Monday, September 10, 2018 Last Updated 0 Min 2 Sec ago English Edition
Todays E paper
Ads by Google
Friday 06 Apr 2018 02.59 PM

കല പുനര്‍ജീവനത്തിന്റെ പാതയില്‍...

''കലയെ സ്നേഹിച്ച്, കലാപ്രവര്‍ത്തനങ്ങളിലൂടെ നിരാലംബര്‍ക്ക് കൈത്താങ്ങായി മാറിയ ചിത്രകാരനും സംഘാടകനുമായ ആസിഫ് അലി കോമുവിന്റെ ജീവിതത്തിലേക്ക്....''
uploads/news/2018/04/206673/Alikomu060418.jpg

കോമുസണ്‍സ് വെറുമൊരു പേരില്‍ മാത്രമൊതുങ്ങുന്ന പ്രസ്ഥാനമല്ല. കലയും സേവനവും ഒരുപോലെ കൈകോര്‍ക്കുന്ന വലിയൊരു വിജയം തന്നെയാണ്.

കേരളത്തിനകത്തും പുറത്തുമുള്ള ധാരാളം കലാകാരന്‍മ്മാരെ പ്രോത്സാഹിപ്പിക്കുന്നതിനായി ചിത്ര/ഫോട്ടോ പ്രദര്‍ശനങ്ങള്‍ സംഘടിപ്പിക്കുകയും ചാരിറ്റി പ്രവര്‍ത്തനങ്ങള്‍ക്ക് മുന്‍തൂക്കം നല്‍കുകയും ചെയ്യുകയാണ് കോമുസണ്‍സ് എന്ന പ്രസ്ഥാനം.

കോമുസണ്‍സിന്റെ ഡയറക്ടറായ ആസിഫ് അലി കോമു ഒരു ചിത്രകാരനും ഫോട്ടോഗ്രാഫറും കൂടിയാണ്. കലാ രംഗത്തോടുള്ള അഗാധമായ സ്നേഹമാണ് ആസിഫ് അലിയെ ഒരു മികച്ച സംഘാടകനും മനുഷ്യസ്നേഹിയുമാക്കിത്തീര്‍ത്തത്. കേരളത്തിലുടനീളം ചിത്രപ്രദര്‍ശനങ്ങള്‍ നടത്തുന്ന ആസിഫ് അലി കോമുവിനെക്കുറിച്ച്...

യു.എ.ഇയിലെ ആദ്യചിത്രപ്രദര്‍ശനം


കോളജ് പഠനശേഷം 1978ല്‍ ജോലിതേടി ഞാന്‍ പോയത് ദുബായിലേക്കാണ്. കുറച്ചുനാള്‍ അവിടെയൊരു സ്ഥാപനത്തില്‍ ജോലിചെയ്തു.

പിന്നീട് ഡെല്‍മ എന്ന പേരിലൊരു പരസ്യകമ്പനി തുടങ്ങി. അതിന്റെ ഭാഗമായിട്ടാണ് 1994ല്‍ യു. എ. ഇ യില്‍ ആദ്യമായി ഒരു രാജ്യാന്തര ചിത്രപ്രദര്‍ശനം നടത്തുന്നത്. ആദ്യമായാണ് ആ നാട്ടില്‍ അത്തരമൊരു എക്സിബിഷന്‍.

uploads/news/2018/04/206673/Alikomu060418a.jpg

സഹോദരന്‍ ചിത്രകാരനായ റിയാസ് കോമൂ ചിത്രകലാപഠനമൊക്കെ കഴിഞ്ഞ് നില്‍ക്കുകയാണ്. പ്രദര്‍ശനത്തില്‍ അവന്റെ ചിത്രങ്ങള്‍കൂടി ഉള്‍പ്പെടുത്താം എന്നൊരു ഉദ്ദേശ്യവും എനിക്കുണ്ടായിരുന്നു. ഒരു ബ്രട്ടീഷുകാരി ഉള്‍പ്പടെ യു. എ. ഇയില്‍ ജോലിചെയ്യുന്ന പലരും അതിന്റെ ഭാഗമായി.

