Wednesday, November 14, 2018 Last Updated 13 Min 1 Sec ago English Edition
Todays E paper
Ads by Google
Saturday 21 Jul 2018 02.33 AM

കേരളത്തോടു മുഖംതിരിച്ച കേന്ദ്രനിലപാട്‌ നീതികേട്‌

uploads/news/2018/07/235005/bft1.jpg

സുശക്‌തമായ സംസ്‌ഥാനങ്ങള്‍ എന്നത്‌ സുശക്‌തമായ കേന്ദ്രത്തെ രൂപപ്പെടുത്തുന്ന പ്രധാന ഘടകമാണ്‌. കേന്ദ്രവും സംസ്‌ഥാനങ്ങളും തദ്ദേശഭരണ സ്‌ഥാപനങ്ങളും തമ്മില്‍ വിവിധതലങ്ങളിലുള്ള ബന്ധങ്ങള്‍ സമതുലിതവും സുദൃഢവുമായി നില്‍ക്കേണ്ടത്‌ ഫെഡറല്‍ സംവിധാനത്തിന്റെ നിലനില്‍പ്പിനും അതിജീവനത്തിനും അനിവാര്യമാണ്‌.
സംസ്‌ഥാനങ്ങള്‍ക്കു ഭരണഘടനാനുസൃതമായ കേന്ദ്രസഹായം ലഭിക്കാതെയും കേന്ദ്രത്തിന്‌ സംസ്‌ഥാനങ്ങളുടെ സഹകരണമില്ലാതെയും മുമ്പോട്ടുപോകാനാവില്ല. ഈ മനോഭാവത്തോടെയാണ്‌ കേരളത്തിന്റെ പ്രധാന പ്രശ്‌നങ്ങള്‍ ചിലതു മുന്‍നിര്‍ത്തി കേന്ദ്രത്തെ സമീപിക്കാന്‍ കേരളം നിശ്‌ചയിച്ചതും പ്രധാനമന്ത്രിയുടെ സമയം ചോദിച്ചതും. കൃത്യാന്തരബാഹുല്യം കൊണ്ടും യാത്രാത്തിരക്കുകള്‍ കൊണ്ടുമാവാം കേരളം ആവര്‍ത്തിച്ചു ചോദിച്ചിട്ടും പ്രധാനമന്ത്രി സമയമനുവദിച്ചില്ല. എന്നാല്‍, ഏറ്റവും ഒടുവിലെ വിദേശയാത്ര കഴിഞ്ഞ്‌ അദ്ദേഹം എത്തിയപ്പോള്‍ സമയം അനുവദിക്കപ്പെട്ടു. അങ്ങനെയാണ്‌ സര്‍വകക്ഷി പ്രതിനിധി സംഘം വ്യാഴാഴ്‌ച പ്രധാനമന്ത്രിയെ കണ്ടത്‌.
അടിയന്തര പ്രധാന്യമര്‍ഹിക്കുന്ന പ്രശ്‌നങ്ങള്‍ മാത്രം മുന്‍നിര്‍ത്തിയുള്ള നിവേദനമാണ്‌ പ്രധാനമന്ത്രിക്കു മുമ്പില്‍വെച്ചത്‌. എന്നാല്‍, കേരളത്തിന്റെ പൊതുതാല്‍പര്യത്തിലുള്ള പ്രതികരണമല്ല പ്രധാനമന്ത്രിയില്‍നിന്നുണ്ടായത്‌. നിര്‍ഭാഗ്യകരമായ കാര്യമാണിത്‌. ഏതു വിഷയവും പ്രധാനമന്ത്രിയെ ബോധ്യപ്പെടുത്താന്‍ സജ്‌ജമായിരുന്നു സര്‍വകക്ഷി സംഘം. എന്നാല്‍, അത്തരം വിശദാംശങ്ങളിലേക്കു കടന്നുള്ള ചര്‍ച്ചയ്‌ക്കുള്ള സാവകാശം പ്രധാനമന്ത്രിയില്‍നിന്നുണ്ടായില്ല.

