ചെറിയ രാജകുമാരന്‍

ഇളയരാജ എന്ന പുതിയ ചിത്രത്തില്‍ അഭിനയിക്കാന്‍ പോകുന്നതിന്റെ സന്തോഷത്തിലാണ് ഗിന്നസ് പക്രു. ഗിന്നസ് പക്രു ശരിക്കുമൊരു കൊച്ചു രാജാവ് തന്നെയാണ്. കലകളുടെ ലോക ത്തെ ചെറിയ വലിയ രാജകുമാരന്‍. മിമിക്രി വേദികളിലെ താരമായിത്തീര്‍ന്ന 76 ഇഞ്ച് മാത്രമുള്ള ഈ കലാകാരന്‍ കീഴടക്കിയ നേട്ടങ്ങളുടെ പൊക്കം ചെറുതല്ല.

നടന്‍, സംവിധായകന്‍ എന്നീ വേഷങ്ങളില്‍ തിളങ്ങുന്ന ഗിന്നസ് പക്രു എന്ന അജയകുമാര്‍ താന്‍ അഭിനയിക്കാന്‍ പോകുന്ന പുതിയ ചിത്രത്തെക്കുറിച്ചും സംവിധാനം ചെയ്യാന്‍ പോകുന്ന ചിത്രത്തെക്കുറിച്ചുമുള്ള വിശേഷങ്ങള്‍ പങ്കുവയ്ക്കുന്നു. ഒപ്പം തന്റെ കുടുംബ വിശേഷങ്ങളും.

പുതിയ സിനിമയില്‍ ഗൗരവമുള്ള വേഷത്തിലാണല്ലോ?

മേല്‍വിലാസം, അപ്പോത്തിക്കിരി എന്നീ ചിത്രങ്ങള്‍ക്ക് ശേഷം രാംദാസ് ചെയ്യുന്ന ഇളയരാജയില്‍ എനിക്ക് പ്രധാന വേഷമാണ്. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ ഇറങ്ങി കഴിഞ്ഞു. എനിക്ക് കിട്ടാവുന്നിതില്‍ വച്ച് ഏറ്റവും നല്ല കഥാപാത്രമാണിതെന്ന് വിശ്വസിക്കുന്നു.

സിനിമയില്‍ നല്ലൊരു കഥാപാത്രം ചെയ്തിട്ടിപ്പോള്‍ മൂന്ന് വര്‍ഷം കഴിഞ്ഞു. ഇത്രയും നാളത്തെ കാത്തിരിപ്പിന് ശേഷം ലഭിച്ച ഈ ചിത്രത്തെക്കുറിച്ച് വലിയ പ്രതീക്ഷയുണ്ട്. ജീവിതഗന്ധിയായ സിനിമയാണിത്.

ടി.വി.യില്‍ സജീവമാണല്ലോ?

ഫ്‌ളവേഴ്‌സ് ടി. വിയിലെ കോമഡി ഉത്സവത്തില്‍ ജഡ്ജായി വന്നപ്പോള്‍ എന്തോ മാറ്റം വന്നതുപോലായി. കാരണം ദിവസവും സാധാരണക്കാരായ എത്രയോ കലാകാരന്‍മാരെയാണ് അടുത്തറിയാന്‍ കഴിയുന്നത്.

ഞാനും ടിനി ടോമും കൂടി ചെയ്ത എല്ലാ പ്രോഗ്രാമുകളും ശ്രദ്ധിക്കപ്പെട്ടിട്ടുണ്ട്. സവാരി ഗിരിഗിരി, ഫൈവ് സ്റ്റാര്‍ തട്ടുകട ഇപ്പോള്‍ കോമഡി ഉത്സവവും. എല്ലാ സാധാരണക്കാരനിലും ഒരു ടാലന്റുണ്ട്. അതൊക്കെ പുറത്തുകൊണ്ടുവരാനുള്ള അവസരമായാണ് ഞാന്‍ ഈ പ്രോഗ്രാമിനെ കാണുന്നത്. അതുകൊണ്ടാണ് ഈ ഷോ അത്രയും ജനകീയമായത്.

ഇന്നിപ്പോള്‍ ആളുകള്‍ക്ക് നമ്മളെ കാണുമ്പോള്‍ ഒരു പ്രത്യേക സ്‌നേഹമാ ണ്. ഈ ഷോയില്‍ ജഡ്ജ്‌മെന്റില്ല, എലിമിനേഷനില്ല പകരം പ്രോത്സഹനം മാത്രം. സാധാരണക്കാരനിലെ കലാവാസനയെ പ്രോത്സാഹിപ്പിക്കുന്ന ഇങ്ങനെ ഒരു വേദിയുടെ ഭാഗമാകാന്‍ കഴിഞ്ഞതില്‍ സന്തോഷമുണ്ട്.

