THE METRO GIRLS

മഴവില്ലിന്റെ ഏഴഴകോടെ ഏഴു പേര്‍... കൊച്ചി മെട്രോയുടെ സാരഥികളായ മിടുക്കികളുടെ ചൂളം വിളിക്കുന്ന വിശേഷങ്ങള്‍...

കൊച്ചി പഴയ കൊച്ചിയല്ല, കൊച്ചിയില്‍ മെട്രോ വരുമ്പോള്‍ അതിന്റെ ചൂളം വിളി ഒരിക്കലും കൊച്ചിയില്‍ മാത്രമായിരിക്കില്ല, കേരളം മുഴുവനും അലയടിക്കും. എന്നാല്‍ ഇനി മുതല്‍ ആ ചൂളം വിളികള്‍ക്കിടയില്‍ വളകിലുക്കവുമുണ്ടാകും.

എല്ലാ വിജയങ്ങള്‍ക്കു പിന്നിലും ഒരു പെണ്ണുണ്ടാകുമെന്ന് പഴഞ്ചൊല്ല് ഇവിടെ തിരുത്തി. വിജയത്തിന്റെ പിന്നിലല്ല, മുന്നിലാണ് ഈ പെണ്‍കൊടികള്‍. മുന്നിലെന്നു പറഞ്ഞാല്‍ ഏറ്റവും മുന്നില്‍. മെട്രോ ട്രെയിനിന്റെ ഏറ്റവും മുന്നിലുള്ള ഡ്രൈവിങ് സീറ്റില്‍ ഇനി ഇവരാണ്. ദൈവത്തിന്റെ സ്വന്തം നാടിന്റെ അഭിമാനമായ കൊച്ചി മെട്രോപായുമ്പോള്‍ അതിന്റെ സാരഥ്യം ഏറ്റെടുത്ത ഏഴ് മലയാളി പെണ്‍കുട്ടികള്‍.

ലോക്കോ പൈലറ്റില്‍ നിന്ന്.. ഹിമ, കൊല്ലം.

ഒരിക്കല്‍ പത്രത്തില്‍ ഒരു വനിതാ ലോക്കോ പൈലറ്റിന്റെ വാര്‍ത്ത കണ്ടപ്പോള്‍ ആഗ്രഹിച്ചതാണ് അത്തരത്തിലുള്ള ജോലി. പഠനത്തിനു ശേഷം ഇന്ത്യന്‍ റയില്‍വെയില്‍അസ്സിസ്റ്റന്റ് ലോക്കോ പൈലറ്റ് ആയി ജോലി ചെയ്യുന്നതിനിടെയാണ് കൊച്ചി മെട്രോയിലെത്തിയത്.

ഇന്ത്യന്‍ റയില്‍വേയില്‍ നിന്ന് കൊച്ചി മെട്രോയുടെ പൈലറ്റായപ്പോള്‍ പലരും എതിര്‍പ്പ് പ്രകടിപ്പിച്ചു. ജോലി ഒന്നാണെങ്കിലും സുരക്ഷയുടെയും സൗകര്യങ്ങളുടെയും കാര്യത്തില്‍ മെട്രോ തന്നെയാണ് മുന്നില്‍. ഇന്ത്യന്‍ റയില്‍വെയില്‍ നിന്നു മാറാന്‍ പ്രധാന കാര്യം നാട്ടില്‍ തന്നെ ജോലിചെയ്യാമെന്നുള്ളതായിരുന്നു. കൃത്യമായിട്ടുള്ള സമയ ക്രമീകരണവുമുണ്ട്.

ആഗ്രഹം ഇന്ത്യന്‍ റയില്‍വേ.... അഞ്ചു, തിരുവനന്തപുരം

എന്‍ജിനീയറിങ് ഡിപ്ലോമയ്ക്കു ശേഷം ബി.ടെക് ചെയ്തു കഴിഞ്ഞയുടനെയാണ് ഞാന്‍ മെട്രോ റയില്‍വേയുടെ പരസ്യം കാണുന്നത്. ഇന്ത്യന്‍ റയില്‍വേയില്‍ ജോലി വേണമെന്ന് ആഗ്രഹമുണ്ടായിരുന്നെങ്കിലും മെട്രോയിലേക്കും അപേക്ഷിച്ചു. റയില്‍വേയെക്കാളും സാങ്കേതികമായി ഉയര്‍ന്ന മെട്രോയില്‍ വന്നപ്പോള്‍ സന്തോഷമുണ്ട്.

ഓണ്‍ലൈന്‍ പരീക്ഷയും മെഡിക്കല്‍ ടെസ്റ്റുകളും കഴിഞ്ഞ് ബംഗളൂരുവില്‍ പരിശീലത്തിനെത്തിയപ്പോഴാണ് ആദ്യമായി മെട്രോ ട്രെയിനില്‍ കയറുന്നത്. അന്നും കരുതിയിരുന്നില്ല ഇത് ഓടിക്കാന്‍ കഴിയുമെന്ന്. ബംഗളൂരുവില്‍ നിന്നും തിരിച്ച് കൊച്ചിയിലെത്തി ഇവിടെയും 400 കിലോമീറ്റര്‍ ഓടിച്ച ശേഷമാണ് സര്‍ട്ടിഫിക്കേറ്റ് ലഭിച്ചത്.

