Friday, June 30, 2017 Last Updated 0 Min 1 Sec ago English Edition
Todays E paper
Friday 30 Jun 2017 02.27 PM

ആരോടും പറയാത്ത ആ രഹസ്യം

uploads/news/2017/06/123186/starhelthkuchkoboban1.jpg

സിനിമപോലെ പ്രണയമാണ് ഷട്ടില്‍ ബാഡ്മിന്റനോടും കുഞ്ചാക്കോ ബോബന്. ആരോഗ്യകാര്യങ്ങളില്‍ പ്രത്യേക ശ്രദ്ധ നല്‍കാറില്ലെങ്കിലും ഷട്ടില്‍ കളിയാണ് ആരോഗ്യ രഹസ്യമെന്ന് ചാക്കോച്ചന്‍ പറയാതെ പറയുന്നു.

അഭിനയം പോലെ തന്നെ കുഞ്ചാക്കോ ബോബന് പ്രിയമേറിയതാണ് ഷട്ടില്‍ ബാഡ്മിന്റണും. വെറുമൊരു വ്യായാമമായിട്ടല്ല ചാക്കോച്ചന്‍ ഷട്ടില്‍ കളിയെ കാണുന്നത്.

ചെറുപ്പം മുതല്‍ ഷട്ടിലിനോട് വല്ലാത്ത ക്രേസാണ്. അഭിനയത്തോടൊപ്പം ആരോഗ്യകാര്യങ്ങള്‍ ശ്രദ്ധിക്കാന്‍ സമയം കിട്ടുമോ എന്ന ചോദ്യത്തിന് ഉത്തരംഒരു കുസൃതിച്ചിരിയോടെ ചാക്കോച്ചന്‍ പറഞ്ഞുതുടങ്ങി.

അഭിനയം, കുടുംബം, ബിസിനസ് ഇതിനിടയില്‍ ആരോഗ്യ കാര്യങ്ങള്‍ ശ്രദ്ധിക്കാന്‍ സമയം കിട്ടാറുണ്ടോ ?


വലിയ ഹെല്‍ത്ത് കോണ്‍ഷ്യസ് ഒന്നുമല്ല ഞാന്‍. എന്റെ പ്രധാന വ്യായാമം ഷട്ടില്‍ കളിയാണ്. എത്ര തിരക്കാണെങ്കിലും ഷട്ടില്‍ കളിക്കാന്‍ സമയം കണ്ടെത്തും.

പഠിക്കുന്ന സമയത്തു ധാരാളം സമ്മാനങ്ങളൊക്കെ കിട്ടിയിട്ടുണ്ട്. ചെറുപ്പം മുതല്‍ ഷട്ടിലിനോട് വല്ലാത്തൊരു ആവേശമാണ്. എത്ര വൈകിയാലും കളി മുടക്കില്ല. അതൊരു വ്യായാമം എന്ന നിലയിലല്ല മറിച്ചു ജീവിതത്തിന്റെ ഒരു ഭാഗമാണ്.

എന്നും രാവിലെ നാലര എന്നൊരു സമയമുണ്ടെങ്കില്‍ കളിക്കാന്‍ ഇറങ്ങും. എത്ര വൈകി വീട്ടിലെത്തിയാലും അതിനൊരു മാറ്റവുമുണ്ടാകില്ല. ഒരു ദിവസം ഷൂട്ട് കഴിഞ്ഞു എത്തിയപ്പോള്‍ സമയം വെളുപ്പിന് 3.30. എത്തിയ ഉടന്‍ ഫ്രെഷ് ആയി കളിക്കാന്‍ ഇറങ്ങി. ഇത് കണ്ട ഭാര്യ പ്രിയ പോലും ഞെട്ടി.

ഇന്ന് കളിക്കാന്‍ പോകണോ എന്നവളുടെ ചോദ്യം കേട്ടപ്പോള്‍ എനിക്ക് ദേഷ്യമാണ് വന്നത്. ഞാനവളോട് ചോദിച്ചു, 'നമ്മുടെ കല്യാണം കഴിഞ്ഞിട്ട് വര്‍ഷം കുറെ ആയില്ലേ? ഇന്ന് വരെ ഞാന്‍ ഒരു ദിവസമെങ്കിലും ഷട്ടില്‍ കളി മുടക്കിയിട്ടുണ്ടോ? പിന്നെ എന്തിനാ ഇപ്പൊ ഇങ്ങനെ ഒരു ചോദ്യം' എന്ന്. പ്രിയയ്ക്ക് ഒന്നും പറയനില്ലായിരുന്നു. ഷട്ടില്‍ കളി കഴിഞ്ഞു വന്ന ശേഷമാണ് ഞാനന്ന് ഉറങ്ങിയത് പോലും.

