പതിവായി കുഞ്ഞ് ചരിഞ്ഞു കിടന്നുറങ്ങുന്നതുകൊണ്ട് ദോഷമുണ്ടോ? കുഞ്ഞിന്റെ ആരോഗ്യത്തില്‍ കിടപ്പിന്റെ രീതിക്ക് പ്രാധാന്യമുണ്ടോ?

പഠന വൈകല്യ മാണെങ്കില്‍ പലതരം ടീച്ചിംഗ് ടെക്‌നിക്കുകളിലൂടെ പരിഹാരം കണ്ടെത്താന്‍ സാധിക്കും

പഠനത്തില്‍ ശ്രദ്ധിക്കുന്നില്ല

മകന് 10 വയസ്. പഠനകാര്യത്തില്‍ അവന്‍ വളരെ പിന്നിലാണ്. ആറാം ക്ലാസില്‍ ആയിട്ടും അവന് അക്ഷരങ്ങള്‍ വായിക്കാനും പറയാനും കഴിയുന്നില്ല. മറ്റു കാര്യത്തിലൊക്കെ മിടുക്കനാണ്. പഠനത്തോട് താല്പര്യം വളരെക്കുറവാണ്. സ്‌കൂളില്‍ പോകാനും ഇഷ്ടമല്ല. പഠനത്തോടുള്ള അവന്റെ മടി മാറ്റിയെടുക്കാന്‍ കഴിയുമോ?
------ ആനന്ദ്കുമാര്‍ ,പിറവം

മകന് പഠനവൈകല്യമുണ്ടോ എന്ന് പരിശോധിച്ചറിയണം. എന്തായാലും പഠിക്കാനുള്ള മടികൊണ്ടാവാന്‍ സാധ്യതയില്ല. പഠന വൈകല്യമുള്ള കുട്ടികള്‍ക്ക് അക്ഷരങ്ങള്‍ എഴുതാന്‍ കഴിഞ്ഞെന്നുവരില്ല. മറ്റ് കാര്യങ്ങളില്‍ കുട്ടി അതി സമര്‍ഥനുമായിരിക്കും. എഴുതാ ന്‍ അറിയില്ലെങ്കിലും ക്ലാസില്‍ ചോദ്യം ചോദിച്ചാല്‍ ഉത്തരം പറയുവാന്‍ കഴിയും.

അതേപോലെ വരയിലും സ്‌പോര്‍ട്‌സിലുമൊക്കെ ഇത്തരം കുട്ടികള്‍ മിടുക്ക് തെളിച്ചെന്നിരിക്കും. പറഞ്ഞുകൊണ്ട് എഴുതിയാലും സ്‌പെല്ലിംഗ് തെറ്റായി എഴുതുക, ചെറിയ തുകയില്‍ നിന്നും വലിയ തുക കുറയ്ക്കുക തുടങ്ങിയ പല പ്രശ്‌നങ്ങളും ഈ കുട്ടികളില്‍ സാധാരണമാണ്. കുട്ടിയെ ഒരു പീഡിയാട്രിഷനെ കാണിക്കണം. പഠന വൈകല്യമാണെങ്കില്‍ പലതരം ടീച്ചിംഗ് ടെക്‌നിക്കുകളിലൂടെ പരിഹാരം കണ്ടെത്താന്‍ സാധിക്കും.

ചരിഞ്ഞു കിടന്ന് ഉറക്കം

മകന് രണ്ടു വയസ് പ്രായം. അവന്‍ ചരിഞ്ഞുകിടന്നാണ് ഉറങ്ങുന്നത്. നേരെ കിടത്തിയാലും കുട്ടി ചരിഞ്ഞുതന്നെ കിടക്കും. പതിവായി കുഞ്ഞ് ഇങ്ങനെ ചരിഞ്ഞു കിടന്നുറങ്ങുന്നതുകൊണ്ട് ദോഷമുണ്ടോ? കുഞ്ഞിന്റെ ആരോഗ്യത്തില്‍ കിടപ്പിന്റെ രീതിക്ക് പ്രാധാന്യമുണ്ടോ?
------- രമ്യ നായര്‍, താമരശേരി