എപ്പോഴും ക്രീയേറ്റീവായിരിക്കാന്‍ ഇഷ്ടപ്പെടുന്ന ഞാന്‍ ഇന്നും പ്രദര്‍ശനങ്ങളുമൊക്കെയായി മുന്നോട്ട് പോകുന്നു. കൊച്ചി ഒബ്റോണ്‍ മാളില്‍ ഈയിടെ നടന്നത് എന്റെ നൂറാമത്തെ പ്രദര്‍ശനമാണ്. ചിത്ര ചന്ത എന്നപേരില്‍. പ്രശസ്തരും അപ്രശസ്തരുമായ 100 കലാകാരന്മാരാണ് ചിത്ര ചന്തയില്‍ പങ്കെടുത്തത്.

ചിത്രകലയോടുള്ള ഇഷ്ടം...


എന്റെ അച്ഛന്‍ കലയെ സ്നേഹിച്ചിരുന്ന ആളാണ്. സ്വന്തമായി തീപ്പെട്ടിക്കമ്പനിനടത്തിയിരുന്ന അച്ഛന്‍ അല്‍പ്പസ്വല്‍പ്പം വരയ്ക്കുകയും ഡിസൈന്‍ ചെയ്യുകയും ഒക്കെ ചെയ്യുമായിരുന്നു. എന്റെയും റിയാസിന്റെയും കലാതാല്‍പര്യത്തെ അദ്ദേഹം പ്രോത്സാഹിപ്പിച്ചു. അദ്ദേഹത്തിന്റെ പ്രോത്സാഹനവും താല്‍പര്യവുമൊക്കെയാണ് കലാരംഗത്തെ ഞങ്ങളുടെ വിജയം.

പ്രദര്‍ശനങ്ങള്‍ നടത്താന്‍ ഒരു കാരണമുണ്ട്. നമ്മുടെ നാട്ടിലെ കലാകാരന്‍മാര്‍ക്ക് അവരുടെ കലാപ്രവര്‍ത്തനങ്ങള്‍ മറ്റുള്ളവരുടെ മുന്നില്‍ പ്രദര്‍ശിപ്പിക്കാനുള്ള അവസരങ്ങള്‍ കുറവാണ്. പ്രത്യേകിച്ചു സ്ത്രീകള്‍ക്ക്. അങ്ങനെയുള്ളവര്‍ക്ക് സ്വന്തം കഴിവുകള്‍ തുറന്നുകാട്ടാനുള്ള വേദികൂടിയാണ് ഞങ്ങള്‍ ഒരുക്കുന്നത്.

uploads/news/2018/04/206673/Alikomu060418b.jpg

ഗുജറാത്തിലെ ടെക്സ്‌റ്റൈല്‍ ഡിസൈനേഴ്സ് മുഴുവന്‍ സ്ത്രീകളാണ്. നമ്മുടെ നാട്ടില്‍ അത്തരം അവസരങ്ങള്‍ കുറവാണ്. നമ്മള്‍ ഒന്നും ചിന്തിക്കാതെ കലയേയും കലാകാരന്‍മാരെയും കുറ്റംപറയുന്നവരാണ്.

കോമുസണ്‍സിന്റെ രാജ്യാന്തര ചിത്രപ്രദര്‍ശനങ്ങള്‍ ധാരാളം അവസരങ്ങളാണ് സ്ത്രീകള്‍ക്ക് ലഭ്യമാക്കുന്നത്. അതാണ് ഞങ്ങളുടെ ലക്ഷ്യവും.

നടി ഷീലയേയും വ്യവസായ പ്രമുഖ ഷീല കൊച്ചൗസേപ്പിനേയും ഉള്‍പ്പെടുത്തി നടത്തിയ ഷീല ടു ഷീല ചിത്രപ്രദര്‍ശനം, സിന്ധു ലോഹിതദാസ്, ഫൗസിയ, മേനക തുടങ്ങി സാമൂഹിക രാഷ്ര്ടീയ സിനിമാ രംഗത്തുള്ള സ്ത്രീകളെ മാത്രം ഉള്‍പ്പെടുത്തി ധാരാളം ചിത്രപ്രദര്‍ശനങ്ങള്‍ ഞങ്ങള്‍ നടത്തി. ആലുവയില്‍ എനിക്ക് സ്വന്തമായി ഒരു ആര്‍ട്ട് ഗ്യാലറിയുണ്ട്്.

