Tuesday, December 05, 2017 Last Updated 30 Min 55 Sec ago English Edition
Todays E paper
Ads by Google
Saturday 16 Sep 2017 04.00 PM

തൊണ്ടവേദനയ്ക്ക് ആയുര്‍വേദ പരിഹാരം

ശിരസിനെയും ഉടലിനെയും ബന്ധിപ്പിക്കുന്ന കഴുത്തിലാണ് കണ്ഠസ്ഥാനം. അതുകൊണ്ട് തന്നെ ഉടലിലും ശിരസിലും ഉണ്ടാകുന്ന രോഗാവസ്ഥകള്‍ തൊണ്ടയെ സാരമായി ബാധിക്കാറുണ്ട്.
uploads/news/2017/09/146660/throudinfection160917.jpg

ആയുര്‍വേദ ശാസ്ത്ര പ്രകാരം ശാലാക്യതന്ത്രത്തിലാണ് തൊണ്ട അഥവാ കണ്ഠം മുതലായ യൗര്‍ധ്വാംഗ രോഗങ്ങളേയും ചികിത്സകളെയും വിവരിക്കുന്നത്.

മനുഷ്യശരീരത്തിലെ കഴുത്തിന് മുകളിലുള്ള അവയവങ്ങളെ സംബന്ധിക്കുന്ന ചികിത്സ വിഭാഗമാണ് ശാലാക്യതന്ത്രം. അലോപ്പത്തി ചികിത്സ ശാസ്ത്രം ഇതിനെ ഇ.എന്‍.ടി (ചെവി, മൂക്ക്, തൊണ്ട) വിഭാഗം എന്നു പറയുന്നു.

ആയുര്‍വേദ ചികിത്സാ ശാസ്ത്രം


സാധാരണ മറ്റ് രോഗങ്ങളെപ്പോലെ തന്നെ വാത - പിത്ത - കഫ ദോഷങ്ങളുടെ അസന്തുലിതാവസ്ഥയാണ് തൊണ്ട രോഗങ്ങള്‍ക്കും കാരണമായി ആയുര്‍വേദ ചികിത്സാ ശാസ്ത്രം പ്രതിപാദിക്കുന്നത്.

തൊണ്ട രോഗങ്ങള്‍ വാത - പിത്ത - കഫ വിഭാഗങ്ങളില്‍ ഉണ്ടെങ്കിലും, കഫദോഷ പ്രധാനമാണ് തൊണ്ടയിലെ രോഗങ്ങള്‍. ഇതിന്റെ കാരണം കഫദോഷസ്ഥാനമായി ആയുര്‍വേദം പ്രതിപാദിക്കുന്നത് ഉരസും കണ്ഠവുമാണ്.

ശിരസിനെയും ഉടലിനെയും ബന്ധിപ്പിക്കുന്ന കഴുത്തിലാണ് കണ്ഠസ്ഥാനം. അതുകൊണ്ട് തന്നെ ഉടലിലും ശിരസിലും ഉണ്ടാകുന്ന രോഗാവസ്ഥകള്‍ തൊണ്ടയെ സാരമായി ബാധിക്കാറുണ്ട്.

തൊണ്ടയുമായി ബന്ധപ്പെട്ടു കിടക്കുന്ന പ്രധാന അവയവങ്ങളാണ് തൈറോയിഡ് ഗ്രന്ഥി, സ്വന തന്ത്രികള്‍, ലാരിന്‍ക്‌സ്, ഫാരിക്‌സ്, അന്നനാളം, ശ്വാസനാളം തുടങ്ങിയവ.

അതുകൊണ്ട് തന്നെ ശ്വസന വ്യവസ്ഥയിലും, ദഹനവ്യവസ്ഥയിലും ഉണ്ടാകുന്ന ഒട്ടുമിക്ക രോഗങ്ങളെല്ലാം തന്നെ തൊണ്ടയേയും ബാധിക്കാറുണ്ട്.