കുട്ടികളാണെങ്കിലും മുതിര്‍ന്നവരാണെങ്കിലും ഓരോരുത്തര്‍ക്കും കിടക്കുന്ന രീതി വ്യത്യസ്തമായിരിക്കും. ഓരോരുത്തരും യോജിക്കുന്ന രീതിയിലാണ് കിടക്കുന്നത്. അതിനാല്‍ കുഞ്ഞിന്റെ കിടക്കുന്ന രീതിക്ക് വലിയ പ്രാധാന്യമൊന്നുമില്ല. അതേസമയം ആറുമാസത്തില്‍ താഴെ പ്രായമുള്ള കുട്ടികളെ കമിഴ്ത്തി കിടത്തി ശീലിക്കാതിരിക്കുന്നതാണ് നല്ലത്.

കുഞ്ഞുങ്ങളുടെ കിടപ്പ് അവരുടെ സൗകര്യത്തിനാണ്. മുതിര്‍ന്നവരെപ്പോലെ ഏതെങ്കിലും ഒരു പ്രത്യേക രീതിയില്‍ അവര്‍ കിടക്കണം എന്ന് നിര്‍ബന്ധിക്കാനാവില്ല. ക്രമേണ അവര്‍ കിടപ്പിന്റെ രീതി കണ്ടെത്തും. അതുകൊണ്ടുതന്നെ കുഞ്ഞ് ചരിഞ്ഞു കിടന്ന് ഉറങ്ങുന്നത് രോഗലക്ഷണമായി കരുതാനാവില്ല.

കുഞ്ഞിന്റെ ശാരീരിക വളര്‍ച്ചയെക്കുറിച്ചും നടക്കാന്‍ തുടങ്ങിയതിനെക്കുറിച്ചും കൂടി അറിയാന്‍ കഴിഞ്ഞാല്‍ മാത്രമേ ഇതില്‍ ഏതെങ്കിലും തരത്തിലുള്ള ആരോഗ്യപ്രശ്‌നമുണ്ടോ എന്ന് കണ്ടെത്താനാവുകയുള്ളു. കത്തി ല്‍ പറഞ്ഞിരിക്കുന്ന വിവരങ്ങളുടെ അസിസ്ഥാനത്തില്‍ താങ്കള്‍ ഭയപ്പെടേണ്ടതായി ഒന്നുമില്ല.

ക്ഷീണവും ഉറക്കവും

മകന് 15 വയസ്. അവന് ഉറക്കം കൂടുതലാണ്. വൈകിട്ട് എട്ടു മണിക്ക് കിടക്കും. രാവിലെ എട്ടു മണിക്ക് ഉണരും. ഇതുമൂലം പഠനം ശരിയാവുന്നില്ല. ക്ലാസില്‍ ചെന്നാലും ഉറക്കം തന്നെ. അധ്യാപകര്‍ പലതവണ വിളിപ്പിച്ചു. ക്ഷീണമാണെന്നാണ് അവന്‍ പറയുന്നത്. സദാ ക്ഷീണിതനായാണ് അവനെ കാണുന്നത്. ഡോക്ടറെ കണ്ട് പരിശോധിച്ചിരുന്നു. രക്തക്കുറവുണ്ടെന്ന് പറഞ്ഞു. രക്തമുണ്ടാകാനുള്ള ടോണിക് തന്നു. എന്നിട്ടും മാറ്റമൊന്നുമില്ല. എന്തുകെണ്ടാണ് ഇങ്ങനെ ക്ഷീണവും ഉറക്കവും അനുഭവപ്പെടുന്നത്. ?
------ പ്രജുല ,ഡല്‍ഹി

കത്തില്‍ നിന്നും മനസിലാകുന്ന വിവരങ്ങള്‍ അനുസരിച്ച് കുട്ടിക്ക് ഒപ്‌സ്ട്രക്ടീവ് സ്ലീപ് അപ്നിയ എന്ന അവസ്ഥയാവാനാണ് സാധ്യത. അഡിനോഡ് ഗ്രന്ഥിയുടെയോ ടോന്‍സിലിന്റെയോ തകരാര്‍ മൂലം ശ്വാസതടസം അനുഭവപ്പെടുകയും ഇതിന്റെ ഫലമായി ഉറക്കത്തിന് തടസം നേരിടുകയോ ചെയ്യുന്ന അവസ്ഥയാണിത്. ഇത്തരം പ്രശ്‌നമുള്ള കുട്ടികള്‍ കൂര്‍ക്കംവിലിക്കുന്നരായിരിക്കും.

