Thursday, February 22, 2018 Last Updated 5 Min 32 Sec ago English Edition
Todays E paper
Ads by Google
Wednesday 19 Apr 2017 04.08 PM

തേടിയെത്തിയ കൈനീട്ടം

uploads/news/2017/04/100794/manikandhanINW190417a.jpg

കമ്മട്ടിപ്പാടത്തിലൂടെ മലയാള സിനിമയ്ക്ക് ലഭിച്ച അഭിനയ പ്രതിഭ, മണികണ്ഠന്‍ ആചാരി. പ്രേക്ഷകര്‍ കരഘോഷത്തോടെ സ്വീകരിച്ച മണികണ്ഠന് അര്‍ഹതയ്ക്കുള്ള അംഗീകാരവും ലഭിച്ചു.

ജീവിതാനുഭവങ്ങള്‍ പകര്‍ന്ന കരുത്തോടെ സിനിമയിലെത്തിയ സാധാരണക്കാരില്‍ സാധാരണക്കാരന്‍, മണികണ്ഠന്‍ ആചാരി. ജീവിതത്തില്‍ പല വേഷങ്ങള്‍ കെട്ടിയാടിയ മണികണ്ഠന് സിനിമാ നടന്റെ പരിവേഷങ്ങള്‍ ഒന്നുമില്ല.

തിയേറ്റര്‍ ആര്‍ട്ടിസ്റ്റ് എന്ന നിലയില്‍ നിന്ന് സിനിമയുടെ വെള്ളിവെളിച്ചത്തിലേക്കെത്തിയ നടനാണ് മണികണ്ഠന്‍. കമ്മട്ടിപ്പാടം എന്ന സിനിമ കണ്ടിറങ്ങിയവരാരും ബാലന്‍ ചേട്ടനെ മറക്കാനിടയില്ല.

ബാലനായി ജനമനസ്സുകളില്‍ ഇടംനേടിയ മണികണ്ഠനെ പ്രേക്ഷകര്‍ അംഗീകരിച്ചു കഴിഞ്ഞു. അര്‍ഹതയ്ക്കുള്ള അംഗീകാരമെന്നോണം മികച്ച സഹനടനുള്ള സംസ്ഥാന അവാര്‍ഡും മണികണ്ഠനെത്തേടിയെത്തി. കൈനീട്ടമായി കിട്ടിയ അംഗീകാരത്തിന്റെ മധുരം മണികണ്ഠന്‍ വായനക്കാരുമായി പങ്കുവയ്ക്കുന്നു.

അവാര്‍ഡ് പ്രതീക്ഷ ഉണ്ടായിരുന്നോ?


അവാര്‍ഡ് കിട്ടിയതില്‍ സന്തോഷമുണ്ട്. അയാള്‍ ജീവിച്ചിരിപ്പുണ്ട് എന്ന സിനിമയുടെ പ്രൊമോഷന് വേണ്ടി ക്ലബ് എഫ്എമ്മില്‍ നില്‍ക്കുമ്പോഴാണ് അവാര്‍ഡ് ലഭിച്ച വിവരം അറിയുന്നത്.

ആ സമയത്ത് എന്ത് പറയണമെന്നോ ചെയ്യണമെന്നോ അറിയാത്ത അവസ്ഥയായിരുന്നു. ജൂറി പരാമര്‍ശമോ പുതുമുഖ നടനുള്ള അവാര്‍ഡോ കിട്ടുമെന്ന പ്രതീക്ഷയേ ഉണ്ടായിരുന്നുള്ളു. സഹനടന്‍ അവാര്‍ഡ് കിട്ടുമെന്ന് സ്വപ്നത്തില്‍ പോലും വിചാരിച്ചില്ല.

കമ്മട്ടിപ്പാടത്തിന്റെ ആദ്യ ഷോയില്‍ത്തന്നെ കൈയ്യടികളോടെയാണ് ജനങ്ങള്‍ എന്നെ സ്വീകരിച്ചത്. എനിക്ക് കിട്ടിയ ആദ്യ അംഗീകാരമാണത്. ആ സമയം ജീവിതത്തില്‍ മറക്കാനാവില്ല.

