Monday, September 24, 2018 Last Updated 9 Min 6 Sec ago English Edition
Todays E paper
Ads by Google
സാമാജികന്‍ സാക്ഷി , ഡോ.എന്‍. ജയരാജ്‌
Saturday 24 Mar 2018 02.08 AM

ധനകാര്യ കമ്മിഷനുകളും കമ്മിയാകുന്ന പദ്ധതി നിര്‍വഹണവും

uploads/news/2018/03/203227/money.jpg

സാമ്പത്തികവര്‍ഷം അവസാനിക്കാന്‍ ഒരാഴ്‌ച മാത്രം ബാക്കി നില്‍ക്കെ തദ്ദേശ സ്‌ഥാപനങ്ങളുടെ പദ്ധതി നിര്‍വഹണത്തില്‍ കേരളാ സര്‍ക്കാരിന്റെ പ്ലാന്‍സ്‌പേസ്‌ പ്രകാരം 69.34 ശതമാനമാണു ചെലവഴിച്ചിട്ടുള്ളത്‌. പ്ലാന്‍ ഫണ്ട്‌ വിനിയോഗം മുന്‍കാലങ്ങളേക്കാള്‍ കൂടുതലാണെന്ന്‌ അവകാശപ്പെടുമ്പോഴും ഒരാഴ്‌ചക്കാലംകൊണ്ട്‌ 100 ശതമാനം കൈവരിക്കാന്‍ കഴിയുകയിെല്ലന്ന്‌ ഉറപ്പ്‌.

നമ്മുടെ വികേന്ദ്രീകൃത ആസൂത്രണപ്രക്രിയ കാല്‍നൂറ്റാണ്ട്‌ പിന്നിടുമ്പോഴും ഒരിക്കല്‍ പോലും ലക്ഷ്യം കൈവരിക്കാന്‍ സാധിക്കാത്തത്‌ തദ്ദേശ സ്‌ഥാപനങ്ങളിലെ ധനകാര്യമാനേജ്‌മെന്റിന്റെ പോരായമ്‌യിലേക്കു വിരല്‍ ചൂണ്ടുന്നു.
ഗ്രാമപഞ്ചായത്തുകളുടെയും മുനിസിപ്പാലിറ്റികളുടെയും സാമ്പത്തിക സ്‌ഥിതി അവലോകനം ചെയ്യുക. സംസ്‌ഥാന സര്‍ക്കാരിനു ലഭിക്കുന്ന ഫണ്ട്‌ പഞ്ചായത്തുകള്‍ക്കും മുനിസിപ്പാലിറ്റികള്‍ക്കും വിതരണം ചെയ്യുക. സംസ്‌ഥാന സഞ്ചിതനിധിയില്‍ നിന്നും ത്രിതല പഞ്ചായത്തുകള്‍ക്ക്‌ ലഭിക്കേണ്ട വിഹിതം സംബന്ധിച്ചുമുള്ള മാര്‍ഗനിര്‍ദേശം നല്‍കുകയുമെല്ലാമാണ്‌ ധനകാര്യ കമ്മിഷനുകളുടെ പ്രധാന ലക്ഷ്യം.

തദ്ദേശ സ്‌ഥാപനങ്ങളുടെ ധനകാര്യ മാനേജ്‌മെന്റ്‌ സംബന്ധിച്ച വിശദമായ പഠനവും മുന്‍കാലങ്ങളിലെ കമ്മിഷനുകള്‍ നിര്‍ദേശിച്ച കാര്യങ്ങളെ സംബന്ധിച്ചുള്ള നിരീക്ഷണങ്ങളും ധനകാര്യ കമ്മിഷനുകളുടെ പരിഗണനാ വിഷയങ്ങളില്‍ ഉള്‍പ്പെടുത്താറുണ്ട്‌. 1994 മുതല്‍ 2016 വരെ അഞ്ചു ധനകാര്യ കമ്മിഷനുകള്‍ ഈ ഉത്തരവാദിത്തം കൃത്യമായി നിര്‍വഹിച്ചിട്ടുണ്ട്‌. ഒന്നാം ധനകാര്യ കമ്മിഷന്റെ പ്രവര്‍ത്തനകാലത്ത്‌ വികേന്ദ്രീകൃത ആസൂത്രണം ശൈശവദശയിലായിരുന്നുവെങ്കിലും അവയിലെ പ്രധാനപ്പെട്ട പല നിര്‍ദേശങ്ങളും പിന്നീടുള്ള പ്രവര്‍ത്തനങ്ങള്‍ക്ക്‌ സഹായകരമായി.