ശ്വാസോച്ഛ്വാസത്തിന് തടസം നേരിടുന്നതുകൊണ്ടാണിത്. ഇതുമൂലം ഉറക്കത്തില്‍ പലതവണ കുട്ടി അറിയാതെ ഉണരുന്നു. ഓരോ തവണ ഉണരുമ്പോഴും ഉറക്കം മുറിയുന്നു. ശരിയായ ഉറക്കം നഷ്ടമാവുന്നു.

ക്ലാസില്‍ ഉറക്കംതൂങ്ങുന്നതും ക്ഷീണവും അനുഭവപ്പെടുന്നതും ഇതുകൊണ്ടാകണം. പത്തുവയസുള്ള കുട്ടി ശരാശരി 8 മുതല്‍ 9 മണിക്കൂര്‍ വരെ ഉറങ്ങണം. ഡോക്ടറെ കാണിക്കണം. കൂര്‍ക്കംവലിയുണ്ടെങ്കില്‍ അക്കാര്യവും ഡോക്ടറുടെ ശ്രദ്ധയില്‍ പെടുത്തണം.

വൃഷണസഞ്ചിക്ക് വീക്കവും വേദനയും

എട്ടു വയസുള്ള എന്റെ മകന്റെ വൃഷണ സഞ്ചിക്ക് വീക്കം കാണുന്നു. വേദനയുമുണ്ട്. ഒരാഴ്ചയായി ഇതു കണ്ടു തുടങ്ങിയിട്ട്. സമീപത്തുള്ള ആശുപത്രിയില്‍ കാണിച്ചു. ക്ഷതമേറ്റതാകാമെന്ന്് ഡോക്ടര്‍ പറഞ്ഞു. വേദന കുറയുന്നതിനുള്ള ഗുളികയും തന്നു. ഇപ്പോള്‍ മൂത്രം പോകുന്നതിനു വേദനയുണ്ട്. എന്താണ് ഇതിനു കാരണം? വൃഷണസഞ്ചിക്കുണ്ടാകുന്ന വീക്കം മാറാന്‍ എന്താണ് ചെയ്യേണ്ടത്? ഏതു ഡോക്ടറെയാണ് കാണിക്കേണ്ടത്?
------ മനോഹരന്‍ ,തൃശൂര്‍

കുട്ടികളില്‍ പല കാരണങ്ങള്‍കൊണ്ട് വൃഷണസഞ്ചിക്ക് വീക്കവും വേദനയും ഉണ്ടാകാം. വൃഷണസഞ്ചിക്ക് ശക്തമായ ക്ഷതമേല്‍ക്കുക, വൃഷണസഞ്ചിക്ക് പെട്ടെന്നുണ്ടാകുന്ന വീക്കം ഒരുപക്ഷേ വൃഷണം തിരിയുക അല്ലെങ്കില്‍ ടോര്‍ഷന്‍ ഓഫ് ടെസ്റ്റിസ് എന്ന അസുഖം കൊണ്ടാവാം. ഇതുമൂലം വൃഷണത്തിന് അതികഠിനമായ വേദന അനുഭവപ്പെടും.

കൂടാതെ ഛര്‍ദി, വയറുവേദന തുടങ്ങിയ അസ്വസ്ഥതകളും ഉണ്ടാകും. വൃഷണസഞ്ചിയില്‍ ഒരു നാളിയില്‍ തൂങ്ങിയാണ് വൃഷണം സ്ഥിതിചെയ്യുന്നത്. ഈ നാളിവഴിയാണ് വൃഷണത്തിലേക്ക് രക്തം എത്തുന്നത്. ഈ നാളി ചില സാഹചര്യത്തില്‍ കയറുപോലെ പിരിയാനിടയുണ്ട്. ഇങ്ങനെ തിരിയുന്നതിന്റെ ഭാഗമായി വൃഷണത്തിലേക്കുള്ള രക്തയോട്ടം നിലയ്ക്കുന്നു.