ചിലപ്പോള്‍ രാജ്യത്തിന് പുറത്തുപോലും ഷൂട്ടിംഗ് ഉണ്ടാകാറുണ്ട്. ഇത്തരം സാഹര്യത്തില്‍ എന്തുചെയ്യും?


ലോകത്തെവിടെ പോയാലും ഈ ശീലം ഞാന്‍ തെറ്റിക്കാറില്ല. എന്തെടുത്തില്ലെങ്കിലും ഷട്ടിലും ബാറ്റും കയ്യിലുണ്ടാകും. അത് മാത്രം മറക്കില്ല. അത് ഷൂട്ടിങ്ങിനു പോയാലും അല്ലാതെ പ്രിയക്കൊപ്പം യാത്ര പോയാലും. അതിനു പ്രിയ എന്നെ കളിയാക്കും.

സാധാരണ അഭിനേതാക്കളോടു ചോദിച്ചാല്‍ സിനിമ ഒന്നാം ഭാര്യയെന്ന് പറയും. ഇവിടെ ഒരാള്‍ക്ക് ഷട്ടില്‍ ഒന്നാം ഭാര്യയും സിനിമ രണ്ടാം ഭാര്യയുമാണ്. ഇതൊക്കെ കഴിഞ്ഞു എനിക്കെന്തെങ്കിലും സ്ഥാനമുണ്ടോ എന്ന് ചോദിച്ച് പരിഭവിക്കും. അപ്പോള്‍ ഞാനവളോട് പറയും ഈ രണ്ടു ഭാര്യമാരെക്കാളും എനിക്കിഷ്ടം എന്റെ മൂന്നാം ഭാര്യയെ ആണെന്ന്.

അതോടെ അവളുടെ പരിഭവവും തീരും. ഞങ്ങള്‍ ഒരുമിച്ചുള്ള യാത്രകളില്‍ മറക്കാതെ ഷട്ടില്‍ എടുത്ത് തരുന്നത് പ്രിയയാണ്. എന്നിട്ടെന്നെ കളിയാക്കും. ഭാര്യയെ ഉപേക്ഷിച്ചു പോകുകയാണോ എന്ന്. എന്റെ എല്ലാ കാര്യങ്ങളിലും പ്രിയക്ക് പ്രത്യേക ശ്രദ്ധയാണ്.

ഭക്ഷണ കാര്യങ്ങളില്‍ എന്തെങ്കിലും നിയന്ത്രണങ്ങള്‍?


ഒരു നിയന്ത്രണവുമില്ല. എന്ത് കിട്ടിയാലും കഴിക്കും. ഒന്നും അമിതമാകാറില്ല. പിന്നെ ധാരാളം ഫ്രൂട്ട്‌സ് കഴിക്കും. വെള്ളം കുടിക്കും. ഇഷ്ട ഭക്ഷണം ചപ്പാത്തിയാണ്. ചിക്കനും ഇഷ്ടമാണ്. പലപ്പോഴും തിരക്കുകള്‍ കാരണം കൃത്യ സമയത്ത്് കഴിക്കാന്‍ സാധിക്കില്ല.

അങ്ങനെയുള്ള സമയങ്ങളില്‍ എന്തെങ്കിലും പഴങ്ങള്‍ കയ്യില്‍ കരുതും. എന്നിട്ടു അത് കഴിക്കും. വീട്ടിലുള്ള സമയത്ത്് ഭക്ഷണം കഴിക്കണമെന്നു പ്രിയക്ക് നിര്‍ബന്ധമാണ്. എന്നെക്കാളും എന്റെ ആരോഗ്യത്തില്‍ ശ്രദ്ധിക്കുന്നത് പ്രിയ ആണ്.

TRENDING NOW