Sunday, May 20, 2018 Last Updated 7 Min 54 Sec ago English Edition
Todays E paper
Ads by Google
Thursday 09 Nov 2017 03.27 PM

ദാമ്പത്യം സുന്ദരമാക്കാന്‍...

പരസ്പരം അടുത്തറിഞ്ഞ് താങ്ങും തണലുമായി മാറേ ണ്ട ജീവിതയാത്രയാണ് ദാമ്പത്യം. അസ്വാരസ്യങ്ങളകറ്റി ദാമ്പത്യം ആനന്ദകരമാക്കാന്‍ മനസ്സ് തുറന്ന് സംസാരിക്കണമെന്ന് മാത്രം. പങ്കാളി പറയുന്നത് കേള്‍ക്കാന്‍ തയാ റായാല്‍ത്തന്നെ ഒട്ടേറെ പ്രശ്നങ്ങള്‍ പരിഹരിക്കാനാകും.
uploads/news/2017/11/163783/relationship091117.jpg

ഈ സാമ്പാറിന് ഉപ്പില്ല ല്ലോ? ചോറാണെങ്കില്‍ ശരിക്കു വെന്തിട്ടുമില്ല. നീയിതെന്ത് ആലോചിച്ചാ ഭക്ഷണമുണ്ടാക്കുന്നത്? കുറേ പച്ചക്കറി വെട്ടിക്കൂട്ടിയുണ്ടാക്കിയാല്‍ സാമ്പാറാകില്ല.

അമ്മയുണ്ടാക്കുന്ന സാമ്പാര്‍ നീയൊന്ന് കഴിക്കണം. ആ രുചി ഇപ്പോഴും നാവിലുണ്ട്. അതെങ്ങനെയാ, ഇത് മനുഷ്യര്‍ക്ക് കഴിക്കാനുള്ളതാണെന്ന വിചാരമില്ലല്ലോാ, ഭക്ഷണം കഴിക്കാനിരുന്നപ്പോള്‍ അരുണ്‍ ഭാര്യ പ്രിയയോട് ചൂടായി.

എന്നാല്‍ അമ്മ ഉണ്ടാക്കുന്ന ഭക്ഷണം കഴിച്ചാല്‍ മതി.എന്നായി പ്രിയ. പോരെ പൂരം? അന്നത്തെ വഴക്കിന് ഒരു കാരണമായി.

മിക്കവാറും ഇത്തരം നിസ്സാര പ്രശ്‌നങ്ങളാണ് ദാമ്പത്യബന്ധത്തിന്റെ അടിവേരിളക്കുന്നത്. പരസ്പരം സ്‌നേഹിച്ചും സഹകരിച്ചും മുന്നോട്ടു പോകണമെങ്കില്‍ ദാമ്പത്യത്തില്‍ ചെറിയ ചില വിട്ടുവീഴ്ചകള്‍ അത്യാവശ്യമാണ്.

താരതമ്യം അരുത്.


ഭര്‍ത്താവു തീരെ പരിഗണിക്കുന്നില്ല എന്ന തോന്നലുണ്ടാകുമ്പോള്‍ ഭാര്യമാര്‍ പയറ്റുന്ന ആദ്യത്തെ അടവാണ് താരതമ്യം. സുഹൃത്തുക്കളുടെ ഭര്‍ത്താക്കന്മാരുമായി സ്വന്തം ഭര്‍ത്താവിനെ താരതമ്യം ചെയ്ത് കുറ്റങ്ങള്‍ കണ്ടെത്തും. ഈ പ്രവണത ശരിയല്ല.

കാരണം ഓരോരുത്തരുടെ സ്വഭാവവും ജീവിതരീതിയും തികച്ചും വ്യത്യസ്തമാണല്ലോ. മറ്റൊരാളുമായി താരതമ്യം ചെയ്യുന്നത് ഒരാള്‍ക്കുമിഷ്ടമാവില്ല. ഇതുപോലെയാണ് ഭര്‍ത്താക്കന്മാരും. ഭാര്യമാരെ മറ്റു പെണ്ണുങ്ങളുമായി താരതമ്യം ചെയ്യുന്നവരുണ്ട്.

പങ്കാളി അവഗണിക്കുന്നു എന്ന തോന്നലുണ്ടാകുമ്പോള്‍ മനസ് തുറന്ന് സംസാരിക്കാന്‍ ശ്രമിക്കുക. പങ്കാളിയോട് തനിച്ചു സംസാരിക്കാന്‍ പറ്റിയ സമയം കണ്ടെത്തി ശാന്തമായി തന്നെ അവഗണിക്കുന്നതിനു പിന്നിലുള്ള കാരണങ്ങള്‍ ചോദിച്ചു മനസ്സിലാക്കാം.

ചിലപ്പോള്‍ പങ്കാളിക്ക് സ്നേഹമില്ല, അവഗണിക്കുന്നു എന്നതൊക്കെ വെറും തോന്നലായിരിക്കും. ഇത് മനസ്സിലാക്കാ ന്‍ മനസ്സു തുറന്നുള്ള ആ സംസാരം സഹായിക്കും. അല്ലെങ്കില്‍ അവഗണിക്കുന്നതിനു പിന്നിലെ യഥാര്‍ഥ കാരണം മനസ്സിലാക്കാന്‍ കഴിയും.

പ്രശ്നങ്ങളുടെ കൂമ്പാരം


ഓഫീസിലെ പ്രശ്‌നങ്ങള്‍, കുടുംബത്തിലെ പ്രശ്‌നങ്ങള്‍, കുട്ടികളുടെ പ്രശ്‌നങ്ങള്‍ തുടങ്ങി എല്ലാ പരാതികളുടെയും കെട്ട് ഭര്‍ത്താവിന്റെ മുന്നിലഴിക്കുന്ന ഭാര്യമാരുണ്ട്. ഓഫീസ് വിട്ടു വരുന്നത് ഇത്തരം പ്രശ്‌നങ്ങളുടെ നടുവിലേക്കാണെങ്കില്‍ ആര്‍ക്കാണ് മടുത്തുപോകാത്തത്.

