Saturday, December 09, 2017 Last Updated 1 Min 7 Sec ago English Edition
Todays E paper
Ads by Google
Tuesday 25 Jul 2017 04.37 PM

ശബ്ദ മലിനീകരണം ആരോഗ്യപ്രശ്‌നം

uploads/news/2017/07/130613/helthsoundproblms250717.jpg

ശബ്ദമലിനീകണം സൃഷ്ടിക്കില്ലെന്ന് സമൂഹത്തിലെ ഓരോ വ്യക്തിയും തീരുമാനിക്കണം. അതിനു ശബ്ദമലിനീകരണമുണ്ടാക്കുന്ന ആരോഗ്യപ്രശ്‌നങ്ങളെക്കുറിച്ച് മനസിലാക്കേണ്ടതുണ്ട്.

ശബ്ദമലിനീകരണത്തിന് എതിരെയുള്ള അവബോധം സൃഷ്ടിക്കുന്നതിനുള്ള അന്താരാഷ്ട്ര ദിനാചരണത്തിന്റെ ഭാഗമായാണ,് കേരളം ഏപ്രില്‍ 26 ന് നോ ഹോണ്‍ ഡേ ആചരിച്ചത്. സംസ്ഥാന സര്‍ക്കാരിനൊപ്പം ഇന്ത്യന്‍ മെഡിക്കല്‍ അസോസിയേഷന്റെയും മറ്റ് സന്നദ്ധ സംഘടനകളുടെ സഹകരണവും നോ ഹോ ണ്‍ ഡേയ്ക്ക് ഉണ്ടായിരുന്നു.

ശബ്ദമലിനീകരണ തോത് കുറയ്ക്കുകയെന്ന ലക്ഷ്യമാണ്് നോ ഹോണ്‍ ഡേയിലൂടെ അര്‍ത്ഥമാക്കുന്നത്. ഒരു ദിവസം മാത്രം ഓര്‍മ്മപ്പെടുത്തിയാല്‍ ശബ്ദമലിനീകരണ തോത് കുറയുമോ? ശബ്ദമലിനീകണം സൃഷ്ടിക്കില്ലെന്ന് സമൂഹത്തിലെ ഓരോ വ്യക്തിയും തീരുമാനിക്കണം. അതിനു ശബ്ദമലിനീകരണമുണ്ടാക്കുന്ന ആരോഗ്യപ്രശ്‌നങ്ങളെക്കുറിച്ച് മനസിലാക്കേണ്ടതുണ്ട്.

ശബ്ദമലിനീകരണം ഉണ്ടാകുന്നതെപ്പോള്‍


ശബ്ദമലിനീകരണം ഉണ്ടാകാനുള്ള സാധ്യത രണ്ട് തരത്തിലുണ്ട്. വീട്ടില്‍ നിന്നും ഉണ്ടാകുന്ന ശബ്ദങ്ങളിലൂടെ അല്ലെങ്കില്‍ ചുറ്റുപാടുകളില്‍ നിന്നുമുണ്ടാകുന്ന ശബ്ദങ്ങള്‍. ഇവ രണ്ടും ശബ്ദമലിനീകരണത്തിനു കാരണമാകാം.

അമിത ഉച്ചത്തില്‍ ടിവി പ്രവര്‍ത്തിക്കുക, റേഡിയോ, മോട്ടര്‍, ഗ്രൈന്റര്‍ തുടങ്ങിയ ഉപകരണങ്ങളുടെ പ്രവര്‍ത്തനം എന്നിവയൊക്കെ വീടിനുള്ളില്‍ ഉയര്‍ന്ന ശബ്ദങ്ങള്‍ സൃഷ്ടിക്കുന്നവയാണ്.

ചുറ്റുപാടുകളില്‍ നിന്നുള്ള ശബ്ദങ്ങളില്‍ കൂടുതലായും വ്യവസായ സ്ഥാപനങ്ങളില്‍ നിന്നും ഉണ്ടാകുന്ന അമിത ശബ്ദങ്ങള്‍ തന്നെയാണ്്. ഇവ കൂടാതെ വാഹനങ്ങളുടെ ശബ്ദങ്ങള്‍, കെട്ടിട നിര്‍മാണം, ലൗഡ്‌സ്പീക്കര്‍, എയര്‍ക്രാഫ്റ്റ്, വിമാനത്താവളങ്ങളില്‍ നിന്നും ഉണ്ടാകുന്ന ശബ്്്ദങ്ങള്‍, തുടങ്ങിയവയും ശബ്ദ മലിനീകരണത്തിന്് ഇടയാക്കും.