കാരണങ്ങള്‍


1. തണുത്തതും ചൂടേറിയതുമായ ഭക്ഷണങ്ങള്‍ കഴിക്കുക
2. പഴകിയ ഭക്ഷണസാധനങ്ങള്‍

3. തലനീരിറക്കം
4. ദഹനസംബന്ധമായ രോഗങ്ങള്‍

5. അമിത ഉച്ചത്തിലുള്ള സംസാരം അല്ലെങ്കില്‍ അധിക സമയം സംസാരിക്കുക
6. തണുപ്പിച്ച ഭക്ഷണങ്ങള്‍ (ഐസ്‌ക്രീം, തണുത്ത വെള്ളം)

7. എരിവ്, മസാല, പുളി, ഉപ്പ്, മധുരം, തുടങ്ങിയവയുടെ അമിത ഉപയോഗം
8. പാലും പാലുത്പന്നങ്ങളുടെയും അമിത ഉപയോഗം

9. പകലുറക്കം
10. തൈറോയിഡ് ഗ്രന്ഥി രോഗങ്ങള്‍

11. ജലദോഷം
12. പനി
13. ബേക്കറി പദാര്‍ഥങ്ങള്‍, മൈദ, പഞ്ചസാര, ഡാള്‍ഡ തുടങ്ങിയവയുടെ നിത്യോപയോഗം

uploads/news/2017/09/146660/throudinfection160917a.jpg

പരിഹാരമുണ്ട്


തൊണ്ട വേദനയ്ക്ക് അനുകൂലമായ സാഹചര്യങ്ങളും കാരണങ്ങളും ഒഴിവാക്കുക എന്നതാണ് മുന്‍കരുതലുകളിലും പരിഹാരമാര്‍ഗങ്ങളിലും പ്രധാനം.

1. തണുപ്പിച്ചതും പഴകിയതുമായ ഭക്ഷണങ്ങള്‍ ഒഴിവാക്കുക.
2. തലനീരിറക്കം ഉണ്ടാകുവാനുള്ള സാഹചര്യങ്ങള്‍ ഒഴിവാക്കുക (വിയര്‍ത്തിരിക്കുമ്പോള്‍ തലയില്‍ എണ്ണ തേയ്ക്കുക, കുളിക്കുക, കുളി കഴിഞ്ഞ് മുടി ഉണങ്ങാതിരിക്കുക തുടങ്ങിയവ)

3. ദഹനക്കേടും ദഹനസംബന്ധമായ അസുഖങ്ങളും യഥാസമയം ചികിത്സിക്കുക
4. ജലദോഷം, കഫക്കെട്ട് തുടങ്ങിയ അസുഖങ്ങള്‍ തുടക്കത്തില്‍ തന്നെ ചികിത്സിക്കുക

5. തൈര്, വെണ്ണ മുതലായ പാലുത്പന്നങ്ങളുടെ ഉപയോഗം നിയന്ത്രിക്കുക
6. തൈര്, മോര് തുടങ്ങിയവ രാത്രി കാലങ്ങളില്‍ ഉപയോഗിക്കരുത്

7. തൈറോയിഡ് രോഗമുള്ളവര്‍ മുടങ്ങാതെ കൃത്യമായി ചികിത്സ ചെയ്യണം
8. എരിവ്, മസാല, പുളി, മറ്റ് കൃത്രിമ രുചിക്കൂട്ടുകള്‍ ശ്രദ്ധയോടെ മാത്രം ഉപയോഗിക്കുക
9. ബേക്കറി വസ്തുക്കളും, പാക്കറ്റ് ഭക്ഷണ പദാര്‍ത്ഥങ്ങളും കഴിവതും ഒഴിവാക്കുക

ചികിത്സാ രീതി


തൊണ്ടവേദന പലവിധ കാരണങ്ങള്‍ കൊണ്ടുണ്ടാകാം. അതിനാല്‍ തൊണ്ട വേദനയുടെ യഥാര്‍ഥ കാരണം കണ്ടെത്തി ചികിത്സിക്കുകയെന്നതാണ് മുഖ്യം.