എല്ലാ കാര്യങ്ങളും ഭര്‍ത്താവിനോട് പങ്കുവയ്ക്കുന്നതും അഭിപ്രായം ചോദിക്കുന്നതുമെല്ലാം നല്ലതാണ്. പക്ഷേ എല്ലാ പ്രശ്‌നങ്ങള്‍ക്കും ഭര്‍ത്താവ് പരിഹാരമുണ്ടാക്കണമെന്ന് വാശിപിടിക്കരുത്.

നിസ്സാരപ്രശ്‌നങ്ങള്‍ സ്വയം കൈകാര്യം ചെയ്യുക. തനിയെ തീര്‍ക്കാന്‍ കഴിയില്ലെന്ന് തോന്നുന്ന കാര്യങ്ങള്‍ മാത്രം ഭര്‍ത്താവിനോട് ആലോചിച്ച് പരിഹാരം കാണുക.

മനുഷ്യനാണ്; സൂപ്പര്‍ ഹീറോ അല്ല


വികാരങ്ങളും വിചാരങ്ങളും ദേഷ്യവും സങ്കടവും മാറിമാറിത്തോന്നുന്ന ഒരു മനസ്സിന്റെ ഉടമയാണ് ഭര്‍ത്താവ് എന്നു തിരിച്ചറിയാത്തതാണ് ദാമ്പത്യത്തകര്‍ച്ചയ്ക്ക് കാരണം. സിനിമയിലെ നായകനെപ്പോലെ ഹീറോയിസം കാണിക്കുന്ന പുരുഷന്മാരാവും പെണ്‍മനസ്സിലെ ഭര്‍തൃസങ്കല്‍പ്പം.

അതിതീവ്രമായി പ്രണയിക്കുന്ന, പ്രണയത്തിനുവേണ്ടി എന്തുസാഹസവും കാണിക്കുന്ന അതിമാനുഷ്യരെ മനസ്സില്‍ പ്രതിഷ്ഠിച്ചവര്‍ക്ക് ഒരിക്കലും യഥാര്‍ഥ ജീവിതത്തിലെ പങ്കാളികളോട് പൊരുത്തപ്പെടാന്‍ പറ്റില്ല.

ദമ്പതികളുടെ പ്രതീക്ഷകള്‍ തമ്മില്‍ പൊരുത്തമില്ലാതിരിക്കുന്നത് അസ്വസ്ഥതകള്‍ക്കും കലഹങ്ങള്‍ക്കും ഗാര്‍ഹിക പീഢനങ്ങള്‍ക്കും കാരണമാകാം. പൊരുത്തക്കേടുകള്‍ അവിഹിതബന്ധങ്ങള്‍ക്കും ലഹരിയുപയോഗങ്ങള്‍ക്കും മാനസികപ്രശ്നങ്ങള്‍ക്കും വിവാഹമോചനത്തിനുമൊക്കെ ഇടയൊരുക്കാറുമുണ്ട്.

സിനിമയും ജീവിതവും രണ്ടാണെന്ന തോന്നലും ദൗര്‍ബല്യങ്ങള്‍ മനുഷ്യസഹജമാണെന്ന തിരിച്ചറിവും ഒരുപരിധിവരെ പ്രശ്‌നങ്ങളെ ദാമ്പത്യജീവിതത്തില്‍ നിന്നും അകറ്റിനിര്‍ത്തും.

സൗഹൃദങ്ങള്‍ക്ക് പരിധി


ചില സൗഹൃദങ്ങളാണ് പല ബന്ധങ്ങളിലും വില്ലന്‍ വേഷം അണിയാറ്. സുഹൃത്തുക്കളുടെ അമിത സ്വാതന്ത്ര്യവും അതിരുവിട്ട പെരുമാറ്റങ്ങളും പങ്കാളികളുടെ മനസ്സിനെ മുറിപ്പെടുത്താറുണ്ട്. ദാമ്പത്യത്തില്‍ ഇടങ്കോലിടാന്‍ ശ്രമിക്കുന്ന മൂന്നാമനെ തീര്‍ച്ചയായും മാറ്റിനിര്‍ത്തണം.

എന്നാല്‍ നിഷ്‌കളങ്ക സൗഹൃദങ്ങള്‍ നഷ്ടപ്പെടുത്താനും പാടില്ല. പങ്കാളികളുടെ അടുത്ത സുഹൃത്തുക്കളുമായി നല്ല ബന്ധം കാത്തുസൂക്ഷിക്കുക. അപ്പോള്‍ അവരെ രഹസ്യമായി നിരീക്ഷിക്കേണ്ടി വരില്ല.

തുറന്ന സൗഹൃദമുണ്ടെങ്കില്‍ പരിധിവിട്ടൊന്നും ചെയ്യാനവര്‍ ശ്രമിക്കില്ല. ഭര്‍ത്താവിന്റെ എല്ലാ കൂട്ടുകാരികളും ഗേള്‍ ഫ്രണ്ടസ് ആണെന്നു ധരിക്കരുത്. അതുപോലെ ഭാര്യയുടെ കൂട്ടുകാരന്മാരെല്ലാം അപരന്മാരാണെന്നും ചിന്തിക്കാതിരിക്കുക.

Thursday 09 Nov 2017 03.27 PM
YOU MAY BE INTERESTED
Ads by Google
Loading...
LATEST NEWS
TRENDING NOW