ഭക്ഷ്യവിഹിതം വര്‍ധിപ്പിക്കണം

ഭക്ഷ്യവിഹിതം വര്‍ധിപ്പിക്കണമെന്നതായിരുന്നു കേരളത്തിന്റെ പ്രധാന ആവശ്യം. കേരളത്തിന്റെ സവിശേഷമായ സാഹചര്യത്തില്‍ ഇക്കാര്യത്തില്‍ സ്വയംപര്യാപ്‌തത എന്നത്‌ അസാധ്യമാണ്‌. കേരളത്തിന്‌ ആവശ്യമായ ഭക്ഷ്യധാന്യം കേന്ദ്രം നല്‍കുമെന്ന ഉറപ്പിന്റെ അടിസ്‌ഥാനത്തിലാണ്‌ സ്‌റ്റാറ്റ്യൂട്ടറി റേഷന്‍ സംവിധാനം കേരളത്തില്‍ രൂപപ്പെട്ടത്‌. കേന്ദ്ര നിര്‍ദേശത്തിന്റെ അടിസ്‌ഥാനത്തില്‍ രാജ്യത്തിന്‌ വിദേശനാണ്യം നേടിത്തരുന്ന നാണ്യവിളകളിലേക്കു കേരളം ശ്രദ്ധതിരിക്കുകയും ചെയ്‌തു. കേന്ദ്രവും കേരളവും യോജിപ്പോടെ രൂപപ്പെടുത്തിയ ഈ പദ്ധതിയാണ്‌ സ്‌റ്റാറ്റ്യൂട്ടറി റേഷന്‍ സംവിധാനം തകര്‍ക്കുന്നതിലൂടെ ഇല്ലാതായത്‌. അതുകൊണ്ടുതന്നെ ഏതു നിയമം വന്നാലും കേരളത്തിനാവശ്യമായ ഭക്ഷ്യധാന്യം നല്‍കേണ്ട ഉത്തരവാദിത്വം കേന്ദ്രസര്‍ക്കാരിനുണ്ട്‌.
90കളില്‍ 24 ലക്ഷം മെട്രിക്‌ ടണ്‍ ഭക്ഷ്യധാന്യം കിട്ടിയിടത്ത്‌ 2016ല്‍ 14.25 ലക്ഷം മാത്രമാണു കിട്ടിയത്‌. ജനസംഖ്യ ഉയര്‍ന്നു, കുടിയേറ്റ തൊഴിലാളികള്‍ വന്നു. ഇതിനൊക്കെ അനുസരിച്ച്‌ ഭക്ഷ്യവിഹിതം കൂടേണ്ടിടത്ത്‌ അതു കുത്തനെ കുറയ്‌ക്കുകയാണു കേന്ദ്രം ചെയ്‌തത്‌. അതുകൊണ്ടുതന്നെ കേരളത്തിന്റെ റേഷന്‍ വിഹിതം വര്‍ധിപ്പിക്കണമെന്ന ആവശ്യം തികച്ചും ന്യായമായ ഒന്നാണ്‌.
മുന്‍ഗണനേതര മേഖലയില്‍ 45 ലക്ഷം കുടുംബങ്ങളാണുള്ളത്‌. ഇത്‌ ജനസംഖ്യയുടെ 56 ശതമാനമാണ്‌. സംസ്‌ഥാനത്തിന്‌ പ്രതിമാസം ലഭ്യമാകുന്നത്‌ 33,384 ടണ്‍ ഭക്ഷ്യധാന്യമാണ്‌. ഇത്‌ സമതുലിതമായി വീതിച്ചാല്‍ ഒരാള്‍ക്ക്‌ ഒരുമാസം ലഭിക്കുന്നത്‌ ഒന്നേമുക്കല്‍ കിലോ അരി മാത്രമാണ്‌.
ഇതുകൊണ്ട്‌ എങ്ങനെയാണ്‌ ഭക്ഷ്യസുരക്ഷ സാധ്യമാവുക? മുന്‍ഗണനേതര മേഖലയിലെ വ്യക്‌തികള്‍ക്ക്‌ മാസം അഞ്ചുകിലോ അരിയെങ്കിലും നല്‍കണമെന്നത്‌ ദേശീയ ഭക്ഷ്യസുരക്ഷാ നിയമത്തില്‍തന്നെ പറയുന്ന കാര്യമാണ്‌. ഇത്‌ ഉറപ്പാക്കുന്നതിനുപോലും സംസ്‌ഥാനത്തിന്റെ ഭക്ഷ്യവിഹിതം ഉയര്‍ത്തേണ്ടതുണ്ട്‌. എന്നാല്‍, ഈ പ്രശ്‌നത്തില്‍ നിഷേധാത്മകമായ സമീപനമാണ്‌ കേന്ദ്രസര്‍ക്കാര്‍ സ്വീകരിച്ചത്‌. ഭക്ഷ്യവിഹിതം വര്‍ധിപ്പിക്കണം എന്ന ആവശ്യം ന്യായമാണെന്നു പ്രധാനമന്ത്രി അംഗീകരിക്കുന്നതേയില്ല. ഭക്ഷ്യസുരക്ഷാ നിയമത്തിന്റെ പശ്‌ചാത്തലത്തില്‍ പുതുതായി ഉണ്ടായിട്ടുള്ള പ്രശ്‌നങ്ങളുടെ കാര്യത്തിലും പരിഹാരത്തിനുതകുന്ന നിലപാടല്ല ഉണ്ടായത്‌.
കേന്ദ്രസംഭരണിയില്‍നിന്ന്‌ കൂടുതല്‍ അരി ലഭിക്കേണ്ടതുണ്ട്‌ എന്നു പറഞ്ഞപ്പോള്‍ അത്‌ പറ്റില്ല എന്ന നിലപാടാണ്‌ പ്രധാനമന്ത്രി െകെക്കൊണ്ടത്‌. മറ്റു സംസ്‌ഥാനങ്ങള്‍ക്ക്‌ നല്‍കുന്നതേ തരാന്‍ പറ്റു എന്ന്‌ പ്രധാനമന്ത്രി പറഞ്ഞപ്പോള്‍ കേരളത്തിന്റെ സവിശേഷ സാഹചര്യവും കേന്ദ്രവും സംസ്‌ഥാനവും തമ്മിലുണ്ടാക്കിയ ധാരണയുടെ കാര്യവും വ്യക്‌തമാക്കിയതാണ്‌. എന്നാല്‍, കേന്ദ്രനയത്തിന്റെ ഫലമായി സ്‌റ്റാറ്റ്യൂട്ടറി റേഷനിങ്ങും ഭക്ഷ്യകമ്മി ഉണ്ടായ പശ്‌ചാത്തലവും ഒന്നും പരിഗണിക്കില്ല എന്ന നിലപാടാണ്‌ പ്രധാനമന്ത്രിയുടെ ഭാഗത്തുനിന്നുണ്ടായത്‌.
ആ ഘട്ടത്തിലാണ്‌ ഭക്ഷ്യധാന്യരംഗത്തെ പൊതുസ്‌ഥിതി അവലോകനം ചെയ്യണമെന്ന നിര്‍ദേശം മുന്നോട്ടുവെച്ചത്‌. എന്നാല്‍, വിലയുമായി ബന്ധപ്പെട്ട കാര്യങ്ങള്‍ മാത്രമേ പുനഃപരിശോധിക്കാനാവു എന്ന നിഷേധാത്മക സമീപനമാണ്‌ പ്രധാനമന്ത്രിയില്‍നിന്ന്‌ ഉണ്ടായത്‌.