കലാകാരന്‍മാര്‍ക്ക് താങ്ങായി നില്‍ക്കുന്നുണ്ടല്ലോ?

തീര്‍ച്ചയായും. ഞാന്‍ കലാരംഗത്ത് വന്ന കാലത്ത് ഒരുപാട് കഷ്ടപ്പെട്ടിട്ടുണ്ട്. അതുപോലുള്ള കഷ്ടപ്പാടുകള്‍ അനുഭവിക്കുന്നവരെ തീര്‍ച്ചയായും സഹായിക്കാനാഗ്രഹമുണ്ട്. അവര്‍ക്ക് മാനസികമായുള്ള ഊര്‍ജം നല്‍കുന്നതാണ് ഏറ്റവും പ്രധാനം.

എന്നെപ്പോലുളളവരും, സെറിബ്രല്‍ പാള്‍സി, ഓട്ടിസം എന്നിങ്ങനെയുള്ള അസുഖങ്ങളുമായി വരുന്ന ധാരാളം കലാകാരന്മാരുണ്ട്. അവര്‍ക്കൊക്കെ ഒരു വേദി കൊടുക്കാന്‍ കോമഡി ഉത്സവത്തിലൂടെ കഴിയുന്നുണ്ട്.

എറണാകുളത്ത് ലൈഫ് കെയര്‍ എന്നൊരു സ്ഥാപനമുണ്ട്. ഡോ. ബിജുവാണ് അതിന്റെ സ്ഥാപകന്‍. വൈകല്യങ്ങളുള്ള കുട്ടികളെ സാധാരണ ജീവിതത്തിലേക്ക് കൊണ്ടുവരാന്‍ സപ്പോര്‍ട്ട് ചെയ്യുന്ന സ്ഥാപനമാണ്.

അതിന്റെ അഡൈ്വസറി ബോര്‍ഡ് മെമ്പറാണ് ഞാന്‍. അതുകൊണ്ടുതന്നെ അത്തരക്കാരായ കുഞ്ഞുങ്ങള്‍ക്ക് ഒരു കൈത്താങ്ങാകാന്‍ ഈ സ്ഥാപനത്തിലെ അംഗമെന്ന നിലയില്‍ എനിക്ക് കഴിയുന്നുണ്ട്.

മകള്‍ക്ക് കൂട്ടുകാരനെപ്പോലെയാണോ?

ദീപ്ത കീര്‍ത്തിക്ക് ഞാന്‍ കളിക്കൂട്ടുകാരനാണ്. തികച്ചും സാധാരണക്കാരനായ അച്ഛനും ഭര്‍ത്താവുമാണ് ഞാന്‍. ജോലി ഭാരമൊക്കെ ഇറക്കിവച്ച് അവളുടെ അടുത്തേക്ക് എത്തുമ്പോള്‍ കിട്ടുന്ന ആശ്വാസം ചെറുതല്ല.

അച്ഛന്‍ എന്ന പദത്തിന്റെ അര്‍ഥം ഉത്തരവാദിത്തം എന്നുകൂടിയാണ്. ഞാനും ഭാര്യ ഗായത്രിയും അവള്‍ക്ക്് മാനസികമായി സപ്പോര്‍ട്ട് കൊടുക്കുകയും അവളുടെ കഴിവുകളെ പ്രോത്സാഹിപ്പിക്കുകയും ചെയ്യുന്നുണ്ട്. കലയെ ഇഷ്ടപ്പെടുന്ന കുട്ടിയാണവള്‍.

മോള്‍ക്ക് തമാശ സിനിമകളാണ് കൂടുതലിഷ്ടം. ദിലീപ് ഫാനാണവള്‍. ഞാനും ദിലീപേട്ടനും ഒന്നിച്ചഭിനയിച്ച സിനിമകളാണ് അവളുടെ ഫേവറേറ്റ്. സ്വന്തമായി കൊറിയോഗ്രഫി ചെയ്ത് ഡാന്‍സ് ചെയ്യുന്നതാണ് അവളുടെ വിനോദം. ആരും പഠിപ്പിച്ച് കൊടുക്കുന്നതിഷ്ടമല്ല.

അവള്‍ ഗംഭീരമായി മിമിക്രി ചെയ്യുമെന്ന് ഞാന്‍ തിരിച്ചറിഞ്ഞത് ഒരിക്കല്‍ കോമഡി ഉത്സവത്തില്‍ പ്രോഗ്രാം ചെയ്തപ്പോഴാണ്. ഒരുതവണ കോമഡി ഉത്സവത്തിന്റെ ഷൂട്ടിംഗ് കാണാന്‍ മോളെയും കൊണ്ടുപോയിരുന്നു.