(ആസിഫ് അലി ഒരു സംഘാടകന്‍ മാത്രമല്ല. സിനിമാ പ്രവര്‍ത്തകനുമാണ്. സിനിമാ ഓഡിഷനുകള്‍, ടി. വി പ്രമോഷന്‍ പ്രോഗ്രാമുകള്‍, സിനിമയുടെ പ്രമോഷനുവേണ്ടി നടത്തുന്ന ടോക്ക് ഷോകള്‍ അങ്ങനെയുള്ള പല പ്രവര്‍ത്തനങ്ങളിലും ഭാഗമാണ്)

വെല്‍ഫെയര്‍ ട്രസ്റ്റ്


കലാപ്രവര്‍ത്തനങ്ങളോടൊപ്പംതന്നെ ധാരാളംപേര്‍ക്കു തുണയാകുന്ന ഒരു സംഘടനയും ഞങ്ങള്‍ മുന്നോട്ടുകൊണ്ടുപോകുന്നുണ്ട്. എതൊരു മനുഷ്യനും വേണ്ട അടിസ്ഥാന ആവശ്യങ്ങളാണ് ഭക്ഷണവും പാര്‍പ്പിടവും. ഇതൊന്നുമില്ലാത്ത ധാരാളം ആളുകള്‍ ഈ ഭൂമിയിലുണ്ട്.

അതുപോലെ ശാരീരികവും മാനസികവുമായി വെല്ലുവിളി നേരിടുന്നവര്‍, നോക്കാനും സംരക്ഷിക്കാനും ആരോരുമില്ലാത്ത പ്രായമായവര്‍, സ്ത്രീകള്‍, കുട്ടികള്‍ ഇവര്‍ക്കെല്ലാം ആശ്വാസം പകരാന്‍ കഴിയുന്നുവെന്ന പുണ്യം ദൈവം നല്‍കിയിട്ടുണ്ട്.

വെല്‍ഫെയര്‍ അസോസിയേഷന്‍ ട്രസ്റ്റെന്നാണ് ഞങ്ങളുടെ സംഘടനയുടെ പേര്. ആലുവയിലാണത്. 1991 ലാണ് ട്രസ്റ്റ് രൂപംകൊള്ളുന്നത്.

uploads/news/2018/04/206673/Alikomu060418c.jpg

ഒരു മാതൃകാ സമൂഹത്തെ മുന്നില്‍ കണ്ടുകൊണ്ടാണ് വെല്‍ഫെയര്‍ അസ്സോസിയേഷന്‍ എന്ന സംരംഭം ആരംഭിക്കുന്നത്. താമസസൗകര്യം, സൗജന്യ റേഷന്‍, ആരോഗ്യസുരക്ഷ, വിദ്യാഭ്യാസം, സ്വയംതൊഴില്‍ തുടങ്ങിയവ അവശ്യ വിഭാഗങ്ങള്‍ക്ക് അവരുടെ ക്ഷേമം മുന്‍നിര്‍ത്തി അസ്സോസിയേഷന്‍ എത്തിച്ചുകൊടുക്കുന്നു.

തുച്ഛമായ വ്യക്തിഗത സംഭാവനകളാണ് ഏക ആശ്രയമായി ഉണ്ടായിരുന്നത്. പിന്നീട് ചിലര്‍ അവരുടെ സ്ഥലവും കെട്ടിടവും വരുമാനത്തിന്റെ നല്ലൊരുഭാഗവും അസ്സോസിയേഷന്റെ സേവനപ്രവര്‍ത്തനങ്ങള്‍ കണ്ടുകൊണ്ട് സംഭാവന ചെയ്യാന്‍ മുന്നോട്ടു വരികയായിരുന്നു.

അങ്ങനെയാണ് പ്രവര്‍ത്തനങ്ങള്‍ വിപുലമാകുന്നത്. അതുപോലെതന്നെ ചിത്ര പ്രദര്‍ശനങ്ങളില്‍നിന്നു ലഭിക്കുന്ന വരുമാനവും അസോസിയേഷന്റെ പ്രവര്‍ത്തനങ്ങള്‍ക്കായി ഞങ്ങള്‍ വിനിയോഗിക്കുന്നുണ്ട്.

ഷെറിങ്ങ് പവിത്രന്‍

Ads by Google
Ads by Google
Loading...
TRENDING NOW