ഇതിന്റെ ഫലമായി വൃഷണത്തില്‍ വേദനയും വീക്കവും ഉണ്ടാകും. അടിയന്തിര ചികിത്സ ലഭ്യമാക്കേണ്ട രോഗാവസ്ഥയാണിത്. എന്നാല്‍ കത്തില്‍ പറഞ്ഞിരിക്കുന്ന വിവരങ്ങളുടെ അടിസ്ഥാനത്തില്‍ കുട്ടിയുടെ വൃഷണസഞ്ചിയിലെ എപ്പിഡൈഡിമോ എന്ന ഭാഗത്തിനുണ്ടായ വീക്കമാകാനാണ് സാധ്യത കൂടുതല്‍.

നെറ്റിയിലെ മുഴ

എന്റെ മകള്‍ക്ക് 15 വയസ്. നന്നേ ചെറുപ്രായത്തിലുണ്ടായ വീഴ്ചയെത്തുടര്‍ന്ന് നെറ്റിയില്‍ മുഴയുണ്ടായി. എന്നാല്‍ കുട്ടിക്ക് വളര്‍ച്ച ആരംഭിച്ചപ്പോള്‍ ശരീരം തടിക്കുകയും മുഴ അപ്രത്യക്ഷമാവുകയും ചെയ്തു. ഇപ്പോള്‍ ആര്‍ത്തവത്തെത്തുടര്‍ന്ന് ശരീരം ക്ഷീണിക്കാന്‍ തുടങ്ങി. അതോടെ നെറ്റിയിലെ മുഴ തെളിഞ്ഞു കാണാറായി. നെറ്റിയിലെ മുഴയുടെ പേരില്‍ കുട്ടികള്‍ കളിയാക്കുന്നു. ഇതു മാറാന്‍ എന്തുചെയ്യണം. സര്‍ജറി വേണ്ടിവരുമോ?
-------- സോമി ജോസഫ് ,ചാലക്കുടി

ചെറുപ്പകാലത്ത് വീഴ്ചയെത്തുടര്‍ന്ന് നെറ്റിയിലുണ്ടായ മുഴ പതിനഞ്ച് വര്‍ഷങ്ങള്‍ക്കു ശേഷവും നിലനില്‍ക്കുന്നത് സ്വാഭാവികമല്ല. അതുകൊണ്ട് ഇപ്പോള്‍ കാണപ്പെടുന്ന മുഴയുടെ കാരണമെന്തെന്ന് കണ്ടെത്താന്‍ വിദഗ്ധനായൊരു സര്‍ജനെ കണ്ട് പരിശോധന നടത്തേണ്ടിവരും.

സര്‍ജറിയുടെ ആവശ്യമുണ്ടോ എന്ന് മുഴയുടെ സ്വഭാവം അറിഞ്ഞശേഷം മാത്രമേ നിശ്ചയിക്കാനാവുകയുള്ളു. മറ്റൊരു കാര്യം, ആര്‍ത്തവത്തെത്തുടര്‍ന്ന് ശരീരം ക്ഷീണിക്കാന്‍ തുടങ്ങിയിരിക്കുന്നു എന്ന് കത്തില്‍ പറഞ്ഞിരിക്കുന്നു. അതിനാല്‍ കുട്ടിക്ക് വിളര്‍ച്ചയുണ്ടോ എന്നും പരിശോധിക്കേണ്ടതായുണ്ട്.

നെറ്റിയില്‍ ജന്മനാതന്നെ ഈ മുഴ ഉണ്ടോ എന്നും പരിശോധിക്കണം. ചിലപ്പോള്‍ വീണപ്പോള്‍ മാത്രമാവാം മുഴ നിങ്ങളുടെ ശ്രദ്ധയില്‍പെട്ടത്. ശരീരം തടിച്ചപ്പോള്‍ മുഴ അപ്രത്യക്ഷമാവുകയും പിന്നീട് മെലിഞ്ഞപ്പോള്‍ തെളിഞ്ഞുവന്നതാവാം

ഡോ. സുരേഷ് എസ്. വടക്കേടം
അസിസ്റ്റന്റ് പ്രൊഫസര്‍,
ഇന്‍സ്റ്റിറ്റ്യൂട്ട് ഓഫ് ചൈല്‍ഡ് ഹെല്‍ത്ത്,
മെഡിക്കല്‍ കോളജ്, കോട്ടയം