ഞാന്‍ അറിയാതെ ഷോയുടെ ആളുകള്‍ ടിനിയെ കൂട്ടുപിടിച്ച് അവളെ സ്‌റ്റേജില്‍ കയറ്റി. അന്ന് ബാഹുബലിയിലെ കാലകേയനെയൊക്കെ ഇമിറ്റേറ്റ് ചെയ്ത് അവള്‍ കയ്യടി നേടി. കുട്ടികള്‍ക്കെന്താണോ ഇഷ്ടം, അവരുടെ ആ വാസനകളെ പ്രോത്സാഹിപ്പിക്കുകയാണ് നമ്മള്‍ ചെയ്യേണ്ടത്.

ഗൃഹനാഥന്റെ റോളിലെത്തുമ്പോള്‍?

ഞാനൊരു ഗൗരവക്കാരനായ അച്ഛനും ഭര്‍ത്താവും ഒന്നുമല്ല. ആവശ്യമെന്ന് തോന്നുന്ന കാര്യങ്ങളില്‍ സ്ട്രിക്ടാകാറുണ്ട്. സ്‌നേഹസമ്പന്നനായുള്ള ഭര്‍ത്താവും അച്ഛനുമാണ്.

ഷൂട്ടിംഗ് തിരക്കുകളൊക്കെ കഴിഞ്ഞാല്‍ വീട്ടുകാരോടൊപ്പം സമയം ചെലവഴിക്കാനാണ് ആഗ്രഹം. ഒന്നിച്ച് യാത്ര പോകും. മിക്കവാറും അമ്പലങ്ങളിലേക്കാവും, കാരണം ടൂറിസ്റ്റ് പ്ലേസുകളെക്കാള്‍ കൂടുതല്‍ അമ്പലങ്ങളിലൊക്കെ പോകാനാണ് ഗായത്രിക്ക് താല്‍പര്യം.

ഓര്‍ത്തിരിക്കാന്‍ ഇഷ്ടപ്പെടുന്ന കാര്യങ്ങള്‍?

എപ്പോഴും ഓര്‍ക്കാന്‍ ഇഷ്ടപ്പെടുന്ന ആദ്യത്തെ കാര്യം എന്റെയും ഗായത്രിയുടേയും വിവാഹമാണ്. 2006 മാര്‍ച്ചിലായിരുന്നു ഞങ്ങളുടെ വിവാഹം. അമ്മ കഴിഞ്ഞാല്‍ ജീവിതത്തിലെ ഏറ്റവും വലിയ താങ്ങും തണലും ഗായത്രിയാണ്.

എപ്പോഴും ഓര്‍ത്തിരിക്കാന്‍ ഇഷ്ടപ്പെടുന്ന രണ്ടാമത്തെ കാര്യം ഞങ്ങളുടെ ജീവിതത്തിലേക്ക് മകളായി ദീപ്തകീര്‍ത്തി വന്നതാണ്. അതുപോലെ ഞങ്ങളുടെ ആദ്യത്തെ മകള്‍ മരിച്ചുപോയ ദുഃഖം ഒരിക്കലും വിട്ടൊഴിയാത്ത ഒന്നാണ്.

വീണ്ടും സംവിധായകനാകാന്‍ ഒരുങ്ങുകയാണല്ലോ?

മാറുന്ന സിനിമയില്‍ പുതിയ മുഖമായി നില്‍ക്കാന്‍ എല്ലാ നടീനടന്‍മാരും ആഗ്രഹിക്കുന്നതുപോലെ ഞാനും ആഗ്രഹിക്കുന്നു. ഇളയരാജയിലൂടെ അതുപോലൊരു മാറ്റമാണ് ഞാന്‍ പ്രതീക്ഷിക്കുന്നത്.

മറ്റൊന്ന് ആദ്യത്തെ ചിത്രമായ കുട്ടിയും കോലിനും ശേഷം ഞാന്‍ രണ്ടാമത് ഒരു ചിത്രം സംവിധാനം ചെയ്യാനൊരുങ്ങുകയാണെന്നതാണ്. ഇളയരാജ കഴിഞ്ഞാല്‍ ഉടനെ അതിന്റെ വര്‍ക്ക് തുടങ്ങണം. അങ്ങനെ ഈ വര്‍ഷം രണ്ട് പ്രധാന കാര്യങ്ങള്‍ ചെയ്തുതീര്‍ക്കാനുണ്ട്.

ഷെറിങ് പവിത്രന്‍