കോച്ച്‌ ഫാക്‌ടറി

പാലക്കാട്ടെ റെയില്‍വെ കോച്ച്‌ ഫാക്‌ടറിയുടെ കാര്യത്തിലും നിഷേധാത്മക നിലപാടാണുണ്ടായത്‌. കോണ്‍ഗ്രസ്‌ ഭരണകാലത്ത്‌ വാഗ്‌ദാനം ചെയ്യപ്പെട്ട പദ്ധതിയാണ്‌ ഇതെന്നും അന്ന്‌ നടപ്പാക്കാത്തതിനെക്കുറിച്ച്‌ ഇപ്പോള്‍ പറഞ്ഞിട്ടു കാര്യമില്ലെന്നുമുള്ള നിലപാടാണു പ്രധാനമന്ത്രി എടുത്തത്‌. ഇത്‌ ഞങ്ങളെ അല്‍ഭുതപ്പെടുത്തി. ഒരു സര്‍ക്കാര്‍ മറ്റൊരു സര്‍ക്കാരിന്റെ തുടര്‍ച്ചയായി വരുന്നതാണ്‌ എന്ന അടിസ്‌ഥാന കാഴ്‌ചപ്പാടുപോലും മറന്നുകൊണ്ടായിരുന്നു പ്രധാനമന്ത്രിയുടെ പ്രതികരണം.
പാലക്കാട്ട്‌ കോച്ച്‌ ഫാക്‌ടറി 1980കളില്‍കേന്ദ്രസര്‍ക്കാര്‍ ഉറപ്പുതന്നതാണ്‌. എന്നാല്‍, പഞ്ചാബില്‍ ഖാലിസ്‌ഥാന്‍ വാദം ശക്‌തപ്പെട്ട ഘട്ടത്തില്‍ അവിടുത്തെ സമരോത്സുകരെ തണുപ്പിക്കാന്‍ പാലക്കാട്ടെ നിര്‍ദിഷ്‌ട ഫാക്‌ടറി പഞ്ചാബിലെ കപൂര്‍ത്തലയിലേക്കു മാറ്റി പ്രഖ്യാപിക്കുകയായിരുന്നു. അത്‌ ഏതെങ്കിലും തെരഞ്ഞെടുപ്പിന്റെ മുമ്പായുള്ള ഘട്ടത്തിലല്ല. 2008-2009ല്‍ അന്നത്തെ റെയില്‍വെ മന്ത്രി ഇതിന്റെ പുനര്‍പ്രഖ്യാപനമാണ്‌ നടത്തിയത്‌. കോച്ച്‌ ഫാക്‌ടറി സ്‌ഥാപിക്കാനായി കേരളം 239 ഏക്കര്‍ ഏറ്റെടുക്കുകയും സ്‌ഥലം റെയില്‍വെയ്‌ക്കു െകെമാറി. അവിടെ കേന്ദ്രമന്ത്രി ശിലാസ്‌ഥാപനം നടത്തുകയും ചെയ്‌തു.
ആ സ്‌ഥലത്ത്‌ കേന്ദ്രം കോച്ച്‌ ഫാക്‌ടറി പണിയും എന്ന്‌ പ്രതീക്ഷിച്ചിരിക്കെയാണ്‌ അത്‌ നടക്കില്ലെന്നുള്ള പ്രഖ്യാപനം വന്നത്‌. ഇത്‌ കേരളത്തോട്‌ കാട്ടുന്ന അങ്ങേയറ്റത്തെ നീതികേടാണ്‌. 2008-2009ല്‍ ഇവിടേയ്‌ക്കായി പ്രഖ്യാപിക്കപ്പെട്ട ഫാക്‌ടറി പിന്നീട്‌ ഉത്തര്‍പ്രദേശിലെ റായ്‌ബറേലിയിലേക്ക്‌ മാറ്റിയതും അവിടെ ഉല്‍പാദനം തുടങ്ങിയതും ഇതിനോട്‌ ചേര്‍ത്തുവായിക്കണം.