ഒന്നാം ധനകാര്യ കമ്മിഷനാണ്‌ നികുതികളുടെ നിശ്‌ചിത ശതമാവും സംസ്‌ഥാന റവന്യൂവിന്റെ നിശ്‌ചിത ശതമാനവും തദ്ദേശ സ്‌ഥാപനങ്ങള്‍ക്ക്‌ നല്‍കണമെന്നും ടൈഡ്‌ ഫണ്ട്‌ ഉള്‍പ്പെടെയുള്ളവയെ സംബന്ധിച്ചും ആസ്‌തികളുടെ മെയിന്റനന്‍സ്‌ സംബന്ധിച്ചുമുള്ള നിര്‍ദേശങ്ങള്‍ മുന്‍പോട്ടു വച്ചത്‌. പ്രാദേശിക പദ്ധതികള്‍ ഏറ്റെടുക്കുമ്പോള്‍ കൃത്യമായ ശതമാനത്തോതില്‍ മേഖലകള്‍ക്ക്‌ മാറ്റിവയ്‌ക്കുന്നതുള്‍പ്പെടെ പല നിര്‍ദേശങ്ങളും ധനകാര്യ കമ്മിഷന്‍ ശിപാര്‍ശകളുടെ അടിസ്‌ഥാനത്തിലാണ്‌. ഭരണഘടനാപരമായി സ്‌ഥാപിക്കപ്പെടുന്നു കമ്മിഷനുകളുടെ ശിപാര്‍ശകള്‍ പലതും അംഗീകരിക്കപ്പെട്ടിട്ടുണ്ടെങ്കിലും ഒട്ടേറെ നിര്‍ദ്ദേശങ്ങള്‍ അവഗണിക്കപ്പെട്ടിട്ടുമുണ്ട്‌.

വില്ലേജ്‌ അതിര്‍ത്തികളും പഞ്ചായത്ത്‌ അതിര്‍ത്തികളും ഏകീകരിക്കണമെന്നും തദ്ദേശ സ്‌ഥാപനങ്ങളുടെ റവന്യൂ വരവും കുടിശികയും നിയമസഭയില്‍ ഓരോ വര്‍ഷവും അവതരിപ്പിക്കണമെന്ന നിര്‍ദേശവും വിവിധ ഗ്രാമീണ റോഡുകളെ സംബന്ധിച്ച്‌ ജില്ലാതലത്തില്‍ കണക്‌ടിവിറ്റി മാപ്പ്‌ തയാറാക്കണമെന്നും ഏതെങ്കിലും ഒരു റോഡ്‌ ഏറ്റെടുത്ത്‌ നിര്‍മാണം ആരംഭിച്ചാല്‍ അവ മുഴുവനായി പൂര്‍ത്തീകരിക്കണമെന്നും ശിപാര്‍ശയിലുണ്ട്‌.
പശ്‌ചാത്തലമേഖലയിലെ ആകെത്തുകയെ വാര്‍ഡ്‌ എണ്ണം കൊണ്ട്‌ ഹരിച്ച്‌ ഫണ്ട്‌ തീരുമാനിക്കുന്നതും ഒരേ വാര്‍ഡിലെ പല റോഡുകള്‍ക്ക്‌ വീതം വയ്‌ക്കുന്നതുമായ നടപടി തെറ്റാണെന്നും ഒരു റോഡ്‌ ഏറ്റെടുത്താല്‍ അത്‌ പൂര്‍ത്തിയാക്കാതെ മറ്റു റോഡുകള്‍ ഏറ്റെടുക്കാന്‍ പാടില്ലായെന്നുമുള്ള കമ്മിഷന്റെ നിര്‍ദേശം സര്‍ക്കാര്‍ അംഗീകരിച്ചിട്ടുണ്ടെങ്കിലും നടപ്പിലായിട്ടില്ല.

അനുവദിക്കുന്ന ഫണ്ട്‌ കൃത്യമായി ചെലവഴിക്കപ്പെടുന്നില്ലെന്നതും പ്രത്യേകം ശ്രദ്ദിക്കേണ്ടതുണ്ട്‌. അനുവദിച്ച 6227.50 കോടി രൂപയില്‍ ഇതുവരെ ചെലവഴിച്ചത്‌ 69.34 ശതമാനമാണ്‌. അതായത്‌ 1909.35 കോടി രൂപയുടെ പദ്ധതികള്‍ ഇനിയും പൂര്‍ത്തീകരിക്കാനുണ്ട്‌. സര്‍ക്കാര്‍ അംഗീകരിച്ച വിവിധ കമ്മിഷനുകളുടെ നിര്‍ദേശങ്ങള്‍ നടപ്പാക്കാതിരിക്കുന്നത്‌ ഭരണഘടനാ ലംഘനമാണ്‌. അതുകൊണ്ടുതന്നെ മുന്‍ കമ്മിഷനുകളുടെ അംഗീകരിക്കപ്പെട്ട ശിപാര്‍ശകള്‍ പരിശോധിച്ച്‌ നടപ്പാക്കണമെന്ന നിര്‍ദേശവും അഞ്ചാം ധനകാര്യ കമ്മിഷന്‍ മുന്നോട്ടുവച്ചിട്ടുണ്ട്‌.