തൃപ്പൂണിത്തുറയാണ് എന്റെ നാട്. ഇവിടെ എന്നെ അറിയുന്ന എല്ലാവരും ഈ നേട്ടത്തില്‍ സന്തോഷിക്കുന്നുണ്ട്. പ്രത്യേകിച്ച് എന്റെ അമ്മ. ഇവിടെ ഇപ്പോഴും ആഘോഷങ്ങള്‍ അവസാനിച്ചിട്ടില്ല.

തൃപ്പൂണിത്തുറയില്‍ നിന്ന് ഒരുപാട് കലാകാരന്മാര്‍ സിനിമയിലെത്തിയിട്ടുണ്ട്. അവരൊക്കെ അനേകം സിനിമകള്‍ കൊണ്ട് നേടിയ അംഗീകാരം ദൈവത്തിന്റെ അനുഗ്രഹം കൊണ്ടോ ഗുരുത്വംകൊണ്ടോ എനിക്ക് ആദ്യ സിനിമയിലൂടെ ലഭിച്ചു.

ഇത്തവണ വിഷുവിന് മധുരമേറെയല്ലേ?


അതെ. ആത്മാര്‍ത്ഥമായും സന്തോഷത്തോടെയും വിഷു ആഘോഷിക്കുന്ന സമയം ഇതാണ്. ഇതിനുമുമ്പൊക്കെ ആഘോഷിക്കണമല്ലോ എന്നു കരുതി മാത്രം ആഘോഷിക്കുകയായിരുന്നു.

ഇത്തവണ വിഷുവിന് മുമ്പേ കിട്ടിയ കൈനീട്ടമായി കരുതി അവാര്‍ഡ് സ്വീകരിക്കുന്നു. മലയാളികളുടെ സ്നേഹം നിറഞ്ഞ അംഗീകാരം ലഭിച്ചതിലുള്ള സന്തോഷം എന്നെ സ്നേഹിക്കുന്ന എല്ലാവരുമായിട്ട് പങ്കുവയ്ക്കാനാണ് ഞാന്‍ ആഗ്രഹിക്കുന്നത്.

അയാള്‍ ജീവിച്ചിരിപ്പുണ്ട്, അലമാര എന്നീ ചിത്രങ്ങളും തിയേറ്ററില്‍ നല്ല അഭിപ്രായം നേടുന്നു?


കമ്മട്ടിപ്പാടത്തിനുശേഷം അയാള്‍ ജീവിച്ചിരിപ്പുണ്ട്, അലമാര എന്നീ രണ്ടു ചിത്രങ്ങളും പ്രേക്ഷകര്‍ സ്വീകരിച്ചതില്‍ സന്തോഷം. കമ്മട്ടിപ്പാടത്തിലെ ബാലനുമായി യാതൊരു ബന്ധവുമില്ലാത്ത കഥാപാത്രങ്ങളാണ് ഈ ചിത്രങ്ങളില്‍.

മുരുകന്‍ എന്നാണ് അയാള്‍ ജീവിച്ചിരിപ്പുണ്ട് എന്ന ചിത്രത്തിലെ കഥാപാത്രത്തിന്റെ പേര്. വിജയേട്ടനു (വിജയ് ബാബു)മായി സിനിമയിലുണ്ടായിരുന്ന കെമിസ്ട്രി ജീവിതത്തിലും വര്‍ക്കൗട്ട് ആയി. ഇപ്പോള്‍ വിജയേട്ടന് ഞാന്‍ അനിയനെപ്പോലെയാണ്.

അലമാരയില്‍ സണ്ണി വെയ്നിന്റെ അമ്മാവനായിട്ടാണ് അഭിനയിക്കുന്നത്. ചിത്രത്തിലെ അമ്മാവനും മരുമകനും തമ്മില്‍ പ്രായവ്യത്യാസമില്ല. കൂട്ടുകാരെപ്പോലെയാണവര്‍. ശരിക്കും എന്‍ജോയ് ചെയ്തഭിനയിച്ച ചിത്രമാണ് അലമാര.

TRENDING NOW