ശബരി റെയില്‍പാത

അങ്കമാലി-ശബരി റെയില്‍പാതയുടെ കാര്യത്തില്‍ ചര്‍ച്ച നടത്താന്‍ റെയില്‍വെയ്‌ക്കു നിര്‍ദേശം നല്‍കാമെന്നു പ്രധാനമന്ത്രി പറഞ്ഞു. പാത പ്രാവര്‍ത്തികമാക്കുന്നതില്‍നിന്നു കേന്ദ്രം പിന്‍മാറുന്ന സ്‌ഥിതിയെക്കുറിച്ച്‌ സര്‍വകക്ഷിസംഘം ആശങ്ക രേഖപ്പെടുത്തിയപ്പോഴായിരുന്നു ഈ പ്രതികരണം.
കേന്ദ്ര റെയില്‍വെ ബജറ്റില്‍ ഉള്‍പ്പെടുത്തപ്പെട്ട പദ്ധതിയാണിത്‌. ശബരിമല ദേശീയശ്രദ്ധയില്‍ മാത്രമല്ല അന്തര്‍ദേശീയ ശ്രദ്ധയില്‍ പോലുമുള്ള തീര്‍ത്ഥാടനകേന്ദ്രമെന്ന നിലയ്‌ക്ക്‌ ഇതിന്റെ നിര്‍മാണച്ചെലവ്‌ പൂര്‍ണമായും കേന്ദ്രം തന്നെ വഹിക്കേണ്ടതാണ്‌.

മഴക്കെടുതി, കസ്‌തൂരിരംഗന്‍ റിപ്പോര്‍ട്ട്‌

നിവേദനത്തില്‍ ഉന്നയിച്ച പ്രധാന ആവശ്യങ്ങളിലൊന്ന്‌ മഴക്കെടുതിയും വെള്ളപ്പൊക്കവും മുന്‍നിര്‍ത്തി പ്രത്യേക സഹായം വേണമെന്നതാണ്‌. ഏതായാലും ഇക്കാര്യത്തില്‍ കേന്ദ്രസംഘത്തെ അയക്കാമെന്ന ഉറപ്പ്‌ പ്രധാനമന്ത്രിയില്‍നിന്നു ലഭിച്ചിട്ടുണ്ട്‌. കസ്‌തൂരി രംഗന്‍ റിപ്പോര്‍ട്ടുമായി ബന്ധപ്പെട്ട പ്രശ്‌നങ്ങളില്‍ പ്രധാനമന്ത്രി അനുകൂലമായി ഒന്നും പറഞ്ഞില്ല. പശ്‌ചിമഘട്ടത്തിലെ റിസര്‍വ്‌ ഫോറസ്‌റ്റ്‌ തുടങ്ങിയ സംരക്ഷിത മേഖലകളെ മാത്രം ഇ.എസ്‌.എയായി കണക്കാക്കി ജനവാസ പ്രദേശങ്ങളെയും പ്ലാന്റേഷനുകളെയും അതില്‍നിന്ന്‌ ഒഴിവാക്കണമെന്നതാണ്‌ സംസ്‌ഥാന സര്‍ക്കാരിന്റെ നിലപാട്‌.