ചുറ്റുപാടുമുള്ള ശബ്ദങ്ങളില്‍ വാഹനങ്ങളുടെ ശബ്ദങ്ങളാണ് ഏറ്റവും അപകടകരം. വാഹനങ്ങളുടെ ഹോണുകളും ഫാക്ടറിയിലെ ശബ്ദങ്ങളും ശബ്ദമലിനീകരണത്തിനുള്ള സാധ്യത വര്‍ധിപ്പിക്കും.

പ്രത്യാഘാതങ്ങള്‍


ശബ്ദമലിനീകരണത്തിന്റെ അനന്തരഫലങ്ങള്‍ രണ്ട് വിഭാഗങ്ങളായി ഉണ്ടാകാം. ഓഡിറ്ററി അല്ലെങ്കില്‍ നോണ്‍ ഓഡിറ്ററി എന്നിങ്ങനെ. ഓഡിറ്ററി വിഭാഗത്തില്‍പ്പെടുന്നത് ചെവിയെ ബാധിക്കുന്ന പ്രശ്‌നങ്ങളാണെങ്കില്‍, നോണ്‍ ഓഡിറ്ററിയില്‍ മറ്റു ആരോഗ്യപ്രശ്‌നങ്ങളും ഉള്‍പ്പെടുന്നു.

ചെവിയെ ബാധിക്കുന്ന ഓഡിറ്ററി വിഭാഗത്തില്‍ കേള്‍വിശക്തിക്കായിരിക്കും കുറവു സംഭവിക്കുക. ഇത് രണ്ട് രീതിയില്‍ ഉണ്ടാകാം. സ്ഥിരമായി അല്ലെങ്കില്‍ താല്‍കാലികമായും ഉണ്ടാകുന്നു. സ്ഥിരമായി ഉണ്ടാകുന്ന കേള്‍വിതകരാര്‍ കൂടിയ ഡെസിബെല്ലിലുള്ള ശബ്ദങ്ങള്‍ ചെവിയെ ബാധിക്കുന്നതിലൂടെ സംഭവിക്കുന്നതാണ്്.

ശബ്ദങ്ങള്‍ക്ക് ഒരു പരിധി നിശ്ചയിക്കപ്പെട്ടിട്ടുണ്ട്. അളവിലുമുപരി ശബ്ദമുണ്ടാകുമ്പോള്‍ ചെവിക്കുള്ളിലെ ഹെയര്‍ സെല്ലുകള്‍ നശിക്കും. ഇത് കേള്‍വിക്കുറവിനു കാരണമാകാം.

താല്‍കാലികമായുള്ള ശ്രവണ തകരാര്‍ കുറെ നാളുകള്‍ തുടര്‍ച്ചയായി അമിത ശബ്ദം ശ്രവിക്കുന്നതിലൂടെ ഉണ്ടാകുന്നു. ഇത്് ചെവിയുടെ ഉള്ളിലുള്ള സെല്ലുകള്‍ക്ക് ദോഷമുണ്ടാക്കും. ഫാക്ടറികളിലെ ശബ്ദങ്ങള്‍, വിമാനത്താവളങ്ങളിലെ ശബ്ദങ്ങള്‍ എന്നിവ ചുറ്റുപാടും ശബ്ദമലിനമാക്കുന്നു. കേള്‍വി തകരാറുകള്‍ക്കും ഇത് കാരണമാകാം.

മറ്റ് ആരോഗ്യപ്രശ്‌നങ്ങള്‍


കേള്‍വിതകരാറുകള്‍ക്ക് പുറമെ മറ്റ് ആരോഗ്യപ്രശ്‌നങ്ങള്‍ക്കും അമിത ശബ്ദം ഇടയാക്കും. നോണ്‍ ഓഡിറ്ററി വിഭാഗത്തിലാണ് ഇത്തരം ആരോഗ്യപ്രശ്‌നങ്ങള്‍ ഉള്‍പ്പെടുന്നത്. അതായത് ചെവിയെ ബാധിക്കാത്ത മറ്റ് ശാരീരിക ബുദ്ധിമുട്ടുകളാണിവ.

അമിതമായ ശബ്ദം കുറെ കാലം തുടര്‍ച്ചയായി കേള്‍ക്കുന്നവരില്‍ രക്തസമ്മര്‍ദം ഉയരാന്‍ സാധ്യതയുണ്ട്്. അഞ്ച് മുതല്‍ 10 മില്ലി മീറ്റര്‍ വരെ രക്തസമ്മര്‍ദം കൂടിയേക്കാം.

അതുപോലെ ഉയര്‍ന്ന തരംഗദൈര്‍ഘ്യത്തിലുള്ള ശബ്ദങ്ങള്‍ ദഹനപ്രക്രിയയ്ക്ക് തടസമാകും. രക്തസമ്മര്‍ദം ഉയരുന്നത് ചിലപ്പോള്‍ ഹൃദയാഘാതത്തിനും ഇടയാക്കിയേക്കാം. എന്നാല്‍ വളരെ അപൂര്‍വമായിട്ടേ ഇത്തരത്തില്‍ ഹൃദയാഘാതമുണ്ടാകാനുള്ള സാധ്യത കാണുന്നുള്ളൂ.