ധനകാര്യ കമ്മിഷന്‍ റിപ്പോര്‍ട്ട്‌ സംബന്ധിച്ച പ്രധാന ആക്ഷേപം 2016 മാര്‍ച്ചില്‍ സര്‍ക്കാരിന്‌ കൈമാറിയ റിപ്പോര്‍ട്ട്‌ 2018 ലാണ്‌ ആക്ഷന്‍ ടേക്കണ്‍ റിപ്പോര്‍ട്ട്‌ വച്ചത്‌ എന്നതാണ്‌. 2016 മുതല്‍ 2021 വരെ നടപ്പാക്കേണ്ട ശിപാര്‍ശകളാണ്‌ സ്‌റ്റേറ്റ്‌ ഫിനാന്‍സ്‌ കമ്മിഷന്‍ സമര്‍പ്പിച്ചത്‌. ഇതുമൂലം 1200 ഓളം വരുന്ന തദ്ദേശ സ്‌ഥാപനങ്ങള്‍ക്ക്‌ ലഭിക്കേണ്ടിയിരുന്ന ഗ്രാന്റിന്റെ വലിയ ഭാഗം നഷ്‌ടപ്പെട്ടു. 2016-17 ല്‍ സര്‍ക്കാരിന്റെ തനതു വരുമാനത്തിന്റെ 19 ശതമാനം തദ്ദേശ സ്‌ഥാപനങ്ങള്‍ക്ക്‌ നല്‍കണമെന്നും ഓരോവര്‍ഷവും ഇത്‌ ഒരു ശതമാനം വര്‍ധിപ്പിച്ച്‌ 2021 ല്‍ 24 ശതമാനത്തില്‍ എത്തിക്കണമെന്നും ധനകാര്യ കമ്മിഷന്‍ ശിപാര്‍ശ ചെയ്‌തെങ്കിലും സര്‍ക്കാര്‍ അംഗീകരിച്ചില്ല.

ഇതോടൊപ്പം തനത്‌ നികുതി വരുമാനത്തിന്റെ അടിസ്‌ഥാനത്തില്‍ സ്‌ഥാപനങ്ങള്‍ക്ക്‌ വിഹിതം നല്‍കണമെന്ന നിര്‍ദേശവും നിരാകരിക്കപ്പെട്ടു. ഓരോ വര്‍ഷത്തെയും നികുതി വരുമാനം മുന്‍കൂട്ടി കണ്ടെത്താന്‍ പ്രായോഗികമായ വൈഷമ്യം ഉണ്ടെന്ന കാരണത്താലാണ്‌ നിരാകരിച്ചത്‌. എന്നാല്‍, യൂണിയന്‍ ഫിനാന്‍സ്‌ കമ്മിഷന്റെ മാതൃകയില്‍ ടാക്‌സ്‌ പ്ര?ജക്ഷന്‍ കണ്ടെത്തി പ്രാദേശിക സര്‍ക്കാരുകളുടെ നികുതി വര്‍ധിപ്പിക്കാന്‍ കഴിയുമായിരുന്നു. വിഹിതം നിശ്‌ചയിക്കുകയെന്നുള്ള കമ്മിഷന്റെ നിര്‍ദേശം പ്രാദേശിക സര്‍ക്കാരുകളുടെ വരുമാനത്തില്‍ വലിയ മാറ്റത്തിന്‌ കാരണമാകുമായിരുന്നു.