മറ്റ് അസുഖങ്ങളോ കാരണങ്ങളോ ഇല്ലെങ്കില്‍ മാത്രം തൊണ്ടയ്ക്ക് നേരിട്ട് ചികിത്സ നല്‍കാവുന്നതാണ്. അല്ലാത്തപക്ഷം യഥാര്‍ഥ കാരണം കണ്ടെത്തുക. അതിനു ശേഷം ചികിത്സ ആരംഭിക്കുന്നതാണ് ഉത്തമം.

യഥാര്‍ഥ കാരണ ചികിത്സയാണ് വേണ്ടത്. അതോടൊപ്പം തന്നെ തൊണ്ട വേദന സുഖമാകുന്നതിനുള്ള ചികിത്സകളും നല്‍കാനാകും. വൈദ്യനിര്‍ദേശപ്രകാരമല്ലാതെ സ്വയം ചികിത്സകള്‍ ചെയ്യാന്‍ പാടില്ല. ദോഷകരമല്ലാത്ത ചില ചികിത്സാ രീതികള്‍ ആയുര്‍വേദത്തിലുണ്ട്.

1. ഇളം ചൂടുവെള്ളത്തില്‍ കല്ലുപ്പ് ചേര്‍ത്ത് ദിവസത്തില്‍ പലപ്രാവശ്യം കവിള്‍ കൊള്ളുക
2. ത്രിഫല കഷായം (ഇളം ചൂടില്‍) കൊണ്ട് ഗണ്ഡകഷം (കവിള്‍ കൊള്ളല്‍) ചെയ്യാവുന്നതാണ്

3. താലിസ വടകം / വ്യോഷാദി വടകം പല പ്രാവശ്യം സേവിക്കുക
4. കഴുത്തില്‍ കര്‍പ്പാരാദി തൈലം തേച്ച് ചൂട് പിടിപ്പിക്കുക

5. മരുന്നിട്ട വെള്ളത്തില്‍ ആവി കൊള്ളുക. തുളസിയില, ചുക്കാലി തൈലം, കര്‍പ്പൂരാദി തൈലം മുതലായവ ഇതിനായി ഉപയോഗിക്കാവുന്നതാണ്
6. താലിസപത്രാദി ചൂര്‍ണ്ണം/ യഷ്ടിമധു ചൂര്‍ണ്ണം തേനില്‍ പ്രതിസാരണം (തൊണ്ടയില്‍ പലവട്ടം തേക്കുക) ചെയ്യാവുന്നതാണ്

മരുന്ന് പ്രയോഗങ്ങള്‍


സാധാരണയായി തൊണ്ട രോഗങ്ങള്‍ക്കും അനുബന്ധരോഗങ്ങള്‍ക്കും ആയുര്‍വേദത്തില്‍ ഉപയോഗിച്ചു വരുന്ന മരുന്നുകള്‍.

അമൃതോത്തരം കഷായം, ദശമൂല കടുത്രയം കഷായം , ഇരട്ടി മധുരം കഷായം , ത്രിഫല ചൂര്‍ണം, താലിസപത്രാദി ചൂര്‍ണം, കര്‍പ്പൂരാദി ചൂര്‍ണം, ഖദിര ഗുളിക, ഗോരോചനാദി ഗുളിക, വെട്ടുമാറന്‍ ഗുളിക, വാസാരിഷ്ടം, അമൃതാരിഷ്ടം, കനകാസവം, അഗസ്ത്യ രസായനം, ദശമൂല രസായനം

ഡോ. സുബീഷ് ചിറ്റൂര്‍
ആരോഗ്യോദയം ആയുര്‍വേദ ഹോസ്പിറ്റല്‍, പാലക്കാട്

Ads by Google
Ads by Google
TRENDING NOW