ഭയം, ഉത്കണ്ഠ, ഉറക്കക്കുറവ്, തലകറക്കം, ക്ഷീണം എന്നീ ശാരീരിക- മാനസിക ബുദ്ധിമുട്ടുകളും ഉണ്ടാകാനിടയുണ്ട്. പല കാര്യങ്ങളിലും ശ്രദ്ധകേന്ദ്രീകരിക്കാന്‍ കഴിയാതെ വരിക, അമിത ദേഷ്യം, കുറച്ച് കാലങ്ങള്‍ക്ക് ശേഷം ഓര്‍മ്മക്കുറവ് അനുഭവപ്പെടുക, ഉറക്കത്തെ ബാധിക്കുക തുടങ്ങിയവയും സ്ഥിരമായുണ്ടാകുന്ന അമിത ശബ്ദം മൂലമുള്ള പ്രശ്‌നങ്ങള്‍ തന്നെയാണ്.

ചെവിയുടെ കര്‍ണപടത്തിനുള്ളില്‍ ഏകദേശം രണ്ട് ലക്ഷത്തിയമ്പതിനായിരം ഹെയര്‍ സെല്ലുകളുണ്ട്. ഉയര്‍ന്ന തരംഗദൈര്‍ഘ്യത്തിലുള്ള ശബ്ദങ്ങള്‍ ഈ ഹെയര്‍ സെല്ലുകളെയാണ് ബാധിക്കുന്നത്.

ഇത് ഹെയര്‍സെല്ലുകള്‍ നശിക്കാന്‍ കാരണമാകും. മസ്തിഷ്‌കത്തിലെ കോശങ്ങള്‍ പോലെ നശിച്ചാല്‍ വീണ്ടും പുതിയ കോശങ്ങള്‍ രൂപപ്പെടുന്ന തരത്തിലുള്ള കോശങ്ങളല്ല, കാതുകള്‍ക്കുള്ളിലുള്ളത്.

ശ്രവണ തകരാറാകുന്നത്


ലോകാരോഗ്യ സംഘടനയുടെ നിര്‍ദേശമനുസരിച്ച് ശബ്ദപരിധി കൃത്യമായി നിശ്ചയിക്കപ്പെട്ടിട്ടുണ്ട്. ഡെസിബെല്ലിലാണ് ശബ്ദ പരിധി അളക്കുന്നത്. ഒരു ദിവസം എട്ട് മണിക്കൂറില്‍ കൂടുതലായി, 85 ഡെസിബെല്ലില്‍ കൂടുതല്‍ ശബ്ദം ഉണ്ടാകുകയാണെങ്കില്‍ അത് ശബ്ദമലിനീകരണത്തിന് കാരണമാകും.

കേള്‍വിക്ക് കോട്ടം സംഭവിക്കാനും സാധ്യതയുണ്ട്. ഫാക്ടറികളില്‍ സാധാരണയായി 80 ഡെസിബെല്‍ പരിധിയില്‍ ശബ്ദങ്ങള്‍ ഉണ്ടാകാറുണ്ട്. ലൗഡ്‌സ്പീക്കറുകള്‍ക്ക ്90 ഡെസിബല്‍ വരെ ഉണ്ടാകാം.

മോട്ടര്‍ ബൈക്കുകള്‍ക്കാണ് അമിത ശബ്ദം ഏറ്റവും കൂടുതലായി ഉണ്ടാകുന്നത്. ചിലതരം മോട്ടോര്‍ ബൈക്കുകള്‍ക്ക് 110 ഡെസിബല്‍ വരെ ഉണ്ടാകാനിടയുണ്ട്.

ഇവയുടെ ഹോണും ശബ്ദമലിനീകരണമുണ്ടാക്കും. തുടര്‍ച്ചയായി 85 ഡെസിബെല്‍ ശബ്ദം ഒരു ദിവസം എട്ട് മണിക്കൂറില്‍ കൂടുതല്‍ ഉണ്ടായാല്‍ ശ്രവണ തകരാറുകള്‍ സംഭവിക്കാം. ചെവിയില്‍ മൂളല്‍ അനുഭവപ്പെടുക, തലകറക്കം, ചിലര്‍ക്ക് കേള്‍വി കുറവ് ഇവയൊക്കെ ലക്ഷണങ്ങളായി കണക്കാക്കാം.