ഇതില്‍ ഏറ്റവും ശ്രദ്ധേയമായ നിര്‍ദേശം ഓരോ പ്രാദേശിക സര്‍ക്കാരുകള്‍ക്കും ഓരോ വര്‍ഷവും ലഭിക്കേണ്ടതായ തുകയെ സംബന്ധിച്ചുള്ള ധാരണ ഉണ്ടെങ്കില്‍ അതനുസരിച്ച്‌ പദ്ധതി രൂപീകരിക്കാനും പദ്ധതി സംബന്ധിച്ച്‌ ദീര്‍ഘമായ കാഴ്‌ചപ്പാട്‌ രൂപീകരിക്കാനും സാധിക്കും. ഇതോടൊപ്പമാണ്‌ ഓരോ പ്രാദേശിക സര്‍ക്കാരുകളുടെ കൈവശമുള്ള കൈമാറ്റം ചെയ്യപ്പെട്ട ആസ്‌തികളുടെ അടിസ്‌ഥാനത്തില്‍ മെയിന്റനന്‍സ്‌ ഗ്രാന്റ്‌ നല്‍കണമെന്ന ശിപാര്‍ശ. ആസ്‌തി രജിസ്‌റ്ററുകള്‍ കൃത്യമായി പരിപാലിക്കപ്പെടുന്ന സാഹചര്യത്തില്‍ ആസ്‌തികളുടെ വലിപ്പച്ചെറുപ്പമനുസരിച്ച വീതം വയ്‌പ്പ്‌ നീതിപൂര്‍മവമാണെന്നിരിക്കെ സര്‍ക്കാര്‍ അത്‌ നിരാകരിച്ചത്‌ ഏതടിസ്‌ഥാനത്തിലാണെന്നു മനസിലാകുന്നില്ല.

ലഭിച്ചുകൊണ്ടിരുന്ന വരുമാനം നഷ്‌ടപ്പെടുന്നതും കമ്മിഷനുകളുടെ ശിപാര്‍ശകളിലൂടെ ലഭ്യമാകേണ്ട തുക നിരാകരിക്കുന്നതും വികേന്ദ്രീകൃത ആസൂത്രണ പ്രക്രിയയ്‌ക്കു ഭീഷണിയാണ്‌. അതോടൊപ്പം തന്നെ ആസ്‌തികളുടെ അടിസ്‌ഥാനത്തില്‍ മെയിന്റനന്‍സ്‌ ഗ്രാന്റ്‌ കൈമാറണമെന്ന കാര്യം തീര്‍ച്ചയായും യുക്‌തിസഹമാണ്‌. നീതിപൂര്‍വമായ ഫണ്ട്‌ വിതരണമാണ്‌ ലക്ഷ്യമെങ്കില്‍ ഈ കാര്യത്തില്‍ പുനര്‍ചിന്തനം ആവശ്യമാണ്‌. ജി.എസ്‌.ടി. വന്നതോടെ വിനോദ നികുതിയിനത്തില്‍ നഷ്‌ടപ്പെട്ട തുക സംസ്‌ഥാനം നല്‍കുമെന്ന്‌ സൂചിപ്പിച്ചെങ്കിലും ഇതും നല്‍കാന്‍ കഴിഞ്ഞിട്ടില്ല.

ഇതോടൊപ്പം കൂട്ടിവായിക്കേണ്ടതാണു ധനകാര്യ കമ്മിഷനുകള്‍ ഭരണാഘടനാപരമായ സംവിധാനമെന്ന നിലയില്‍ അവയുടെ ശിപാര്‍ശകള്‍ പൂര്‍ണമായും അംഗീകരിക്കേണ്ടതല്ലേയെന്ന ചോദ്യം? അതോടൊപ്പം പ്രായോഗികമായി സര്‍ക്കാരിന്‌ അവയെല്ലാം നടപ്പാക്കാന്‍ കഴിയുമോ എന്ന മറുചോദ്യവും. സര്‍ക്കാര്‍ അംഗീകരിച്ച നിര്‍ദേശങ്ങള്‍ കാലവിളംബം കൂടാതെ നടപ്പാക്കാതിരിക്കുന്നതും തെറ്റാണ്‌.

കേരളത്തില്‍ ഭരണമാറ്റങ്ങള്‍ സ്വാഭാവിക രീതി ആയതിനാല്‍ ഇത്തരം വിഷയങ്ങളില്‍ നമ്മുടെ പൊതുവായ നിലപാടുകള്‍ വിലയിരുത്തപ്പെടേണ്ടതുമാണ്‌. യൗവനത്തിലെത്തിയ വികേന്ദ്രീകൃത ആസൂത്രണം ലക്ഷത്തിലെത്തുംമുമ്പേ കിതപ്പു തുടങ്ങിയോ എന്ന്‌ സംശയിച്ചാല്‍ അത്‌ കുറ്റപ്പെടുത്താന്‍ കഴിയുമോ? ജീവിത ശൈലിയില്‍ മാത്രമല്ല ആസൂത്രണ ശൈലിയിലും മാറ്റങ്ങള്‍ ആവശ്യമാണെന്ന്‌ ഈ പാഠങ്ങള്‍ നമ്മെ ഓര്‍മ്മിപ്പിക്കുന്നു.

Ads by Google
Ads by Google
Loading...
TRENDING NOW