അമ്മയ്ക്കായിരുന്നു പേടി..... നിധി കെ.ജി, തൃശ്ശൂര്‍

ആദ്യമായി ട്രെയിന്‍ ഓടിക്കുമ്പോള്‍ തോന്നിയ സന്തോഷം ഒരിക്കലും മറക്കില്ല. ആദ്യ ക്ലാസ്സുകളില്‍ ട്രെയിനിന്റെ മാതൃകയിലാണ് ഓടിക്കുന്നത്. പിന്നീടാണ് ശരിക്കുള്ള ട്രെയിന്‍ ഓടിക്കാന്‍ അവസരം. ഓടിക്കുന്നതിനു മുമ്പ് നല്ല പേടിയുണ്ടായിരുന്നു. ട്രെയ്നിംഗില്‍ എല്ലാ കാര്യങ്ങളും കൃത്യമായി തന്നെ പറഞ്ഞു തന്നിരുന്നു. അതോടൊപ്പംഅവരുടെ അനുഭവങ്ങളും കൂടിയായപ്പോഴാണ് ശരിക്കും വിശ്വാസം വന്നത്.

ഞാന്‍ ഈ ജോലിക്കു പോകുന്നതറിഞ്ഞപ്പോള്‍ അമ്മയ്ക്ക് നല്ല പേടിയുണ്ടായിരുന്നു. റോഡിലെ കാറും ബൈക്കും പോലെയല്ല.. എന്നൊക്കെ പറഞ്ഞ് വല്ലാതെ ടെന്‍ഷനടിച്ചു.

പിന്നെ ഞാന്‍ തന്നെ എല്ലാം പറഞ്ഞ് മനസ്സിലാക്കി. യാത്രക്കാരുടെയും ഓടിക്കുന്നവരുടെയും സുരക്ഷ,എങ്ങനെയാണ് ഓരോ കാര്യങ്ങളും എന്നൊക്കെ പറഞ്ഞ് കഴിഞ്ഞപ്പോള്‍ അമ്മ ഹാപ്പി. യാത്രക്കാരുടെ സൗകര്യങ്ങളും സുരക്ഷയുമാണ് മെട്രോയിലെ ഏറ്റവും വലിയ പ്രത്യേകത.

ആണ്‍കുട്ടികളെ പോലെ...... രമ്യാ ദാസ്, കൊല്ലം

ചെറുപ്പം മുതലേ വാഹനങ്ങളും ഡ്രൈവിംഗും ഇഷ്ടമായിരുന്നു. ഐ.പി.എസ്,ഐ.എ.എസ്. പോലെയോ അല്ലെങ്കില്‍ പെണ്‍കുട്ടികള്‍ കുറവുള്ള മേഖലയിലോ ജോലി വേണമെന്നായിരുന്നു പപ്പയുടെ കണ്ടീഷന്‍. പപ്പയാണ് എനിക്ക് ഏറ്റവും കൂടുതല്‍ സപ്പോര്‍ട്ട് തരുന്നത്. അപ്പോഴാണ് കൊച്ചി മെട്രോയിലോക്കുള്ള പരസ്യം കണ്ടത്. പപ്പ ആദ്യം തന്നെ സമ്മതിച്ചു. പക്ഷേ അമ്മയുടെ പേടി ഇപ്പോഴും പോയിട്ടില്ല.

ബംഗളൂരു മെട്രോയിലെ പരിശീലനം നന്നായി ആസ്വദിച്ചാണ് ചെയ്തത്. ട്രെയിനിന്റെ മാതൃകയില്‍ ഓടിക്കുമ്പോള്‍ യഥാര്‍ത്ഥത്തില്‍ എങ്ങിനെയാണോ അതുപോലെ തന്നെയാണ് അതിലും.

പാളത്തിലും മറ്റും തകരാറുകളുണ്ടെങ്കില്‍ എന്ത് ചെയ്യണമെന്നുള്‍പ്പെടെയാണ് ആദ്യ ക്ലാസ്സുകളില്‍ ഉണ്ടായിരുന്നത്. അതെല്ലാം കഴിഞ്ഞ് ആദ്യമായി മെട്രോ ട്രെയിന്‍ ഓടിക്കാന്‍ കയറിപ്പോഴായിരുന്നു ഏറ്റവും സന്തോഷം.

പൂര്‍ണ്ണമായും ഓട്ടോമാറ്റിക് ആണ് മെട്രോ ട്രെയിനുകള്‍. എന്നാല്‍ ഇപ്പോള്‍ എല്ലാ ട്രെയിനുകളിലും ഓടിക്കാന്‍ ഓരോരുത്തരുണ്ടാകും. കുറച്ചുകഴിഞ്ഞ് ഡ്രൈവര്‍മാര്‍ ഇല്ലാതെയും ട്രെയിനുകള്‍ സഞ്ചരിക്കും.