വേണ്ടതു സംസ്‌ഥാനത്തിനു യോജിച്ച പദ്ധതികള്‍

ആസൂത്രണത്തിലും പദ്ധതി നിര്‍വഹണത്തിലും രാജ്യത്തിനു മാതൃകയാണു കേരളം. ചുരുങ്ങിയ വിഭവങ്ങള്‍ നീതിയുക്‌തമായി വിതരണം ചെയ്‌താണ്‌ കേരളം പല മാനവ വികസന സൂചികകളിലും ലോകത്തെ ഏറ്റവും വികസിത രാജ്യങ്ങള്‍ക്കു സമാനമായ നിലയിലേക്ക്‌ ഉയര്‍ന്നുവന്നത്‌. ഉയര്‍ന്ന വികസന സൂചികകള്‍ െകെവരിച്ചിട്ടുള്ള കേരളത്തെ വികസനത്തിന്റെ അടുത്ത പടിയിലേക്ക്‌ കയറാന്‍ പ്രാപ്‌തമാക്കുന്നവയാണ്‌ നിര്‍ദേശിച്ച പുതിയ പദ്ധതികള്‍. കേന്ദ്രം പലപ്പോഴും സ്വീകരിക്കുന്ന "വണ്‍ െസെസ്‌ ഫിറ്റ്‌സ്‌ ഓള്‍" എന്ന തരത്തിലുള്ള വികസന കാഴ്‌ചപ്പാട്‌ കേരളത്തിനനുയോജ്യമായതല്ല. കേരളത്തിന്റെ പ്രത്യേകതകള്‍ ഉള്‍ക്കൊള്ളുന്ന കാഴ്‌ചപ്പാടും പദ്ധതികളുമാണ്‌ നമുക്കു വേണ്ടത്‌. നമ്മുടെ നേട്ടങ്ങളെ ഇനിയും മുമ്പോട്ടുകൊണ്ടുപോവുകഎന്നതാണാവശ്യം. അതിനു സഹായകമാകുന്ന കേന്ദ്രപദ്ധതികള്‍ നല്ല നിലയില്‍ സംസ്‌ഥാനം പൂര്‍ത്തിയാക്കിയിട്ടുണ്ട്‌.
നമുക്കുവേണ്ട പദ്ധതികള്‍ ആവിഷ്‌കരിക്കാനും നടപ്പിലാക്കാനുമുള്ള അവകാശം സംരക്ഷിക്കുന്ന തരത്തില്‍ അവയ്‌ക്കുവേണ്ട സാമ്പത്തികസഹായം ഉറപ്പുവരുത്തുകയാണു കേന്ദ്രം ചെയ്യേണ്ടത്‌.
ജി.എസ്‌.ടിയും മറ്റും നടപ്പിലാക്കിയതിലൂടെ സംസ്‌ഥാനങ്ങള്‍ക്ക്‌ പരിമിതമായി ഉണ്ടായിരുന്ന സാമ്പത്തികാവകാശങ്ങള്‍ പോലും ഇപ്പോള്‍ ഇല്ലാതായിരിക്കുകയാണ്‌. അതിന്റെ അടുത്തപടിയെന്നോണം സംസ്‌ഥാനങ്ങളുടെ വിഭവങ്ങള്‍ ഇന്നയിന്ന മേഖലകളില്‍ ഉപയോഗിക്കണം എന്നു കേന്ദ്രം നിര്‍ദേശിക്കുന്നത്‌ ആശാവഹമല്ല. പദ്ധതികള്‍ ആസൂത്രണം ചെയ്യാന്‍ സംസ്‌ഥാനങ്ങള്‍ക്കുള്ള അവകാശം കേന്ദ്രം ഉറപ്പുവരുത്തുമ്പോള്‍മാത്രമേ ഫെഡറലിസം അര്‍ഥവത്താവുകയുള്ളു.

പിണറായി വിജയന്‍
(മുഖ്യമന്ത്രി)

Ads by Google
Saturday 21 Jul 2018 02.33 AM
YOU MAY BE INTERESTED
Ads by Google
Loading...
TRENDING NOW