ചികിത്സയുണ്ട്


ശ്രവണതകരാറുകള്‍ ഓഡിയോഗ്രാം എന്ന ടെസ്റ്റിലൂടെ കണ്ടെത്താന്‍ സാധിക്കും. ചികിത്സയുടെ ആദ്യഘട്ടം ഓഡിയോഗ്രാം ടെസ്റ്റാണ്. ആവശ്യമായി വന്നാല്‍ സി.റ്റി
സ്‌കാനും ചെയ്യാറുണ്ട്. പെട്ടെന്നുള്ള തകരാറുകള്‍ കണ്ടെത്താന്‍ സി.റ്റി സ്‌കാന്‍ നിര്‍ദേശിക്കാറുണ്ട്.

140- 180 ഡെസിബെല്‍ വരെയുള്ള സൗണ്ട് ഏക്‌സ്‌പോഷര്‍ പെട്ടെന്നുണ്ടായാല്‍ കര്‍ണപടം പൊട്ടിപോകാനുള്ള സാധ്യതയുണ്ട്. എന്‍ഡോസ്‌കോപ്പിയിലൂടെ കര്‍ണപടം പൊട്ടിയിട്ടുണ്ടോ അല്ലെങ്കില്‍ കര്‍ണപടത്തിന് എന്തെങ്കിലും തകരാറുണ്ടോയെന്നു കണ്ടെത്താനാകും. സി.റ്റി സ്‌കാനിലൂടെയും ചെവിക്കുള്ളിലെ ചെറിയ എല്ലുകള്‍ക്ക് തകരാറുണ്ടോയെന്നും മനസിലാക്കാം.

ചെവിക്കുള്ളില്‍ ധാരാളം ചെറിയ എല്ലുകളുണ്ട്. ചെവിക്കുള്ളിലേക്ക് വൈബ്രേറ്റ് ചെയ്യുന്ന ശബ്ദം കര്‍ണപടത്തില്‍ തട്ടി, ഈ ചെറിയ എല്ലുകളിലൂടെയാണ് ഇന്നര്‍ ഇയറിലേക്ക് പോകുന്നത്.

ഈ എല്ലുകള്‍ക്ക് അമിതശബ്ദങ്ങള്‍ കൊണ്ട്് എന്തെങ്കിലും ക്ഷതമുണ്ടായിട്ടുണ്ടെങ്കില്‍ സി.റ്റി സ്‌കാന്‍ എടുക്കുന്നതിലൂടെ മനസിലാകും. ടെസ്റ്റുകള്‍ക്ക് ശേഷമായിരിക്കും തുടര്‍ചികിത്സകള്‍ നല്‍കുക.

എങ്ങനെ പരിഹരിക്കാം


ശബ്ദമലിനീകരണം പൂര്‍ണമായും പരിഹരിക്കാന്‍ കഴിയില്ല. ഒരു പരിധി വരെ ഇവയ്ക്ക് നിയന്ത്രണങ്ങള്‍ ഏര്‍പ്പെടുത്താനാകും. ശബ്ദമലിനീകരണം സൃഷ്ടിക്കുന്ന സ്രോതസുകളുടെ ഉപയോഗത്തില്‍ ചില മാറ്റങ്ങള്‍ വരുത്തിയാല്‍ ശബ്ദമലിനീകരണം പരിഹരിക്കാനാകും.

വാഹനങ്ങളിലെ ഹോണുകള്‍ ഒരു പരിധി വരെ നിയന്ത്രിക്കാവുന്നതാണ്. നോ ഹോണ്‍ ഡേ ആചരിച്ച പോലെ അനാവശ്യ സന്ദര്‍ഭങ്ങളില്‍ ഹോ ണ്‍ മുഴക്കുന്നത് പരമാവധി ഒഴിവാക്കുക.

എയര്‍പോര്‍ട്ടിന്റെ അടുത്തുനിന്നും നിശ്ചിത അകലത്തില്‍ പാര്‍പ്പിടങ്ങള്‍ അനുവദിക്കുക. ലൗഡ് സ്പീക്കറിന്റെ ഉപയോഗം കുറയ്ക്കുകയോ കുറഞ്ഞ ഡെസിബെലില്‍ ഉപയോഗിക്കുകയോ ചെയ്യുക.

വ്യവസായ സ്ഥാപനങ്ങളിലും ഫാക്ടറികളിലും ജോലി ചെയ്യുന്നവര്‍ കാതുകളുടെ സുരക്ഷയ്ക്കായി ഇയര്‍ പ്ലഗ് ഉപയോഗിക്കുക. അത് അമിത ശബ്ദത്തില്‍ നിന്നും സംരക്ഷണം നല്‍കും.

തയാറാക്കിയത് : നീതു സാറാ ഫിലിപ്പ്

Ads by Google
Tuesday 25 Jul 2017 04.37 PM
YOU MAY BE INTERESTED
Ads by Google
TRENDING NOW