്ന തോടുകളില്‍ പലതും ഇന്ന്‌ എക്കല്‍ കയറി നികന്നതും പ്രശ്‌നം രൂക്ഷമാകാന്‍ കാരണമായി. പമ്പാ നദിയില്‍ മാത്രം ഏഴുപതില്‍പരം തോടുകള്‍ ഉണ്ടായിരുന്നുവെന്നാണ്‌ പമ്പാ പരിരക്ഷണ സമിതിയുടെ റിപ്പോര്‍ട്ടില്‍ പറയുന്നത്‌.
അപ്പര്‍കുട്ടനാട്ടിലെ നിരണം-കടപ്ര മേഖലയില്‍ മാത്രം 23 തോടുകള്‍ ഉണ്ടെന്നാണ്‌ കണക്ക്‌. അരീത്തോട്‌, കൊട്ടച്ചാല്‍, കൊലരയാര്‍, കരുവേലിത്തോട്‌, കുറ്റിക്കാട്ടില്‍ തോട്‌, നുച്ചിയില്‍ തോട്‌, വാട്ടപ്പറമ്പില്‍ തോട്‌, മാലിയില്‍ തോട്‌, തേവേരിതോട്‌, കണ്ണുന്തോട്ടുതോട്‌, പുരയ്‌ക്കല്‍പടി തോട്‌, എരത്തോട്‌, വൈക്കത്തില്ലം തോട്‌, മണിപ്പുഴത്തോട്‌, മുല്ലേനിത്തോട്‌ എന്നിവയാണ്‌ ഇതില്‍ പ്രധാനം. ഇവയുടെ പ്രവാഹശേഷിയെ ഏതാണ്ട്‌ പൂര്‍ണമായി എക്കല്‍ മണ്ണ്‌ അപഹരിച്ചുകഴിഞ്ഞു. അടിഞ്ഞുകൂടിയ ഈ എക്കല്‍ മണ്ണ്‌ എടുത്തുമാറ്റാന്‍ പോലും നടപടിയായിട്ടില്ല.

പ്രളയം കുട്ടനാട്ടില്‍ മാത്രം

കുട്ടനാട്ടില്‍ പ്രളയം നാശം വിതച്ചപ്പോള്‍ പമ്പയുടെയും പോഷകനദികളുടെയും പ്രയാണ വീഥിയായ ഇടനാട്ടില്‍ വെള്ളപ്പൊക്കം ഇക്കുറി ഉണ്ടായില്ലെന്നുള്ളത്‌ ശ്രദ്ധേയമാണ്‌. 2001-ലെ പ്രളയക്കെടുതിയില്‍ പത്തനംതിട്ട ജില്ലയിലെ ഇടനാട്‌ മേഖലയില്‍പ്പെട്ട വടശേരിക്കര, റാന്നി, അയിരൂര്‍, കോഴഞ്ചേരി, ആറന്മുള എന്നീ ഭാഗങ്ങള്‍ വെള്ളത്തില്‍ മുങ്ങിപ്പോയിരുന്നു. ഗതാഗതം നിലച്ചു.
ജനങ്ങള്‍ സുരക്ഷിത മേഖലകളിലേക്ക്‌ മാറി. എന്നാല്‍, അതിനേക്കാള്‍ രൂക്ഷമായ വെള്ളപ്പൊക്കമാണ്‌ ഇക്കുറി ഉണ്ടായതെങ്കിലും ഒരിടത്തും വെള്ളം കയറിയില്ലെന്നുള്ളതാണ്‌ ശ്രദ്ധേയം. കാരണം തോടുകള്‍ അടഞ്ഞു. വയലുകള്‍ ഇല്ലാതായി. തണ്ണീര്‍തടങ്ങള്‍ ശോഷിച്ചു. നദിയിലേക്കുള്ള റോഡുകള്‍ ഉയര്‍ന്നു. നദി മണല്‍വാരലിനെ തുടര്‍ന്ന്‌ താണു.
കുട്ടനാട്‌ പ്രളയത്തില്‍ മുങ്ങിത്താണ ഈ സമയം കിഴക്ക്‌ അയിരൂര്‍ നീര്‍പ്പാലത്തിന്‌ മുകളിലേക്ക്‌ നോക്കിയാല്‍ പമ്പ ഇതൊന്നും അറിയാതെ ഒഴുകുന്ന കാഴ്‌ച്ചയാണ്‌ ജനങ്ങള്‍ കണ്ടത്‌. മനുഷ്യന്‍ പ്രകൃതിക്കുമേല്‍ കാട്ടിയ വികൃതിയുടെ അനന്തര ഫലമാണിത്‌.
കുട്ടനാടിനെ ഈ വിധം കണ്ണീരിലാഴ്‌ത്താന്‍ മറ്റൊരു കാരണം നെല്‍പാടങ്ങളെ വകഞ്ഞുമാറ്റി അശാസ്‌ത്രീയമായി നിര്‍മ്മിച്ച റോഡുകളാണെന്ന്‌ പരിസ്‌ഥിതി ശാസ്‌ത്രജ്‌ഞനായ ഡോ.കെ.ജി. പത്മകുമാര്‍ ചൂണ്ടിക്കാട്ടുന്നു. അണക്കെട്ടുകള്‍ പോലെയാണ്‌ വയലുകള്‍ക്കു കുറുകെ റോഡ്‌ നിര്‍മ്മിച്ചിട്ടുള്ളത്‌.
പണ്ട്‌ വര്‍ഷകാലത്ത്‌ ജലം ഒരുപോലെ പരന്നുകിടന്നിരുന്ന വയലുകള്‍ക്ക്‌ നടുവിലൂടെ ഉയരത്തില്‍ നിര്‍മ്മിച്ച റോഡുകള്‍ ജലത്തിന്റെ വ്യാപനത്തിന്‌ തടയിടാന്‍ കാരണമായി. കുട്ടനാട്‌ പാക്കേജിനോടുള്ള അവഗണന, വേമ്പനാട്‌ കായലിന്റെ ശോഷണം, എന്നിവയാണ്‌ കുട്ടനാടിനെ പ്രളയകെടുതിയിലേക്ക്‌ തള്ളിവിടാനുള്ള മറ്റ്‌ കാരണങ്ങള്‍. അതേപ്പറ്റി നാളെ.

സജിത്ത്‌ പരമേശ്വരന്‍

Ads by Google
Saturday 28 Jul 2018 02.39 AM
YOU MAY BE INTERESTED
Ads by Google
Loading...
TRENDING NOW